Վարչապետի երազանքների փողոցը քանդվում է. Ռուսթավելիի սալաքարերը ճաք են տվել (լուսանկարներ)

hraparak 20 Մարտ 2018 | 14:15 0

Շուրջ 6 ամիս է, ինչ շահագործման է հանձնվել Գյումրու Ռուսթավելի փողոցը: Սակայն փողոցի սալաքարերն արդեն տեղ-տեղ ճաք են տվել, քանդվել են մայթեզրերի բետոնները: Սա այն դեպքում, երբ այս տարի ձմեռը բավական մեղմ էր, իսկ եթե սառնամանիք լիներ, հնարավոր է փողոցի գրանիտե սալաքարերն ամբողջությամբ տուժեին: Խնդիրն այն է, որ գրանիտե սալիկների հիմքն ամուր չէ կամ դրանք փակցվել են անորակ հողածածկույթի վրա, կարծիք են հայտնում մասնագետները:

Ովքե՞ր են պատասխանատու անորակ շինարարության համար: Գյումրի քաղաքի գլխավոր ճարտարապետ Հենրիկ Գասպարյանը չպատասխանեց մեր հեռախոսազանգերին, որպեսզի որոշ հարցեր ուղղեինք: Իսկ ահա «Կումայրի վերածնունդ» ոչ հրապարակային պայմանագրային մասնագիտացված ներդրումային ֆոնդի գրանցման և հաշիվների բացման գործընթացի հետ կապված տեղեկություն հայթայթել նույնպես չհաջողվեց, քանի որ հիմնադրամի մասին ինֆորմացիաներն ու կոնտակտները բացակայում են:

Նշենք, որ հիմնադրամը ստեղծվեց վարչապետ Կարեն Կարապետյանի հրամանով, որպեսզի հիմնանորոգվի Կումայրի պատմական արգելոցը: Քաղաքի պատմական տարածքի միջուկը սկիզբ է առնում հենց Ռուսթավելի փողոցից: Կումայրի պատմական կենտրոնի զարգացման ծրագրի շրջանակում հիմնանորոգվեց Ռուսթավելի փողոցի մոտ 9000 քմ մակերեսը: Փողոցի երկարությունը կազմում է 740 մետր, լայնությունը՝ 11.5 մետր: Իրականացվել են փողոցի ծածկի վերին շերտի բետոնային աշխատանքեր և տեղադրվել են գրանիտե սալահատակ քարեր, բազալտե եզրաքարեր, իսկ մայթերին՝ բազալտե սալեր:

Ռուսթավելի փողոցի հիմնանորոգման աշխատանքները բավական բարդ էին ինժեներական տեսանկյունից և եզակիներից Հայաստանում: Տարածքի բոլոր կոմունիկացիոն համակարգերը փոխվել են(գազատար, ջրատար խողովակներ, էլեկտրալարեր և այլն): Աշխատանքերների բարդության պատճառով փողոցի շահագործման վերջնաժամկետը մի քանի անգամ փոփոխվեց: Երբ աշխատանքները սկսվեցին, շինարարները չնախատասված խնդիրների բախվեցին, հիմնականում քարիզների հետ կապված: Փողոցի պաշտոնական բացումը տեղի ունեցավ 2017 թ-ի հոկտեմբերին՝ վարչապետի գլխավորությամբ: Նա լրագրողների հետ զրույցում նշեց, որ հիմնանորոգված փողոցն իրեն շատ է դուր եկել, երազանքների փողոց է, պարզապես ֆանտաստիկ է: Կումայրի Վերածնունդ ծրագրի շրջանակում այս տարվա մարտից մեկնարկել են Շիրազի փողոցի վերանորոգման աշխատանքները:

Մեր տեղեկություններով՝ Շիրազի փողոցը չի սալիկապատվելու, այլ կարմիր ասֆալտ է փռվելու: Ուշագրավ է, որ կառավարության որոշմամբ հենց այս երկու ՝ Ռուսթավելի եւ Շիրազի փողոցներում բիզնեսի համար առանձնացվել է 7700 քառ. մետր տարածք:

![](https://scontent-cdt1-1.xx.fbcdn.net/v/t1.0-0/p280x280/29366292_1295651623901309_7734393942908600320_n.jpg?_nc_ad=z-m&_nc_cid=0&oh=10a195f7b6a684b172761e0f6a5a81de&oe=5B2759F0)

![](https://scontent-cdt1-1.xx.fbcdn.net/v/t1.0-0/p280x280/29356414_1295651647234640_6337372460274417664_n.jpg?_nc_cat=0&_nc_ad=z-m&_nc_cid=0&oh=e0abec41c528a371b552dac24c7ba6ec&oe=5B3A0AF2)

![](https://scontent-cdt1-1.xx.fbcdn.net/v/t1.0-0/p280x280/29342856_1295651593901312_4174623669575745536_n.jpg?_nc_cat=0&_nc_ad=z-m&_nc_cid=0&oh=698ab2cb358e2e4e8708d34b05e4f3fa&oe=5B27BE99)

![](https://scontent-cdt1-1.xx.fbcdn.net/v/t1.0-0/p280x280/29340358_1295651720567966_3376728426558783488_n.jpg?_nc_cat=0&_nc_ad=z-m&_nc_cid=0&oh=87d3505811d41e5ab404bf0f97de7ac1&oe=5B3DBC22)

![](https://scontent-cdt1-1.xx.fbcdn.net/v/t1.0-0/p280x280/29314536_1295651663901305_6831738614976610304_n.jpg?_nc_cat=0&_nc_ad=z-m&_nc_cid=0&oh=80ea5082d659bd6eda531a2b05691904&oe=5B2FBE07)