Շշի Մելոյի քրոջ որդին խաթարել է աբովյանցիների անդորրը․ լուսանկարներ

Շշի Մելոյի քրոջ որդին խաթարել է աբովյանցիների անդորրը․ լուսանկարներ
Ծառուկյան խմբակցության պատգամավոր Մելիք Մանուկյանի՝ Շշի Մելոյի քրոջ որդին խաթարել է Աբովյան քաղաքի Սարալանջ 17 շենքի բնակիչների անդորրը: Պատգամավորի զարմիկը նշված հասցեում «երկսենյականոց» ավտոտնակ է սարքում ու անխնա հատում դիմացի այգու հաստաբուն ծառերը. «Մեկ օրում 10 հաստաբուն ծառ հատեց,արմատախիլ արեց, տարիներով մեծացրած ծառերը ոչնչացրեց մեկ գիշերվա ընթացքում»,-պատմում է շենքի բնակիչներից Շիրակացու անվան ճեմարանի նախկին ուսուցչուհի Արմինե Պետրոսյանը, նա ահազանգել է մեր խմբագրություն, խնդրում-հորդորում է պատկան մարմինների ուշադրությունը իրենց խնդրին:



![](https://scontent.fevn1-1.fna.fbcdn.net/v/t1.15752-9/38406394_2164127153862669_9098384236523552768_n.jpg?_nc_cat=0&oh=bf954442d30b5a882b2d934653bb3ee4&oe=5C0A9D3B)



Քաղաքացու կարծիքով, պատգամավորի բարեկամին շինթույլտվություն են տվել քաղաքաշինության բոլոր նորմերին հակառակ. «Չի կարելի բնակելի շենքի դիմացը այգին ոչնչացնելով հսկա ավտոտնակ սարքել, այն պարագայում, երբ շենքի ետնամասում ավտոտնակների պակաս չի զգացվում: Բայց քանի որ իրենք քաղաքապետի հետ մտերիմն են, մի շինթույլտվություն տալը բարդ գործ չէ» ասում է նա շարունակելով. «Սկզբում ասում էին, թե երկհարկանի շենք է կառուցում, երբ բնակիչներս բողոքեցինք, հավանաբար մտքափոխվեց, մեկ հարկանի հսկա ավտոտնակ է կառուցում , գազ քաշում, ջուր, լույս»:



![](https://scontent.fevn1-1.fna.fbcdn.net/v/t1.15752-9/38412023_2224916877737276_3417411649571651584_n.jpg?_nc_cat=0&oh=e94403fa1b293953d11092a79d421639&oe=5BCA93F3)



Տիկին Արմենուհին կասկածներ ունի, որ ծառահատումը շարունակվելու է, իրենք դիմել են մարզպետին, բնապահպանության տեսչություն, սակայն ապարդյուն. «Վերջերս դիմեցինք նորանշանակ մարզպետին՝ շինաշխատանքները երեք օրով դադարեցվեցին, ասացին հանրային լսումներ կկազմակերպենք: Հետո, չգիտես ինչպես, հաջորդ օրը այդ լսումները առանց մեզ տեղեկացնելու անցկացրեցին, շենքից մի տասը բնակիչ տվել է համաձայնություն կիսակառույց շինությունը ավարտին հասցնելու վերաբերյալ, սակայն, ստացվում է, որ մյուս կեսը դեմ է: Սակայն շինաշխատանքները նորից վերսկսվել են, ու հիմա մենք չգիտենք էլ ում դիմենք»:



![](https://scontent.fevn1-1.fna.fbcdn.net/v/t1.15752-9/38442130_1784835011630781_1673999731665141760_n.jpg?_nc_cat=0&oh=d129569fc6ab768259b06856935e2a23&oe=5C0A35B8)



Կոտայքի մարզպետարանի հասարակայնության հետ կապերի վարչությունից մեզ պատասխանեցին, որ քաղաքացիների դիմումի հիման վրա մարզպետի կարգադրությամբ աշխատանքային խումբ է մեկնել, տեղում զբաղվել խնդրով, քաղաքային իշխանությունից ստացել են համապատասխան փաստաթղթեր, որ շինաշխատանքներն ընթանում են օրինականության դաշտում, կա համապատասխան շինթույլտվություն: Մարզպետի մամուլի խոսնակը ասաց նաեւ, թե տվյալ վայրում ծառահատում չի իրականացվում: