ԵԽ փորձագետները ստե՞լ են

ԵԽ փորձագետները ստե՞լ են
ԱԺ պետաիրավական հարցերի հանձնաժողովի նախագահ Դավիթ Հարությունյանը սպասում է ընտրական օրենսգրքի վերաբերյալ առաջարկների: Նա ակնկալում է, որ դեկտեմբերի վերջին ԵԱՀԿ-ի եւ ԵԽ-ի հովանու ներքո կլինի կլոր սեղան, եւ իրենք կքննարկեն այդ առաջարկությունները: Հիշեցնենք, որ կոալիցիայի ներկայացուցիչը ամռանը ԵԽ Վենետիկի հանձնաժողովին էր ներկայացրել երկու  առաջարկություն եւ, ըստ հանձնաժողովի փորձագետների, դրանք ներկայացրել էր Ազգային ժողովի անունից՝ հայտարարելով, թե ընդդիմությունը համաձայն է դրանց: Կոնկրետ «Ժառանգության» ներկայացուցիչներն այդ մասին իմացել էին ԵԱՀԿ/ԺՀՄԻԳ փորձագետների հետ հանդիպման ժամանակ: Ընդդիմությունը հայտարարեց, թե փորձ է արվում շահարկել ընդդիմության անունը: Ներկայացնում ենք Դավիթ Հարությունյանի հետ մեր զրույցը: Ի դեպ, պարոն Հարությունյանը երբեմն գաղտնի ձայնագրում է լրագրողների հետ իր զրույցները:



- Պարոն Հարությունյան, ակնհայտ է, որ քաղաքական կոնսենսուս չկա՝ ԸՕ այդ նախագծերի հետ կապված: Ի՞նչ եք պատրաստվում անել:



- Բացարձակ կոնսենսուս երբեւէ չի էլ ենթադրվում, որ կլինի բոլոր հարցերի վերաբերյալ: Բայց պատրաստվում եմ ամեն ինչ անել, որ լինի կոնսենսուս:



- Օրինակ ի՞նչ եք անելու:



- Քննարկել եւ փորձել համոզել, եթե ես համարում եմ իմ դիրքորոշումը ճիշտ, կամ փորձել ընդունել այլոց դիրքորոշումը, առաջարկությունները, եթե համարում եմ նրանցը ճիշտ:



- Ընդդիմությունն արդեն իսկ որոշ առաջարկներ ներկայացրել է ԵԽ-ին, Դուք դրանց ծանո՞թ եք:



- Ես դրանց ծանոթացել եմ եւ կարծում եմ, որ եթե նրանք ցանկություն ունեն աշխատել ԵԽ-ի հետ, թող աշխատեն ԵԽ-ի հետ: Եթե ցանկություն ունեն աշխատել մեզ հետ, թող ուղարկեն մեզ:



- Ընդդիմությունը նաեւ հայտարարել է, որ իշխանությունն ընդամենը այս փոփոխություններով փորձում է ԸՕ-ի վրա գցել անցած ընտրությունների, մարտի 1-ի, ընտրակեղծիքների մեղքը եւ ցույց տալ, թե նման խայտառակ ընտրությունների մեղավորը ոչ թե իշխանության որոշ քայլերն էին, այլ ընտրական օրենսգիրքը:



- Ես ամենեւին համաձայն չեմ նման գնահատականի հետ: Ընտրական օրենսգրքի վրա ոչինչ հնարավոր չէ գցել: Ընտրական օրենսգիրքը կարող է լինել ավելի լավ եւ ունենալ շատ ավելի կանխարգելիչ մեխանիզմներ իր մեջ, որպեսզի հնարավորինս նվազեցնի հնարավոր խախտումները: ԸՕ-ն չի կարող լուծել երկրի բոլոր խնդիրները ընտրությունների հետ կապված:



- Պարոն Հարությունյան, Դուք դեռ ամռանը Ձեր մշակած առաջարկությունները ներկայացրել էիք ԵԽ Վենետիկի հանձնաժողովին: Նաեւ հայտարարել էիք, թե դա համաձայնեցված է ընդդիմության այլ քաղաքական ուժերի հետ...



