Ինձ ո՞վ կարող է չեզոքացնել

"Ժառանգության" հիմնադիր Րաֆֆի Հովհաննիսյանը ոչ վաղ անցյալում խոստացավ, որ "Ժառանգության" արտահերթ համագումարը ջրբաժան է լինելու. կարելի է եզրակացնել, որ ջրբաժանը հենց վարչության նախկին անդամներին նորերով փոխարինելն էր: Վարչության նորընտիր անդամներն անծանոթ են հանրությանը, եթե չհաշվենք նախկին դաշնակցական, Սանկտ Պետերբուրգում ՀՀ նախկին հյուպատոս Ռուբեն Հակոբյանին ու սոցապ նախկին փոխնախարար Կարինե Հակոբյանին: "Ժառանգության" խորհրդարանական խմբակցությունն այլեւս վարչության անդամ չէ, բացառությամբ խմբակցության ղեկավար Ստյոպա Սաֆարյանի: Այսինքն՝ "Ժառանգության" խորհրդարանական հատվածը դե յուրե այլեւս դերակատար չէ կուսակցության ղեկավարման հարցում: Երեկ զրուցեցինք ԱԺ-ում "Ժառանգություն" խմբակցության անդամ Զարուհի Փոստանջյանի հետ:



- Տիկին Փոստանջյան, Րաֆֆի Հովհաննիսյանը խոսեց ընդդիմության միասնական թեկնածուի մասին, նաեւ ասաց, թե ցանկալի կլինի, որ այդ թեկնածուն կին լինի: Հնարավո՞ր է Ձեզ նկատի ուներ:



- Ես նման բան չեմ լսել: Իհարկե, ես կարծում եմ, որ տղամարդ կլինի, եւ այդ անձն էլ մեր կողքին է կանգնած:



- Րաֆֆի Հովհաննիսյա՞նն է:



- Իմ կարծիքով՝ այո: Եթե լինի միասնական թեկնածու, ապա այդ միասնական թեկնածուն պետք է լինի պարոն Հովհաննիսյանը:



- Իսկ "Ժառանգության" վարչության կազմից դուրս մնացածները դժգոհ չե՞ն այսօր:



- Կարծում եմ, փոփոխությունը ճիշտ էր, հենց այդպես էլ պետք է լիներ, որ ճահճացում չլիներ: Եթե հաշվի առնենք, որ վարչությունը նաեւ սխալներ էր թույլ տվել, ապա այդ վարչության կազմը, իհարկե, պետք է փոխվեր: Ու շատ լավ է, որ նոր մարդիկ են ընդգրկված, նոր լիցքեր, նոր եռանդ, նոր ուժ: Ես ողջունում եմ, որ վարչության կազմը փոխվել է, եւ գտնում եմ, որ հենց ռոտացիոն սկզբունքի եւ այս փոփոխությունների շնորհիվ է, որ մենք գնալու ենք ավելի առաջ, ավելի ուժեղացած ենք լինելու եւ իրականացնելու այն ծրագիրը, որը մեր առջեւ դրված է՝ մեր երկրում ժողովրդավարության հաստատումը:



- Բայց փաստորեն դե յուրե Դուք այլեւս կուսակցության ներսում որեւէ բան չեք կարող փոխել:



- Ես ինքս վարչության անդամ երբեւիցե չեմ եղել, բայց ոչ մի անգամ կաշկանդված չեմ եղել արտահայտել իմ կարծիքը եւ իրականացնել կուսակցության ծրագիրը: Պետք է հաշվի առնել, որ նախորդ վարչությունը շատ դժվար ժամանակահատվածում է աշխատել՝ մարտի 1 եւ այլն: Ես ինքս համագումարում վարչության աշխատանքը գնահատեցի բավարար՝ անկախ նրանից, որ կային որոշումներ, որոնց հետ ես համաձայն չեմ եղել եւ գտել եմ, որ այդ որոշումներն այդպես չպետք է կայացվեին: Բավարար եմ գնահատել, հաշվի առնելով, որ ներկա վարչությունը, չնայած սխալներին, կանգնած է եղել ժողովրդի կողքին եւ "Ժառանգության" ծրագրի շրջանակներում է գործել:



- Ասել է թե սա "Ժառանգությունում" առավել ընդդիմադիր վարքագծով աչքի ընկած  հատվածին չեզոքացնելու փորձ չէ՞ր:



