Մեծ սպասում

**ԳՈՎՔ ՋԱՀԵԼ ՕՐԵՐԻ**



Ջահել էինք ու միշտ հարբած –



գինի էինք օդից քամում՝



ընծայելով անցորդ քամուն



սրտիկները մեր դռնբաց։



​



Ջահել էինք մենք ու սիրուն՝



աճած անհոգ անցյալի մեջ.



Չխունացող անցյալի էջ՝



Դու հիշվում ես միշտ ու սիրվում...



​



Ջահել էինք մենք ու սիրուն.



Հագենալ ու հոգնել չկար...



Հիմիկվա այս կյանքը տկար



Հեչ չի ձգում ու չի սիրվում։



​



**ՉԵՄ ՏԵՍՆԻ**



Ես իմ մաշկի մեջ բնավ չեմ մրսում։



Էլ ես իմ մաշկից դուրս չեմ գա արդեն,



որ տեսնեմ՝ ի՞նչ է կատարվում դրսում՝



իմ մաշկից ու իմ պատյանից անդին։



​



Ես իմ պատյանից չեմ սողոսկի դուրս,



որ տեսնեմ՝ ո՞նց է տաքացնում արևն



այն ճամփորդներին՝ ովքեր արդարև



անապաստան ու մերկ են ի վերուստ։



​



**ՍՊԱՍՄԱՆ ՕՐԵՐ**



Մոլորված չենք առաջվա պես։



Մեզ շտկեց այս նոր տարին։



Մենք կսիրենք իրար այնպես,



Ինչպես սիրում ենք օտարին։



​



Հաա՜փ-չիի՜, ահա, այսքան էլ ճիշտ,



վերադառնանք, իրար ներենք,



որ հասկանա օտարն առմիշտ՝



մենք վախից չենք սիրել իրեն։



​



**ՆՐԱ ՀԱՄԱՐ**



Տեր, փնտրել եմ քեզ ամեն տեղ



այս բազմազան օրերի մեջ։



Այս առօրյա շորերի մեջ



Իմ հոգին է մրսում։ Օ, տե՜ր,



այնպես արա, որ ջերմանա



այս ժամկետանց շորերի մեջ...



Այս անհամար օրերի մեջ



մի օր գտիր նրա համար։



​



**ԴԱՐՁ Ի ՇՐՋԱՆՍ ՅՈՒՐ**



Մագլցեցիք վեր ու վեր,



հասաք բախտի գավաթին,



սակայն խորշեց բախտը ձեր



անհավատի հավատից։



​



Բան չմնաց ձեր նսեմ



հավատից ու ձեր օրից։



Ձեզ մնում է սկսել



Նորից – դարձյալ զրոյից։



​



**ՔԻԹ ՉԽՈԹԵԼ**



Մենք՝ անհասցե ու ընկեցիկ,



էլ չենք զորում նոր թափ առնել։



Տարիներով ծամծըմեցինք



դժվարամարս գաղափարներ...



​



Բա՛վ է։ Հոգին չկեղտոտենք



անզոր ու զուր փորձերի մեջ։



Հեռանանք ու քիթ չխոթենք



մեր որդկերանց գործերի մեջ։



​



**ՎԵՐ ՈՒ ՎԵՐ**



Էլ չենք մուրա հաց ու փող



մարդուկներից անհավատ։



Կորցըրել ենք փառք ու հող –



գտել ենք հույս ու հավատ



և չենք իջնի այս կետից –



կմագլցենք վեր ու վեր...



և կխլենք տգետից



իրավունքն ու կյանքը մեր։



​



**ԹԵԹԵՎԱԿԻ ՃՇՏՈՒՄ**



Եթե մենք ենք մեր փնտրած



բարոյական չափանիշն,



ապա երբեք մեր ընտրած



այսօրինակ թափանիվն



արագ ընթացք չի առնի



դեպի առաջ ու առաջ –



մեր փափագած ապառնի



ժամանակին ընդառաջ։



​



**ՀԻՇՈՂՈՒԹՅԱՆ ՓՈՐՁ**



Ես փորձում եմ ողջը հիշել



և փորձում եմ ողջը քննել...



Իսկ դստրիկս ամբողջ գիշեր



Լացել է- չի թողել քնեմ։



​



Այս է ամբողջն ու բոլորը։



Մղձավա՞նջ է, թե՝ ցնծություն։



Հասկանում է, որ իր հորը



սպասում է լուրջ փորձություն։



​



**Արմեն Շեկոյան- բանաստեղծ**



**Լուսանկարը՝ Սամվել Սեւադայի**



**Հրապարակ մշակութային հավելված**