Հարգելի պարոն Քուշկյան (բաց նամակ)

Ձեզ եմ դիմում՝ ակնկալելով Ձեր անաչառ վերաբերմունքը Հայաստանի առոողջապահության ոլորտում անօրինականությունները կանխելու հարցում: Ձեզ է դիմում 74-ամյա 2-րդ կարգի հաշմանդամ Միքայել Աթալյանը: Բնակվում եմ Ն. Չարբախի 8-րդ փ. 19/1 տանը: Ես 2002 թ. ինֆարկտ եմ տարել, բուժվել եմ «Էրեբունի» հիվանդանոցում, եղել եմ բժիշկների մշտական հսկողության տակ: 2006թ. առավոտյան վատ զգացի, շտապօգնության աշխատակիցներն ինձ դարձյալ տեղափոխեցին «Էրեբունի» հիվանդանոց: Ստուգելուց հետո ինձ հետեւյալ պատասխանը տվեցին. «Եթե ուզում ես պառկել, 80 հազար դրամ մուծի-պառկի»: Չհամաձայնեցի, որովհետեւ ես 2-րդ կարգի հաշմանդամ եմ, եւ, հետեւաբար, իմ բուժումը պետք է անվճար լինի:



Մինչ այդ բուժվել եմ «լեչ կոմիսիայի» (ներկայիս «Նաիրի» բժշկական կենտրոն) հիվանդանոցում: Պրոֆեսոր Բակունցն ասաց, որ պիտի վիրահատվես: Եթե չես կարողանում տեղավորվել, պիտի տարին մեկ կամ երկու անգամ պառկես ֆիզիոթերապեւտիկ հիվանդանոցում, որ կարողանաս ցավերին դիմանալ: Մի անգամ պառկել եմ 14 օրով, դուրս գրվելուց ինձ հերթագրեցին, որ կկանչեն, բայց…



Դարձյալ գնացի, որ պառկեմ, ասացին, որ գնամ փողը մուծեմ, որպեսզի պառկեցնեն: Գնացի գլխավորի մոտ, ասացի, որ ես 2-րդ կարգի հաշմանդամ եմ, փող չունեմ: Պատասխանը հետեւյալն էր. «Կմուծես՝ կպառկես, չունես՝ դուրս արի-գնա: Ես ղարաբաղցի եմ, իմ հիվանդանոցն ա, գնա ում ուզում ես բողոքի»: 2010թ. պառկել եմ «Հանրապետական» հիվանդանոցում, ուռոլոգիայի բաժնում: 2010 թ. փետրվարին վիրահատվեցի՝ շագանակագեղձի ՏՈւՌ: Մեջբերում եմ կատարում դուրսգրման էպիկրիզից, որը կցում եմ իմ նամակին. «Կատարված բուժումը. 09.02.10թ. ողնուղեղային անզգայացմամբ կատարվել է շագանակագեղձի ՏՈւՌ: Վիրահատությունը հարթ է ընթացել, հետվիրահատական շրջանում հիվանդի մոտ զարգացել է աջակողմյան օրխիտ, ինչի կապակցությամբ 16.02.10թ. տեղային անզգայացմամբ կատարվել է օրխեկտոմիա աջից: Հիվանդը դուրս է գրվում կլինիկայից  լավացմամբ»:



8 ամիս է, ինչ գտնվում եմ իրենց հսկողության տակ, ոչ մի անվճար դեղերից չեմ օգտվում, ստանում եմ 28 հազար դրամ թոշակ, որն ամբողջությամբ ծախսում եմ դեղերի գնման վրա, բայց արդյունքի չեմ հասնում, ցավերը չեն մեղմանում, եւ արդեն երեք անգամ նույն վիրահատական գործընթացը կրկնել են: Դիմում եմ գլխավորին եւ ստանում եմ հետեւյալ պատասխանը. «Եթե նույնիսկ չորրորդ անգամ վիրահատվես, արդյունքը չեն երաշխավորում»:



Հարգելի պարոն Քուշկյան, իմ խնդրանքը հետեւյալն է՝ ես կրկնակի պետպատվեր եմ ներկայացրել եւ գումարած հավելյալ ծախսերը, ու 8 ամսվա քաշքշուկ: Խնդրում եմ Ձեզ, որ Ձեր միջամտությամբ ետ վերադարձվի իմ ծախսած գումարը, որպեսզի ես կարողանամ այդ գումարով նորից վիրահատության գնալ, բայց ոչ իրենց մոտ…



Կանխավ շնորհակալություն եմ հայտնում: