"Միս լողափ" մրցույթ քաղքապետարանի հովանավորությամբ

2006 թվականից մինչ այժմ "Դը բեսթ" պրոդյուսերական կազմակերպությունն ամեն տարի իրականացնում է "Միսս լողափ" մրցույթը: Այս մրցույթն ամեն տարի կազմակերպվում էր Սեւանում, իսկ այս տարի պատրաստվում է կազմակերպել "Նաիրի տուր" տուրիստական ընկերությունը, բայց ոչ թե Սեւանում, այլ Ազովի ծովի ափին: Օգոստոսի 9-17-ը ընկերությունը պատրաստվում է Կրասնոդարի Եյսկ քաղաքում անցկացնել լողափ-փարթի-շոու ծրագիրը՝ մասնակցությամբ Հայաստանից եւ Կրասնոդարից ընտրված մոտ 20 գեղեցկուհիների: Ծրագրին մասնակցում են նաեւ երգիչ-երգչուհիներ հայկական շոու-բիզնեսից՝ Լիլուն, Արսեն Սաֆարյանը, Լիանան, Ջուսը եւ ուրիշներ: Շոուն վարելու են Սամվել Գրիգորյանը եւ Լյուդմիլա Թաթարեւան՝ Ռուսաստանից:



Սպասվում է հաճելի ու հետաքրքիր 4-օրյա համերգային միջոցառում, իսկ վերջին 2 օրը տեղի կունենա մրցանակաբաշխություն "Միսս լողափ", "Միսս նրբագեղություն" եւ "Միսս տուրիզմ" անվանակարգերում: "Նաիրի տուրը", որն ընդամենը մի քանի ամիս առաջ է ստեղծվել, այս ծրագրի շրջանակներում կազմակերպում է նաեւ բավական մատչելի տուր համերգին մասնակցել ցանկացողների համար ավտոբուսով նրանք 18 ժամում կհասնեն Եյսկ. "Մենք, թող մեծամտություն չթվա, բայց մեզ համարում ենք Թուրքիային կոնկուրենտ, որպեսզի մեր հանգստացողներն այլընտրանք ունենան, հանգստանան մեր եղբայրական պետություններում, ասենք՝ Ռուսաստանում: Այսպիսի ծրագրերը նպաստում են նաեւ մշակութային եւ բարեկամական կապերի հաստատմանն ու ամրապնդմանը",- ասում է ընկերության տնօրեն Նաիրի Մնացականյանը: Ծրագրին աջակցում են Կրասնոդարի հայ համայնքի նախագահը, Եյսկի քաղաքապետը եւ Երեւանի քաղաքապետարանը: