ՕԵԿ-ն ընդդեմ ՀՀԿ-ի

ՕԵԿ-ն ընդդեմ ՀՀԿ-ի
«Օրինաց երկիր» կուսակցության Կապանի տարածքային կառույց վերջին երեքուկես ամսում 85 մարդ է ընդունվել։ Այս թիվը մեզ հետաքրքրեց այնքանով, որ ՀՀԿ Կապանի կառույցի շարքերը վերջին մեկ տարում 100 մարդ է համալրել։ Այս մասին օրեր առաջ Հայաստանի ֆինանսների նախարար Տիգրան Դավթյանի հետ կուսակցական հանդիպման ժամանակ հայտարարեց Սյունիքի փոխմարզպետ, ՀՀԿ Կապանի տարածքային կառույցի նախագահ Վաչե Գրիգորյանը։ ՕԵԿ շարքերը համալրվում են հասարակության տարբեր խավերով՝ մանկավարժներ, գործարարներ, բուժաշխատողներ, բայց հիմնականում երիտասարդությունն է դիմում գրել ՕԵԿ անդամ դառնալու համար։



ՕԵԿ Կապանի տարածքային կազմակերպության ղեկավար Գարիկ Միրզոյանը մեզ հետ զրույցում չցանկացավ գործարարների անուններ նշել, բայց հերքեց այն տեղեկատվությունը, թե ՕԵԿ անդամ դառնում են աշխատանք ունենալու համար։ «Ես ինքս աշխատանք չունեմ: Ինչի մասին է խոսքը, ոչ մեկը նման խոստումներ չի տվել։ Ուղղակի մարդիկ հավատում են ՕԵԿ-ին ու անշահախնդիր համալրում են շարքերը»,-ասաց Գ. Միրզոյանը։ Ի դեպ, վերջինս Եվրոպական ակադեմիայի Կապանի քոլեջի տնօրենն էր։ Հուլիսին նա իր դիմումի համաձայն ազատվել է աշխատանքից։ Ըստ շրջանառվող լուրերի, նրան խոստացել էին տեղավորել հարկային տեսչությունում։ «Դա չէի լսել, ես լսել էի, որ քաղաքապետ պիտի դառնամ, որն աբսուրդ է։ Ես զբաղվելու եմ բիզնեսով։ Դա կուսակցության որոշումն է, ու ասեմ, որ առաջին հերթին իմ համար ՕԵԿ-ն է, հետո ընտանիքս»,-ասաց Գ. Միրզոյանը։