- Այն, ինչ որ Դուք ասում եք, դա տարածված թյուրիմացություն է: Ես չգիտեմ ինչու եւ ով տարածեց այդ թյուրիմացությունը, որովհետեւ մեկը մյուսի վրա հղում անելով, ի վերջո դա բավականին լայն արձագանք ստացավ:



- ԵԱՀԿ եւ ԵԽ համապատասխան փորձագետներն են ընդդիմության հետ հանդիպման ժամանակ ասել այդ մասին, որ օրինագիծը նման կերպ է ներկայացվել Վենետիկ:



- Նախ՝ երկու նախագծերը ներկայացվել էին Վենետիկի հանձնաժողովին ոչ պաշտոնապես, այլ ես էի դիմել նրանց, ասելով, որ ես ստեղծել եմ աշխատանքային փոքր խումբ, մշակում եմ նախագիծ, որը պետք է դառնա քննարկման առարկա, եւ որպեսզի կարողանամ քննարկման ներկայացնել համեմատաբար ողջամիտ տարբերակ, ես խնդրում եմ իրենց ոչ պաշտոնական խորհրդատվությունը, որ իրենք կարողանան ինձ խորհուրդներ տալ: Ավելին, ի սկզբանե նշել եմ, որ դա չի քննարկվել ընդդիմության հետ, որովհետեւ ես կուզենայի քննարկման առարկա դարձնել մի նախագիծ, որը սկզբունքներով, առաջին հայացքից չունի լուրջ խնդիրներ:



- ԵԽ Վենետիկի հանձնաժողովը, սակայն, նրա համար չէ, որ ինչ-որ անհատի առաջարկություններ քննարկի, այն պետք է քննարկի ԱԺ ընդհանուր կարծիքը: Վենետիկում հո անհատների համար աշխատող փորձագետներ չե՞ն:



- Ճիշտ եք ասում, բայց ես էլ ուղղակի անհատ չեմ, այլ պետաիրավական հարցերի հանձնաժողովի նախագահն եմ: Այնպես որ, խոսքը չի վերաբերում ուղղակի անհատի ներկայացրածին: Պետաիրավական հարցերի հանձնաժողովի նախագահը, ԵԽ-ում հայկական պատվիրակության ղեկավարը եթե դիմում է ԵԽ, որ նրան անհրաժեշտ է փորձագիտական աջակցություն, ապա նա ստանում է: Դա ոչ պաշտոնական տեսակետ է: Վենետիկի հանձնաժողովի այդ փորձագետները չէին ներկայացնում Վենետիկի պաշտոնական տեսակետը: ...Ընդդիմության անունը չի շահարկվել, եւ եթե որեւէ մեկը նման հայտարարություն է անում, ապա նա ստում է:



- Կապ չունի՞, որ դա Վենետիկի ներկայացուցիչներն են կամ ԵԱՀԿ-ի:



- Կապ չունի: Լինի դա միջազգային կառույցի ներկայացուցիչ, լինի դա իշխանության կամ ընդդիմության ներկայացուցիչ: Ով որ ասում է, որ ես իբրեւ ներկայացրել եմ այդ նախագիծը իբրեւ ընդդիմության հետ քննարկված, նա ստում է:



- Իսկ պատրաստվո՞ւմ եք դատի տալ այդ փորձագետներին:



- Ոչ, ես ժամանակ չունեմ, որ ցանկացած հիմարությունների պատճառով գնամ դատարան:



- Լավ, հիմա Դուք մեր զրույցը ձայնագրում եք, չէ՞:



- Չէ, հիմա չեմ ձայնագրում:



- Բայց Դուք միշտ ձայնագրում եք, չէ՞, լրագրողներին:



- Ոչ միշտ եւ ոչ բոլոր լրատվամիջոցներին: