Ամառն ու "մերոնց" հանգիստը

Արցախում կրկին շոգ օրեր են։ Կոսովոյի վերաբերյալ Հաագայի միջազգային դատարանի հայտնի որոշումից հետո, երբ Արցախի քաղաքական դաշտը կարծես թե արթնացավ տեւական քնից ու երկրի նախագահի բերանով ասաց, որ "ԼՂՀ վերջնական կարգավիճակը չի դիտարկում նախկին ԼՂԻՄ-ի սահմաններում", կրկին խոր քուն է մտել։ Եվ այս անգամ, կարծում ենք, քնելու համար բավականին հիմնավոր պատճառ ունի՝ սարսափելի շոգ է, ձուն դնես բաց պատշգամբին, ձվածեղ կդառնա։ Այս պայմաններում, երբ հրշեջ ավտոմեքենաները սուլելով պարբերաբար սուրում են բոլոր ուղղություններով, նույնիսկ սարսափելի է մտածել, թե ինչ կկատարվի, եթե, Աստված չանի, այսպիսի շոգին հայ չինովնիկը 10 րոպեով դուրս գա պաշտոնական թանկարժեք մեքենայից կամ, դարձյալ Աստված մի արասցե, հանկարծ փորձի մտածել երկրի կամ ժողովրդի մասին։



Արցախի կառավարությունում, եթե դատելու լինենք վերջինիս պաշտոնական կայքից, վերջին անգամ կենդանության նշաններ են երեւացել օգոստոսի 2-ին, երբ ԼՂՀ վարչապետ Արա Հարությունյանի ստորագրած որոշմամբ Արմեն Մկրտչյանը նշանակվել է ԼՂՀ քաղաքաշինության նախարարի տեղակալ: Արցախի նախագահի ամառային առօրյան ավելի հագեցած է եղել՝ օգոստոսի 4-ին Տիգրան Կարապետիչի հետ "ներհայկական կապերն" ամրապնդելուց հետո հաջորդ օրն անմիջապես հրամանագիր է ստորագրել ԼՂՀ կենտրոնական ընտրական հանձնաժողովի կազմը սահմանելու վերաբերյալ։



Այդ հանձնաժողովի կազմում են Արցախի նախագահի 3 ներկայացուցիչ, 2-ական ներկայացուցիչներ էլ "Ազատ հայրենիք", ՀՅԴ կուսակցություններից ու Արցախի ժողովրդավարական կուսակցությունից։ Բարեբախտաբար, Ղարաբաղում ընդդիմություն չկա, բոլոր քաղաքական ուժերը "մերոնք" են, ուստի հարկ չկար չեղած բանից մարդիկ ընդգրկել նորընտիր հանձնաժողովի կազմում։ Մոտակա տարիներին ինչ ընտրություններ էլ լինեն, Արցախում մշտապես "մերոնք" են ընտրվելու, իսկ դա նշանակում է, որ առնվազն մոտակա հնգամյակում երկրի ապագան հուսալի ձեռքերում է լինելու։



Իսկ հիմա Արցախում շոգ ամառ է. "մերոնք" հանգստանում են։



Արեգ ՎԱՐԴԱՆՅԱՆ