Ճոպանուղու բացումը միայն «վերնախավի» համար է

Հոկտեմբերի 16-ին կայանալու է Տաթեւ-Հալիձոր ճոպանուղու բացման արարողությունը: Այն աշխարհի ամենաերկար ճոպանուղին է լինելու՝ 5,7 կմ երկարությամբ: Պարզվում է՝ այն ձգում է մինչեւ Գինեսի ռեկորդների գիրքը, ինչի ուղղությամբ արդեն բանակցություններ են տարվում: Բա բացման արարողությունը: Պակաս ճոխությամբ չեն պատրաստվում նաեւ այս միջոցառմանը: Թվում է, թե այս մասով էլ են հավակնում գրանցվել ռեկորդների գրքում: Հատկապես հատուկ բծախնդրությամբ են կազմել բացման արարողության մասնակիցների ցուցակը՝ զգալի տեղ հատկացնելով օտարերկրացի բարձրաստիճաններին:



Հրավիրվածների թվում են Թաթարստանի Հանրապետության վարչապետը, Սամարայի նահանգապետը, Իտալիայի դեսպանը Ռուսաստանի Դաշնությունում, մի խումբ «Տրոյկա դիալոգ» ընկերությունից՝ նախագահի գլխավորությամբ, մի շարք արտասահմանյան կազմակերպությունների ղեկավարներ ու հիմնադիրներ, գրողներ, ռեժիսորներ ու աշխարհահռչակ ճարտարապետներ, հայզագի հայտնի ու անհայտ գործարարներ ու բարերարներ: Հրավիրվածների թվում է նաեւ Կոնստանտին Օրբելյանը, հայտնի պրոդյուսեր Ռուբեն Դիշդիշյանը, ռեժիսոր Տիգրան Քյոսայանը:



Բնական է, որ այս ներկայանալի անձանց կողքին «ամոթալի» կլիներ, որ տեղի բնակչությանն էլ թույլ տային մասնակցել արարողությանը: Շարքային քաղաքացիներին ուղղակի խորհուրդ են տվել հեռուստացույցով դիտել արարողությունը եւ ոտի տակ չընկնել: Եվ միայն զգուշացնելով չեն սահմանափակվել, ուղեփակոցներ են տեղադրելու ու հատուկ հրավիրատոմսերով են թողնելու, որ մոտենան ճոպանուղուն: Իմիջիայլոց, տեղեկություններ կան, որ այդ օրը ճոպանուղին չի գործելու, քանի որ աշխատանքն ամբողջությամբ ավարտված չէ: Իսկ հայաստանցիներին կթույլատրվի այս հրաշալիքին մոտենալ միայն հոկտեմբերի 16-ից յոթ օր հետո: