ԲՀԿ-ն կարող է Կուրիլյան կղզիներն էլ գրավել

ԲՀԿ-ն կարող է Կուրիլյան կղզիներն էլ գրավել
Երեկ ԲՀԿ մամուլի պատասխանատուն հայտարարեց, որ եթե ԲՀԿ-ն 50+1 տոկոս ունենա առաջիկա խորհրդարանական ընտրություններում, նախագահական ընտրությունների կգնա սեփական թեկնածուով, որը հնարավոր է Գագիկ Ծառուկյանը լինի: Մեր զրույցը ՀՀԿ պատգամավոր Հովհաննես Սահակյանի հետ է:



- Պարոն Սահակյան, փաստորեն ՀՀԿ-ն միայնակ է մնում ՕԵԿ-ի գրկում: Ինչպե՞ս եք այդ կարգավիճակը պատկերացնում, եւ ի՞նչ քաղաքական ապագա կարող է սպասվել ՀՀԿ-ին:



- Ո՞նց եք պատկերացնում Հանրապետականը ՕԵԿ-ի գրկում կամ ինչ-որ մեկի գրկում, կարո՞ղ եք պատասխանել: Նախ՝ Հանրապետականի գրկում են մինչեւ օրս մնացել մյուսները, ով մնացել է, եթե հարցը սկսում ենք էդտեղից, եւ Հանրապետականի գիրկը այնքան մեծ է, որ միշտ ընդունում է, անկախ նրանից՝ ընդդիմադիր է, թե դիմադիր: Երկրորդ՝ Հանրապետականը մշտապես նախագահական ընտրություններին, ԱԺ ընտրություններին գնացել է միայնակ, որեւիցե մեկի հետ դաշինք չի կազմել, բացի 98թ. Միասնության դաշինքը:



Եթե նայում ենք վերջին 3-4 ընտրությունները, Հանրապետականը մշտապես միայնակ է գնացել ընտրություններին: Իսկ այն, որ ԲՀԿ-ն արդեն որոշել է, որ պիտի իր թեկնածուով գնա..., եթե մի քիչ ուշադիր կարդաք այդ տեքստը, որն արտաբերել է Խաչիկ Գալստյանը՝ մամուլի խոսնակը Գագիկ Ծառուկյանի, կտեսնեք, որ այնտեղ «եթե»-ները մի փոքր ավելի շատ են: Ձեր հարցադրումը ենթադրում է, որ ԲՀԿ-ն առանձին թեկնածուով է գնում նախագահական ընտրությունների, բայց դա այդպես չէ: Իսկ մինչ ընտրությունները դեռ շատ ջրեր կպարզվեն: ...Եվ մի բան էլ ավելացնեմ, որ պետությունը եւ պատմությունը կերտում են անհատները, իսկ մյուսները դրանից օգտվում են ընդամենը:



- Բայց ՀՀԿ-ն այսօր կարծես ավելի շատ պետությունից օգտվողների մեջ է:



- Ձեր աչքերը եթե էդ ֆոնի մեջ են նայում, ես ցավում եմ:



- Լավ, հիմա փաստորեն Սերժ Սարգսյանը հնարավոր է զրկվի իր կարեւորագույն հենարաններից մեկից՝ ԲՀԿ-ից: Այդ դեպքում ինչպե՞ս եք պատկերացնում ՀՀԿ-ի եւ Սերժ Սարգսյանի ծրագրերի իրականացումը, նախագահ դառնալը եւ այլն:



- ՀՀԿ-ն է եղել այն ուժը, որի վրա մշտապես հենվել է Սերժ Սարգսյանը, իսկ մյուսները ըստ ցանկության միացել են Սերժ Սարգսյանի եւ Հանրապետականի ծրագրերին եւ աջակցել, որ այդ ծրագրերն իրականացնենք: Մենք ողջունում ենք դա: Այն հենարանը, որի կոնտեքստով Դուք հարցնում եք, միայն Հանրապետական կուսակցությունն է:



- Բայց Սերժ Սարգսյանին կոնկրետ սատարել են, չէ՞, եւ ԲՀԿ-ն, եւ Դաշնակցությունը, եւ ՕԵԿ-ը: Միայնակ չէր Սերժ Սարգսյանը 2008-ին:



- Ես ընդունում եմ, որ ձեռք էր մեկնել «Բարգավաճ Հայաստան» կուսակցությունը, «Օրինաց երկիր» կուսակցությունը: Նորից եմ ասում՝ մենք ողջունում ենք այն ուժերին, ովքեր կմիանան մեզ նախագահական ընտրությունների նախընտրական ժամանակահատվածում: Բայց մինչեւ նախագահականը կան ԱԺ ընտրություններ, որն ավելի շուտ է իմ կարծիքով, եւ 2012 թիվը ավելի շուտ է, քան 2013 թիվը: Ինձ թվում է՝ նախ պետք է ԱԺ-ում հաղթել եւ «եթե»-ները հաղթահարել, նոր տենց ոգեւորված, էմոցիոնալ հարցադրումներ անել: Մեկ անգամ եւս ուզում եմ շեշտել՝ Սերժ Սարգսյանի միակ վստահելի, հիմնական քաղաքական հենարանը դա Հանրապետական կուսակցությունն է: Բայց մենք ողջունում ենք այն քաղաքական ուժերին, որոնք կարող են միանալ, էդ ծրագրերն իրականացնել, երկիրը շենացնել:



- Այսինքն ՕԵԿ-ին, որը հրաժարվեց ընդդիմադիր կեցվածքից, որով խայտառակ եղավ ու սատարեց Սերժ Սարգսյանին, Դուք հենարան չե՞ք համարում:



- Սերժ Սարգսյանը ընտրվելուց, ՀՀ նախագահ դառնալուց հետո առաջին գործը, որ արեց, ձեռք մեկնեց բոլոր քաղաքական ուժերին, որ միասին կարողանանք շենացնենք, իրականացնենք այն ծրագրերը, որոնք դրված են նախընտրական մեր ծրագրային դրույթներում: Խորհրդարանում, որը ստեղծվեց ԱԺ ընտրություններից հետո, ՀՀԿ-ն բացարձակ մեծամասնություն էր կազմում եւ կարող էր միանձնյա ձեւավորել իշխանությունը, բայց մենք հարգեցինք մեր գործընկերներին՝ ՕԵԿ-ին եւ ԲՀԿ-ին, այն գաղափարները, որոնք նաեւ ընդհանուր են մեզ համար, եւ ստեղծվեց կոալիցիան:



- Նախագահ դառնալուց հետո, սակայն, առաջինը, որ արեց Սերժ Սարգսյանը, դա իր քաղաքական ախոյաններով՝ քաղբանտարկյալներով բանտերը լցնելն էր: Դա՞ էր մեկնած ձեռքը:



- «Քաղբանտարկյալ» տերմինը այս պահին ինձ համար խորթ է: Քաղբանտարկյալ չկա: Նրանք ընդամենը քրեական հանցագործներ են: Քաղաքական հայացքների համար ՀՀ-ում որեւէ մեկը բանտարկված կամ կալանավորված չէ:



- Եթե քրեական են, Սերժ Սարգսյանը ինչո՞ւ է ազատում նրանց, ինչո՞ւ համաներում արեց:



- Եթե համաներում է, համաներումը վերաբերում է բոլորին: Ի տարբերություն նախկին իշխանությունների, մենք չենք տարանջատում էն մարդկանց, ովքեր հետընտրական ժամանակահատվածում որոշակի քրեական հանցանք են կատարել, եւ նրանց, ովքեր 5 տարի առաջ որոշակի քրեական հանցանք են կատարել: Մեզ համար քրեական հանցագործը քրեական հանցագործ է:



- Այսինքն դուք պարզապես այնքան բարի եք, որ ազատո՞ւմ եք քաղբանտարկյալներին:



- Չէ: Մենք ընդամենը շարժվում ենք օրենքներով: Բարությունը քաղաքական կատեգորիա չէ:



- Իսկ ընտրակեղծիքները քաղաքական կատեգորիա՞ են ՀՀԿ-ի համար:



- 96 թ.-ի ընտրակեղծիքնե՞րն ի նկատի ունեք:



- Նաեւ 2007-ի, 2008-ի ընտրությունները:



- 2008-ի, 2007-ի հետ կապված եղել է մի շարք միջազգային կառույցների, նաեւ դիտորդական առաքելությունների, ԵԱՀԿ/ԺՀՄԻԳ-ի վերլուծությունը, որտեղ մենք նայում ենք՝ եղել են մի շարք բացթողումներ, թերություններ, բայց ոչ ընտրակեղծիքներ:



- Իսկ Հանրապետականը պատրա՞ստ է երկրի ղեկը փոխանցել ԲՀԿ-ին, եթե իրենք 50 տոկոս հավաքեն եւ իրենց թեկնածուով գնան նախագահական ընտրությունների:



- Այդ հարցը չենք քննարկում, որովհետեւ ակտուալ չի, որովհետեւ առաջիկա 15-20 տարում նման խնդիր դրված չի եւ չի կարող լինել:



- Դե փաստորեն, ԲՀԿ-ն այդ խնդիրը այնուամենայնիվ դրել է իր առաջ:



- ԲՀԿ-ն կարող է լիքը խնդիր դնել: ԲՀԿ-ն կարող է խնդիր դնի՝ Կուրիլյան կղզիներն էլ գրավի, բայց մենք ԲՀԿ-ին չենք կարող ասել՝ ինչի՞ ես դրել էդ խնդիրը: