Ո՞ւմ հաշվին են նվերներ բաժանել Կոտայքի թեմի առաջնորդը եւ Երկրապահ կամավորականների միությունը

Ո՞ւմ հաշվին են նվերներ բաժանել Կոտայքի թեմի առաջնորդը եւ Երկրապահ կամավորականների միությունը
Ամանորից առաջ «Երկրապահ կամավորականների միությունը» եւ Կոտայքի թեմի առաջնորդը գրություններ են ուղարկել համայնքապետարաններ՝ դրամական օգնություն ստանալու համար: Համայնքապետերը չեն մերժել գրությունը եւ բյուջեից որոշակի գումարներ են տրամադրել: Օրինակ՝ Նոր Հաճնի քաղաքապետը 300 հազար դրամ է հատկացրել «Հայաստանյայց Առաքելական սուրբ եկեղեցի Կոտայքի թեմին» կարիքավոր երեխաների աջակցության համար:



Ցանկը կարելի է շարունակել: Կոտայքի թեմի պաշտոնական էջից տեղեկանում ենք, որ Հրազդանի Սբ.Աստվածածին եկեղեցում, Կոտայքի թեմի առաջնորդ Առաքել արք. Քարամյանի օրհնությամբ, ռուսաստանաբնակ եկեղեցանվեր հայրենակիցներ Մուրադ, Մհեր և Մելանյա Գրիգորյանների միջոցներով, Կոտայքի «Երեխաների Աջակցության» հիմնադրամի շուրջ 150 շահառուների բաժանել են ամանորյա նվերներ և Նոր Կտակարաններ:



Կեչառիս վանական համալիրում, Կոտայքի թեմի առաջնորդ Առաքել արք. Քարամյանի օրհնությամբ և կրկին ռուսաստանաբնակ Մելանյա, Մուրադ և Մհեր Գրիգորյանների միջոցներով, Հրազդան քաղաքի թիվ 11 դպրոցի ներառական կրթություն ստացող երեխաների համար ամանորյա նվերներ էին պատրաստել:



Քանի՞ համայնքների ղեկավարների է դիմել եւ որքա՞ն օգնություն է ստացել, եւ ի՞նչ ուղղությամբ են ծախսվել գումարները, հարց ուղղեցինք Կոտայքի թեմի առաջնորդ Առաքել արք. Քարամյանին. «Ես հեռախոսով հարցերին չեմ պատասխանում կարող ենք դեմ առ դեմ հարցազրույց տալ: Ամանորի հետ կապված էր, որ նվերներ բաշխեցինք 11 դպրոցի երեխաներին եւ Կոտայքի «Երեխաների Աջակցության» հիմնադրամի շահառուներին եւ սոցիալապես անապահով ընտանիքներին»:



Փորձեցինք ճշտել՝ որքա՞ն գումար են տրամադրել համայնքների ղեկավարները, Կոտայքի թեմի առաջնորդն անջատեց հեռախոսը եւ մեր զանգերին չպատասխանեց:



**Նելլի Կարապետյան**