- Ինձ ո՞վ կարող է չեզոքացնել: Մեր կուսակցությունում բոլորը նույն գաղափարախոսության կրողն են: Մենք ուժեղ ենք, երբ միասնական ենք: Ավելի կամ պակաս չկա: Վարչության կազմում ընդգրկված են պայծառ, եռանդուն երիտասարդներ, եւ մենք սպասում ենք, որ իրենք իրենց պետք է շատ լավ դրսեւորեն:



- Իսկ սա նշանակո՞ւմ է, որ "Ժառանգությունը" նոր դեմքերով է ներկայանալու խորհրդարանական ընտրություններին:



- Մենք խորհրդարանական ընտրությունների նախաշեմին չենք, սակայն, իհարկե, ցուցակը պետք է լինի ավելի վառ դեմքերով համալրված եւ ավելի երիտասարդացած: Կարծում եմ էդպիսին կլինի կուսակցության թեկնածուների նոր խումբը:



- Վերջերս տեղեկություն եղավ, որ իշխանությունն իր դրածոներին է փորձելու ներմուծել "Ժառանգության" ղեկավար մարմին: Նորընտիր փոխնախագահ Ռուբեն Հակոբյանն արդեն հայտարարել է, թե պետք է համագործակցել նաեւ իշխանության հետ: Այս առթիվ ի՞նչ կասեք:



- Ես չգիտեմ ինչ համատեքստում է պարոն Հակոբյանն ասել, որ պետք է համագործակցություն տեղի ունենա: Ես կարող եմ ասել, որ 2 տարի առաջվա ընդդիմութան միասնական թեկնածու Լեւոն Տեր-Պետրոսյանը հայտարարեց, որ հնարավոր է իշխանության հետ կոալիցիա կազմի այն հարցերի շուրջ, որոնք մեր արտաքին մարտահրավերներին են վերաբերում: Հավանաբար Հակոբյանն էլ է այդ համատեքստում ասել, ես չգիտեմ: Եթե կլինի հայ-թուրքական արձանագրությունների հետկանչում, մենք դա իհարկե կողջունենք: Եթե լինի համագործակցություն, որ այնպիսի օրենք ընդունենք, որ հնարավորություն տրվի վերաբացել "Ա1+"-ը, ընտրական օրենսդրության բարեփոխումներ լինեն, համագործակցություն, օրինակ, քաղբանտարկյալներին ազատ արձակելու, գնահատական տալու այդ իրողությանը, եւ փոխհատուցում տրամադրվի այդ անձանց, ես կարծում եմ համագործակցություն հնարավոր է այս շրջանակներում: Կարծում եմ այլ շրջանակ գոյություն չունի: Ես գտնում եմ, որ մենք այսօրվա դրությամբ չունենք օրինական ընտրված նախագահ, ով կարող է ՀՀ անունից հանդես գալ: Մենք այդպիսի իշխանության կրող չունենք: Ես չգիտեմ ում է ի նկատի ունեցել պարոն Հակոբյանը: Հավանաբար վերոնշյալ կոնտեքստում է ասել:



- Իսկ պատգամավորական խմբակցության շրջանում ինչպե՞ս է ընկալվել այդ հայտարարությունը:



- Կարող եմ ասել՝ վարչության նոր անդամների նկատմամբ կա վստահություն, նրանք հմուտ են կուսակցական գործունեության մեջ: Եթե վստահություն չլիներ, հնարավոր է այդ կազմով չընտրվեին:



- Այսինքն իշխանության "ականների" ներդրման հետ կապված մտավախություն չունե՞ք:



- Ակնհայտ է, որ այս իշխանությունն արդեն պատրաստվում է եկող ընտրություններին՝ կլինեն դրանք արտահերթ թե հերթական, եւ կցանկանա թուլացնել այնպիսի կուսակցություն, ինչպիսին "Ժառանգությունն" է, որ չունենա մրցակից: Կարծում եմ մենք բավական ուժեղ ենք: Բոլոր մարտահրավերներին, այդ թվում նաեւ իշխանության նման փորձերին ի պատասխան, մենք ունենք մեր պաշտպանական մեխանիզմները:



- Իսկ ինչպե՞ս եք գնահատում այն, որ վարչության նոր կազմը հիմնովին փոխվեց ու ընտրվեց հանրությանն անծանոթ կազմ:



- Հանրությանը մենք էլ ծանոթ չէինք: Հանրության մեջ մեզանից միայն ճանաչում ունեին Րաֆֆի Հովհաննիսյանը եւ Լարիսա Ալավերդյանը: Նրանք էին հանրային դեմքեր: Կարող եմ ասել, որ մենք Րաֆֆի Հովհաննիսյանի հեղինակության շնորհիվ ենք ԱԺ մտել: