Մեկի փոխարեն չորս խողովակ

Վերջին 15 տարում նախագահի ապարատի հետ առնչված չինովնիկներից մեկը, որ իշխանական խոհանոցին լավ է ծանոթ, հետաքրքիր դիտարկում արեց. Ռոբերտ Քոչարյանի ժամանակ երկրի նախագահին տեղեկատվություն փոխանցելու, նրա մոտ հայտնվելու, նրա հետ շփվելու մի խողովակ էր գործում՝ Արմեն Գեւորգյանի խողովակը: Բոլորը գիտեին այդ մասին եւ բոլորը խաղի չգրված կանոններին հետեւում էին: Ճիշտ է՝ այդ պարագայում «Արմենչիկի» դերակատարությունը մեծանում էր, սակայն ամեն ինչ կանոնակարգված էր ու հստակ:



Սերժ Սարգսյանի օրոք այդ խողովակների թիվն առնվազն չորսն է՝ նախագահի աշխատակազմի ղեկավար Կարեն Կարապետյան, Անվտանգության խորհրդի քարտուղար Արթուր Բաղդասարյան, փեսա Միքայել Մինասյան եւ Ֆլեշի Բարսեղ Բեգլարյանը: Սա մի կողմից լավ է, որ նախագահի՝ ինֆորմացիան ճշտելու, տարբեր աղբյուրներից ստանալու հավանականությունը մեծանում է: Սակայն վատ է, քանի որ իրարամերժ ինֆորմացիան եւ մուտիլովկաներն էլ են շատանում: Եվ ստորադասների բանակը սկսում է չկողմնորոշվել՝ ում միջոցով, ինչպես հարաբերվի առաջին դեմքի հետ, որ խողովակին նախընտրություն տա: Եթե հաշվի առնենք նաեւ այն, որ բացի այս ազդեցիկ խողովակներից «ականջին կաթացնողների» մի բանակ էլ կա՝ հանձին Գորիկ Հակոբյանի, Վաչոյի եւ այլոց, պարզ կդառնա, որ Սերժ Սարգսյանի եւ ըստ այդմ՝ երկրի վիճակը բարդ է: