Ազատ հրապարակ չունի Ռուսաստանի համար

Գյումրիի քաղաքապետ Վարդան Ղուկասյանը "շատ լավ" է գնահատում Գյումրիում գտնվող ռուսական ռազմաբազայի ժամկետի երկարացման պայմանագիրը ու ցավով է նշում, որ Գյումրիում "ազատ հրապարակ չկա", որ ի պատիվ Ռուսաստանի՝ ռուսական մի կայսեր անունով կոչի: Հիշեցնենք, որ անցյալ տարի Վարդան Ղուկասյանը Գյումրիի գլխավոր հրապարակը վերանվանեց Վարդանանց հրապարակ՝ որոշ դժգոհներին ի պատասխան հայտարարելով, թե դա իր անվան հետ կապ չունի՝ գյումրեցիները մասնակցել են Վարդանանց պատերազմին:



- Պարոն Ղուկասյան, ասվում է, որ Գյումրիում գտնվող ռուսական ռազմաբազայի ժամկետի երկարացման պայմանագիրը վտանգում է մեր անկախությունը: Դուք ինչպե՞ս եք գնահատում դա:



- Իսկ ինչո՞ւ է վտանգում մեր անկախությանը: Ի՞նչ է անում որ: Նաբառոտ՝ մեր անկախությունը պահպանում է, որովհետեւ հսկայական դարավոր մեր թշնամիների կողքը խնդիրների առաջ ենք մենք կանգնած: Ես չգիտեմ հետագայում ինչ կլինի: Այո, մեր պետականությունը ավելի շատ պահպանվում է ռուսների հետ բարեկամությամբ, քան որեւիցե այլ պետությունների հետ: Եվ մեր անկախությունը ավելի ամրապնդվում է, ոչ թե վտանգվում է: Որովհետեւ մեր նախնիները՝ Իսրայել Օրիից սկսած, Անդրանիկ զորավարից վերջացրած, բոլոր մեր մեծերը մեր հետագան կապել են Ռուսաստանի հետ:



- Այսինքն մենք է՞լ մեր ապագան պետք է կապենք Ռուսաստանի հետ:



- Եթե մենք նմանատիպ հարեւաններ ունենք, միանշանակ պետք է կապենք: Դա իմ կարծիքն է եւ գյումրեցիներից շատերի:



- Իսկ խոսե՞լ եք գյումրեցիների հետ, իրենք ուզո՞ւմ են, որ զորամասը մնա էդտեղ:



- Շա՜տ: Իսկ ինչի՞ որ ոչ: Իսկ մեզ ինչո՞վ են վնասում էդ մարդիկ: Բացի օգուտից վնաս չենք տեսել: ...Եթե Դուք էլ ընտրվեիք ժողովրդի կողմից, շփվեիք գիշեր-ցերեկ, կզգայիք՝ դրական է, թե բացասական է էդ կարծիքը:



- Այսինքն ինքներս մեզ պաշտպանել չե՞նք կարող:



- Չէ: Մենք մեզ պետք է պաշտպանենք կյանքում, էդպես է կյանքը, օրենքը, ես չգիտեմ ինչը, բայց ասենք հիմա բարեկամություն անելը չի վնասում մեզ:



-  Խոսեցիք օգուտի մասին, հնարավո՞ր է ռուսական ռազմաբազայի հետ որոշակի գործարար համագործակցություն ունեք:



- Ես իրենց հետ գործարար համագործակցություն չունեմ, բայց վատ չէր լինի, որ, օրինակ, նաեւ գործարար կապերը ավելի լավ լիներ Գյումրիի եւ մնացած քաղաքների, ռուսական մեծ քաղաքների հետ կապ լիներ: Ես վատ չէի գնահատի:



- Պարոն Ղուկասյան, անցյալ տարի Դուք Գյումրիի գլխավոր հրապարակը վերանվանեցիք Վարդանանց հրապարակ՝ ասացիք, որ դա Ձեր անվան հետ կապ չունի, գյումրեցիները մասնակցել են Վարդանանց պատերազմին: Հնարավո՞ր է մի հրապարակ էլ Ռուսաստանի պատվին վերանվանեք, օրինակ՝ ռուսական կայսրերից մեկի անունով:



- Ճիշտն ասած՝ հիմա նմանատիպ ազատ հրապարակ չկա կամ նոր հրապարակ կառուցելու էդպիսի ինչ-որ բան չկա: Բայց որ պետք է 1804 թ.-ին ռուսների հետ մեր տարած հաղթանակի պատվին "Առկա պաբեդի" նմանատիպ բան սարքվի քաղաքում, օրինակ ես ցանկություն կունենայի նմանատիպ բան անելու, որովհետեւ 1804 թվին ռուսական զորքը եւ տեղի աշխարհազորայինը հաղթել է պարսիկների եւ թուրքերի միացյալ բանակը, եւ դրա համար պետք է քաղաքում նմանատիպ հուշարձան կառուցվեր:



- Պարոն Ղուկասյան, այսօր ինչպիսի՞ն են Ձեր հարաբերությունները մարզպետ Աշոտ Գիզիրյանի հետ:



- Ինքը՝ որպես մարզպետ, ես՝ որպես քաղաքապետ, ամեն մեկն իր աշխատանքի բնույթում պահում է օրենքով, Սահմանադրությամբ լիազորված պարտականությունները: Բացի դրանից էլ, նորմալ ենք մենք իրար հետ:



- Իսկ կուսակցության գործերին չի՞ խառնվում պարոն Գիզիրյանը: Հանրապետականի համար, օրինակ, ի՞նչ է անում պարոն Գիզիրյանը:



- Նմանատիպ հարցերը Դուք կտաք իրեն: Ինքը անկուսակցական է: Ամեն ինչ նորմալ է, նորմալ հիմքերի վրա: Յուրաքանչյուր քաղաքապետ ու մարզպետ կուզենա, որ իրանց մեջ բարի դրացիական հարաբերություններ լինեն:



- Որպես Շիրակի մարզում ՀՀԿ կառույցի ղեկավարի եմ հարցնում՝ Հանրապետականն ի՞նչ է անում այսօր Շիրակում:



- Հանրապետականը շատ մեծ գործունեություն է անում: Հիմա էս պահին ես չեմ կարող թվարկել, թե ինչքան գործողություն ենք ծավալում: Առաջիկայում բժիշկներ պետք է գան Շիրակի մարզ, տարբեր ոլորտների, պետք է անվճար բժշկական ծառայությամբ օգնեն մարզի բնակիչներին, երեխաների ուսման վարձերի հետ կապված շատ մեծ օգուտ է տալիս ՀՀԿ-ն: Եվ քաղաքաշինության, եւ մշակութային, եւ սոցիալական, եւ բարեգործական, եւ հոգեւոր` բոլոր տեղերում առաջխաղացում կա:



- Իսկ "Գլենդել Հիլզի" բնակարանաշինության ու փլուզումների հետ կապված ի՞նչ կասեք:



- Հիմա էնտեղ ծեփոնը եթե թափվել է, հասկանո՞ւմ եք՝ սվաղ է թափվել, նշանակում է շինարարությունը անորա՞կ է: Պահի տակ կլինի նմանատիպ բաներ, որովհետեւ եթե մարդը շինարարություն է անում, իր սեփական տանն էլ որ անում է, դա պարտադիր իր տեղը պետք է առնի: Նմանատիպ բաներ կլինի: Եվ ինչ-որ աղմուկ աշխարհին չի կարելի ներկայացնել: