Պատասխանատվությունից չե՞ն խուսափելու

Նույնիսկ եթե ՀՅԴ-ն ու «Ժառանգությունը» կողմ քվեարկեն ԼՂՀ անկախության ճանաչման մասին «Ժառանգության» ներկայացրած օրինագծին, այն չի անցնի, եւ դա լուրջ հարված կհասցնի երկրի հեղինակությանն ու «մեր ընդհանուր գործին»: Երեկ լրագրողների հետ հանդիպման ժամանակ ասել է ՀՅԴ ԳՄ անդամ, պատգամավոր Արմեն Ռուստամյանը: Ըստ նրա, «Ժառանգությունը» չպետք է հարցը քվեարկության հասցներ՝ իմանալով, որ այն չի անցնելու: Ռուստամյանը նաեւ «անհասկանալի» համարեց ԱԺ մեծամասնության պահվածքը: «Եթե մեծամասնությանը թվում է, թե այս ամեն ինչից հետո պատասխանատվությունը միայն «Ժառանգության» վրա է ընկնելու, չարաչար սխալվում է:



Դրսում այս խոհանոցը չեն ուսումնասիրելու, թե ով ինչպես քվեարկեց: Ասելու են, որ օրինագիծը չանցավ, ուրեմն կողմ չէին, որ Ղարաբաղի ճանաչումը տեղի ունենա»,-ասաց Ռուստամյանն ու հավելեց, որ դա նաեւ հսկայական հարված է ԼՂՀ միջազգային ճանաչման գործընթացին: Բացի Ադրբեջանից, այլ երկրներն ու նրանց խորհրդարաններն էլ են ասելու՝ դուք չեք ուզում ճանաչեք, մեզնից ի՞նչ եք ուզում: Ինչ վերաբերում է հարցի շուրջ երկրի ներսում ընթացող զարգացումներին, ՀՅԴ-ական պատգամավորի կարծիքով՝  հետեւյալ հարցադրումն է ծագելու. «Միգուցե իշխանությունը իսկապե՞ս չի ուզում ճանաչել Ղարաբաղը»: