Երկու միլիոն դրամ՝ դահուկ քշելու, ձնեմարդ պատրաստելու համար

Չնայած հանրապետությունում գարնան շնչով տաք ձմեռ է, սակայն առաջիկա օրերին Շիրակի Արթիկ քաղաքում «ձմեռ փարթի» է անցկացվելու: «Արագած» պիոներական ճամբարի հարակից տարածքում փետրվարի 11-ին անցկացվելու է «Տուֆաշխարհի ձմեռ 2018» ամենամյա մարզամշակութային տոնահանդեսը:



Միջոցառման ծրագիրն ընդգրկուն է՝ դահուկավազք, դահուկներով զբոսանք, սահնակներով էստաֆետ, ձնեմարդու պատրաստում, կարատեի, բռնցքամարտի եւ ըմբշամարտի ցուցադրական ելույթներ, զվարճախաղեր եւ այլն: Սպասվում է նաեւ համերգային ծրագիր: Մրցումներում հաղթող անհատներն ու կոլեկտիվները, ինչպես տեղեկանում ենք համայնքապետարանի կայքից, կպարգեւատրվեն Արթիկի քաղաքապետի պատվոգրերով, շնորհակալագրերով եւ հուշանվերներով: Մարդկանց տեղափոխումը կատարվելու է անվճար:



Ուշագրավ է, որ ավանդաբար այդ միջոցառմանը մասնակցում են նաեւ մարզային իշխանության ներկայացուցիչները, հյուրեր են լինում արտերկրից: Դատելով Արթիկի համայնքապետարանի 2018 թ․ ընթացքում նախատեսված գնումների պլանից՝ «Տուֆաշխարհի ձմեռ» միջոցառումը կարժենա մոտ 2 մլն դրամ: 2018-ին նախատեսված է 8 մլն 850 հազար դրամ հատկացնել մշակութային միջոցառումներին: Ըստ այդ պլանի՝ 2 մլն դրամ էլ նախատեսվում է Քաղաքի օրվան նվիրված միջոցառումների համար: Այլ միջոցառումներ էլ կան՝ գնումների պլանով նախատեսված։



Մասնավորապես՝ Հայկական բանակի օրվան նվիրված հյուրասիրության համար՝ 200 հազար, Կանանց միջազգային օրվա համար՝ 300 հազար, Մայրության, գեղեցկության, սիրո օրվա համար` 100 հազար, Հայոց ցեղասպանության միջոցառման` 200 հազար, Հաղթանակի ու խաղաղության տոնի` 250, Երեխաների պաշտպանության միջազգային օրվա համար` 300, Ուսուցչի օրվա համար` 200 հազար, Անկախության օրվա` 600 հազար դրամ եւ այլն: