Գնացել է հարցեր լուծելու

Ամենայն հայոց կաթողիկոս Գարեգին Բ-ն մեկշաբաթյա այցով երեկ մեկնել է Փարիզ՝ Ֆրանսիայի Հայոց թեմի առաջնորդ, Արեւմտյան Եվրոպայի Հայրապետական պատվիրակ Տ. Նորվան արքեպիսկոպոս Զաքարյանի հրավերով: Մեզ հասած տեղեկություններով՝ կաթողիկոսը Ֆրանսիա է մեկնել այնտեղի Հայ առաքելական եկեղեցու հետ կապված որոշ խնդիրներ պարզելու համար: Նշենք, որ մի քանի ամիս առաջ Ֆրանսիայի Նիս քաղաքի հայկական եկեղեցում ծեծկռտուք էր տեղի ունեցել Հայաստանից գործուղված քահանա հայր Վաչե Հայրապետյանի կողմնակիցների եւ հակառակորդների միջեւ:



Ծեծկռտուքի մասին տեղեկացրեցին անգամ ֆրանսիական հեռուստատեսությունն ու մամուլը: Նիս քաղաքի հայկական համայնքի մի մասը չէր ընդունում հայր Վաչեի հովվությունը: Ծեծկռտուքից հետո հայր Վաչե Հայրապետյանը Նիսից տեղափոխվեց Ստրասբուրգ՝ այնտեղ Հայ առաքելական համայնք ձեւավորելու համար, քանի որ Ստրասբուրգում առաքելական եկեղեցի չկա: Նշենք նաեւ, որ Ֆրանսիայի օրենսդրության համաձայն՝ եկեղեցիները ենթարկվում են համայնքի ներկայացուցիչների կողմից ստեղծված եկեղեցական խորհուրդներին: