Ուզում եք մի օրում հոդված գրե՞ք

Ամառվա այս տապին գրեթե հնարավոր չէ խուսափել սննդային թունավորումներից, հատկապես երբ շատ մթերքներ, միրգն ու բանջարեղենը վաճառվում են հենց փողոցում: Մայթեզրին, արեւի տակ, առանց ծածկելու վաճառում են պանիր, թխվածքաբլիթներ, կարկանդակներ, որոնք Աստված գիտի ինչից են պատրաստված: Նման դեպքում թունավորումներից խուսափել, պարզ է, որ հնարավոր չէ: Վերջերս շատ են նաեւ ջրից թունավորման դեպքերը: Մեր տեղեկություններով՝ օրերս գրանցվել են հատկապես ձմերուկից եւ պաղպաղակից թունավորման դեպքեր, եւ մեծ թվով մարդիկ տեղափոխվել են "Նորք" ինֆեկցիոն հիվանդանոց: Այնպես, որ անգամ միջանցքներում են հիվանդներին տեղավորել: Մենք այցելեցինք հիվանդանոց՝ պարզելու, թե որքանով է հավաստի այդ ինֆորմացիան եւ ընդհանրապես՝ կա՞ համաճարակային հիվանդությունների սրացում, թե՞ ոչ:



Ինֆեկցիոն հիվանդանոցի բակում նախ ստիպված էինք հաղթահարել բակում վխտացող շների արգելքը: Մեկի ոտքն էլ կոտրված էր ու հազիվ քարշ գալով մի կերպ շարժվում էր հիվանդանոցի բակում: ՀՀ գլխավոր համաճարակաբան Արա Ասոյանը, պարզվեց, խիստ զբաղված է: Մեկ ժամից ավելի սպասելուց հետո գլխավոր համաճարակաբանը եկավ եւ ընդունեց մեզ: Սակայն հենց առաջին հարցից պարոն Ասոյանը, չգիտես ինչու, դարձավ ագրեսիվ: Նախ արգելեց ձայնագրել ու խորհուրդ տվեց բանավոր հիշել իր ասածները: Մեզ հետաքրքրում էր, թե վերջերս եղե՞լ են թունավորումների դեպքեր, հատկապես ձմերուկից կամ պաղպաղակից, եւ այդ ելքով հիվանդներ տեղափոխվե՞լ են հիվանդանոց: Շատ կարճ պատասխան հնչեց. "Մասսայական թունավորումների դեպքեր չեն եղել":



Իսկ երբ հարցրինք ընդհանուր համաճարակային վիճակի մասին, ասաց. "Որեւէ վարակիչ հիվանդության բռնկում չկա Հայաստանում": Ի դեպ, նշենք, որ երբ բակում սպասում էինք գլխավոր համաճարակաբանին, զրուցեցինք մի քանի կանանց հետ, որոնք հիվանդներ ունեին պառկած: Նրանցից մեկն ասաց. "Այնքան շատ մարդ կա հիվանդանոցում, որ մի մահճակալին 2 հոգի են պառկացրել: Շատը երեխաներ են: Մի տնից 2 կամ 3 հոգի պառկած են, իսկ հիվանդանոցում սկի պայմաններ էլ չկան: Սանհանգույցը ընդհանուր ա, ջուր չկա, կեղտոտ ամանները համարյա ամբողջ օրը այդպես դրված մնում են":



Դժգոհող կինը հիվանդանոցում խնամում էր 2 երեխայի: Երեխաները հիվանդանոց էին տեղափոխվել բարձր ջերմության պատճառով, բայց ընթացքում նոր հիվանդություն էր սրվել երեխաներից մեկի մոտ. "Քանի օր ա արդեն մի նորմալ բան չեն ասում, չեն ասում ինչից ա, ինչն ա պատճառը: Երեխան ջերմություն ուներ, հիմա էլ լուծ ա սկսել մոտը: Նույնիսկ տնից ջրի անալիզ են վերցրել, բայց չեն ասում՝ ջրից ա, թե չէ: Ասում են ամեն ինչ նորմալ ա": Երբ փորձեցինք մտնել հիվանդանոց՝ հիվանդների հետ զրուցելու, Ասոյանն իրեն բնորոշ "քաղաքավարությամբ" ասաց. "Թույլ չեմ տա:



Չես կարող հիվանդներին տեսնել, որովհետեւ վարակիչ հիվանդությունների մասին ինֆորմացիան համարվում է պետական, ռազմավարական գործընթաց: Ես թույլ չեմ տա ոչ մասնագետին որեւէ մեկի հետ խոսել, որովհետեւ Դուք ոչ կոմպետենտ եք ու կարող եք սխալ ինֆորմացիա տալ: Դուք կզրուցեք հիվանդների հետ, կտպեք եւ խուճապ կառաջացնեք մարդկանց մեջ": Նման պատասխանը թույլ է տալիս ենթադրել, որ մեզ հետ զրուցած կնոջ ասածները լիովին համապատասխանում են իրականությանը: Եթե հիվանդանոցի ու հիվանդների վիճակն այնպիսին է, ինչպես նկարագրում էր հիվանդապահ կինը, ապա համաճարակաբանը թաքցնելու բան ուներ:



Պարզվեց՝ համաճարակաբանը նաեւ լավ խորհրդատու է: Մեզ ասաց, որ այս թեմայով նյութ գրելուց առաջ պետք է ամիսներով գրադարանում նստենք ու կարդանք: "Ես սովորել եմ 20 տարի եւ 30 տարի աշխատում եմ այս ոլորտում, իսկ Դուք ուզում եք մի օրում դրա մասին հոդվա՞ծ գրեք: Դա սխալ է, անգրագետ եւ տգետ",- դատողություններ արեց համաճարակաբանը: Փորձեցինք մի հարց էլ տալ, ինչից Արա Ասոյանը կատաղեց ու մեզ դուրս հրավիրեց իր սենյակից: Ի դեպ, վերջում էլ սպառնաց, որ սխալ բաներ գրելու դեպքում մեզ դատի կտա: