Վարչապետը ոչ լայն կազմով մեկնում է Մոսկվա

Ինչպես տեղեկացրել էինք, վարչապետ Նիկոլ Փաշինյանն այսօր մեկնում է Մոսկվա, որտեղ նախատեսվում է նրա հանդիպումը ՌԴ նախագահ Վլադիմիր Պուտինի հետ:



Վարչապետին ուղեկցում է նրա կինը՝ Աննա Հակոբյանը: Փաշինյանի գկխավորած պատվիրակության կազմում են ՌԴ-ում ՀՀ արտակարգ և լիազոր դեսպան Վարդան Տողանյանը, վարչապետի խորհրդական Արսեն Խառատյանն ու վարչապետի օգնական Վարուժան Ներսեսյան: Մենք օդանավակայանում նկատեցինք նաև ԱԱԽ նորանշանակ քարտուղար Արմեն Գրիգորյանին, ով, ամենայն հավանականոմթյամբ, ևս վարչապետին ուղեկցողների մեջ է:



Այսօր նախատոսված է միայն ՌԴ նախագահի հետ հանդիպում, իսկ վաղվա օրակարգն ավելի հագեցած է:



Վաղը տեղի կունենա մարշալ Հովհաննես Բաբաջանյանի կիսանդրու բացումը, նաև նախատեսված է այցելություն Հայ Առաքելական եկեղեցու վանական համալիր:



Նույն օրը ՀՀ փոխվարչապետ Մհեր Գրիգորյանը վարչապետի կեցավայրում կհանդիպի «ՎՏԲ» բանկի խորհրդի նախագահ Անդրեյ Կոստինի հետ:



Այնուհետև վարչապետ Նիկոլ Փաշինյանը կմասնակցի ֆուտբոլի աշխարհի առաջնության բացման հանդիսավոր արարողությանը:



Այցի մանրամասները **Hraparak.am**-ը կհաղորդի ավելի ուշ:



**Վահե ՄԱԿԱՐՅԱՆ**