Բանակում չեն ծառայել, բայց կոչումներ ու մեդալներ՝ ինչքան ուզես
Բանակում չծառայած, սակայն պետական ապարատում պաշտոն զբաղեցնողների մի աստղաբույլ էլ, պարզվում է, կառավարության տաքուկ անկյուններում է ծվարել: Մասնավորապես՝ ՀՀ կառավարության աշխատակազմի կադրային բանկի ուսումնասիրությունը դա է փաստում՝ զինապարտության մասին տեղեկանքը հիշյալ աշխատակազմի ներկայացուցիչներից ոմանց կենսագրականներում բացակայում է: Թվարկումն սկսենք կառավարության ղեկավարից՝ Կարեն Կարապետյանը բանակում ծառայելու եւ բանակային բորշչի ու սեւ հացի «գարբուշկայի» համը ճաշակելու հնարավորություն չի ունեցել, քանի որ գիտությանն է նվիրվել: Նրա կենսագրականի «Այլ տվյալներ» բաժնում զինապարտ լինելու մասին ոչ մի նշում չկա, փոխարենը նշված է, որ 1989-ին ստացել է տնտեսագիտության թեկնածուի գիտական աստիճան:
Զինապարտության մասին տեղեկանք առկա չէ նաեւ վարչապետի օգնական Հայկ Զոհրաբյանի պարագայում: 26-ամյա այս երիտասարդն ամուսնացած չէ, հետեւապես՝ օրինական ամուսնությունից ծնված երեխաներ չունի, որ այդ հիմքով ծառայություն չանցներ, գիտական աստիճան էլ չունի: Փոխարենը ձեռնարկատիրական գործունեություն է ծավալել՝ 2013 -2014 թթ. եղել է Ա/Ձ Հայկ Զոհրաբյան հիմնադիր տնօրեն, 2016-2017 թթ.՝ Տրանս Գլոբալ ՍՊԸ հիմնադիր տնօրեն: 2017 թ. փետրվարի 28-ից ՀՀ վարչապետի օգնականն է: Վարչապետի հաջորդ ջահել, համակրելի կադրը՝ մամուլի քարտուղար Արամ Արարատյանը, նույնպես բանակային դիսցիպլին չի անցել, մատները զենք կրելով չի կոշտացրել: Նա դեռ 30 տարեկան չկա, 2005-2009թթ. սովորել եւ ավարտել է Ռուս-հայկական (Սլավոնական) համալսարանը, 2010-2012թթ.՝ ԵՊՀ միջազգային հարաբերությունների մագիստրատուրան: 2014-2015թթ. ՀՀ դիվանագիտական դպրոցն է ավարտել, 2016թ. հոկտեմբեր-նոյեմբեր ամիսներին մասնագիտական վերապատրաստման ծրագրով Նիդերլանդների Քլինգենդալի միջազգային հարաբերությունների ինստիտուտն է հաճախել: Բանակից խուսափելու ընտիր տարբերակ: Ծնունդով Իրանից Արմեն Ավակ Ավակյանն էլ՝ վարչապետի հասարակական հիմունքներով խորհրդականը, բարձրագույն կրթությունն ստացել է հայրենիքում՝ 2002-2007 թթ․ ավարտել է Երեւանի պետական տնտեսագիտական համալսարանը, այնուհետ ուսումը շարունակել Հունգարիայում՝ մեկ տարի էլ սովորելով Կենտրոնական եվրոպական համալսարանում: Ավակ Ավակյանը, սակայն, 2007-2008 թթ. «Հայաստան» համահայկական հիմնադրամի գործադիր տնօրենի օգնականն է եղել: ՀՀ վարչապետի հասարակական հիմունքներով մեկ այլ խորհրդական՝ ՀՀԿ-ական Ալեքսանդր Խաչատուրյանը, նույնպես բանակային իր կյանքի ու սխրագործությունների մասին երեխաներին ու թոռներին պատմելիք չունի: Նա գիտական աստիճան չունի, Հայաստանի ֆրանսիական համալսարանն ավարտելուց հետո մեկ տարի՝ 2011-2012թթ., ԱՄՆ Բոստոնի համալսարանի իրավաբանական դպրոցում ֆինանսական եւ բանկային իրավունքի մագիստրատուրայում է ուսանել: Ի դեպ, ՀՀ կառավարության 2008-ի փետրվարի 7-ի N 129-Ա որոշմամբ նրան պարտադիր զինվորական ծառայության զորակոչից մինչեւ 2010 թվականի գարնանային զորակոչը տարկետում է տրվել:
Այսինքն՝ տարկետման ժամկետը լրանալուց հետո է միայն երիտասարդ Խաչատուրյանը մեկնել արտերկիր ուսանելու: Ուշագրավ է, որ նա 2007-2010 թվականներին մի շարք օտարահունչ կազմակերպություններում իրավախորհրդատվական պաշտոններ է զբաղեցրել: ՀՀ զինված ուժերում ծառայություն չի անցել նաեւ Քաղաքացիական ավիացիայի գլխավոր վարչության պետ Սերգեյ Ավետիսյանը: Նա 2004-2007 թթ. սովորել եւ ավարտել է ՀՀ ֆինանսների նախարարության տնտեսական հետազոտությունների ինստիտուտի ասպիրանտուրան, տնտեսագիտության թեկնածու է եւ բացի այդ՝ արտասահմանյան բուհերում մասնագիտական որակները կատարելագործելուն է լծվել: Ավետիսյանը կապի եւ տրանսպորտի նախարարի տեղակալ Արտաշես Ավետիսյանի որդին է: Քանի որ Ավակ Ավակյանի կենսագրականում հիշատակվեց նրա՝ «Հայաստան» համահայկական հիմնադրամի գործադիր տնօրենի օգնական լինելը, ուսումնասիրեցինք նաեւ հիշյալ հիմնադրամի գործադիր տնօրեն Արա Վարդանյանի կենսագրությունը: 40-ամյա Վարդանյանի կենսագրականում այնքան շատ նշումներ կան արտերկրի ուսումնական ծրագրերին նրա մասնակցության մասին, որ գլխապտույտ ունեցանք: Նա 2003-ին չորս տարբեր երկրներում տարբեր ուսումնական ծրագրերի է մասնակցել: Սակայն այդ ծրագրերը գիտական թեզի նյութ, փաստորեն, չեն դարձել: Վարդանյանը հիմնադրամում է 2004 թվականից: Ի դեպ, ԼՂՀ նախագահի կողմից 2015-ին պարգեւատրվել է «Վաչագան Բարեպաշտ» մեդալով:
Բանակում չծառայածներին հայտնաբերելու մեր պեղումները մի պահ կանգ առան նաեւ ՀՀ նախագահի աշխատակազմում: Մասնավորապես, մեզ հետաքրքրում էր նախագահի մամուլի խոսնակ Վլադիմիր Հակոբյանի կենսագրականում զինապարտության մասին տեղեկանքը: Քանի որ նախագահի աշխատակազմի պաշտոնական կայքում չգտանք նրա կենսագրականը, փնտրեցինք Վիկիպեդիայում: Ըստ այս կայքի՝ Վլադիմիր Հակոբյանը 2003-2005 թթ. ծառայել է ՀՀ զինված ուժերում՝ որպես համակարգչային կապի կենտրոնի տեխնիկ-օպերատոր։
Հեղինե ՄԱՆՈՒԿՅԱՆ
Կարծիքներ