ԵՊՀ գզվռտոցը վերսկսվելու է փետրվարին

Երեւանի պետական համալսարանում  կրքերը ժամանակավորապես հանդարտվել են: Հիշեցնենք, որ համալսարանական երիտակտիվը երկու թեւի էր բաժանվել. մի մասը նախկին պրոռեկտոր, սպորտի եւ երիտասարդության հարցերով փոխնախարար Արսեն Քարամյանի հովանու ներքո է հավաքվել, մյուսը՝ ռեկտոր Արամ Սիմոնյանի: Վերջին շրջանում այս թիմերի միջեւ հակասություններն այն աստիճան են սրվել, որ բանը հասել է ծեծկռտուքի: Իսկ այս ամենը սկսվել էր այն ժամանակվանից, երբ Արամ Սիմոնյանը սկսել էր կասկածել, որ ԵՊՀ կորիզը Արսեն Քարամյանին է ենթարկվում:



Նույնիսկ  Սիմոնյանի հրահանգով ստորագրահավաք էր կազմակերպվել «ալա-բուլա» ուսխորհրդի լուծարման  համար: Այս տարաձայնություններից հետո Քարամյանի կողմնակիցները որոշել էին պայքարը շարունակել գիտխորհրդի նիստի ժամանակ, որը կայացել է երեկ: Որոշել են նախ քննարկել ստեղծված իրավիճակը, ապա բոյկոտել օրակարգի հարցերով կայանալիք քվեարկությունը: Նշենք, որ գիտխորհրդում,  բացի պրոֆեսորադասախոսական կազմից, ընդգրկված են նաեւ ուսանողներ, ովքեր քվեարկելու իրավունք ունեն: Սակայն երեկ մենք տեղեկացանք, որ  քարամյանականները  նիստից առաջ փոշմանել են, որոշել են ստեղծված իրավիճակն ավելի չսրելու համար առայժմ մարտավարությունը փոխել: Նրանք որոշել են մինչեւ փետրվար լռել, եթե արտառոց դեպքեր չգրանցվեն: Հակառակ դեպքում քարամյանականները սպառնացել են ռեկտորի ընտրության շեմին վերսկսել մարտն ընդդեմ Արամ Սիմոնյանի թիմի: