Ունեւոր խավին մուսուլմանական երկրներից կտրելու է

Ունեւոր խավին մուսուլմանական երկրներից կտրելու է
Թեեւ Նոր տարվան ավելի քան մեկ ամիս կա, սակայն  քաղաքապետարանում արդեն ամանորյա տրամադրություն է թեւածում: Այս տարի ինչ-ինչ պատճառներով որոշել են շուտ սկսել: Թեման բավականին զվարճալի քննարկման ենթարկվեց ուրբաթ օրը Երեւանի քաղաքապետարանի ավագանու նիստում: Ինչպես միշտ, նիստը սկսվեց ԲՀԿ-Բեգլարյան «բազարով»: Սակայն չսրվեց, ինչպես նախկինում էր, այլ բավական տոնական ավարտ ունեցավ, երբ Բեգլարյանը վերջում անսպասելի հայտարարեց. «Տասը վարչական շրջանում գեղեցիկ տոնածառներ են տեղադրվելու, դրսից լույսեր են բերվելու, գեղեցիկ միջոցառումներ են կազմակերպվելու, ավագանին՝ յուրաքանչյուրն իր վարչական շրջանում պետք է մասնակից լինի ու շփում ունենա ժողովրդի հետ»:



Ապա գաղտնազերծեց շուտ սկսելու նպատակը. «Ուզում ենք այս տարի մի քիչ շուտ սկսենք, ուրախ, զվարթ անցկացնենք, որպեսզի երեւանցիները մնան Երեւանում: Խնդրում եմ, անկախ կուսակցությունից, մասնակից եղեք»: Բեգլարյանի այս հորդորին անմիջապես արձագանքեց ԲՀԿ-ական Արտակ Ավետիսյանը. «Ես կարծում եմ` ավելի լավ կլիներ, որ, ասենք, մեր ավանդական ճաշատեսակներով Նոր տարվա շեմի միջոցառումների ժամանակ հրամցնենք ժողովրդին, որտեւ բազմիցս նկատել ենք՝ ժողովուրդը էդ ժամանակահատվածում, կարելի ա ասել, գուցե կոպիտ կլինի, ժողովուրդը քաղցած է: Կարելի է հարիսա կամ մի ուրիշ ճաշկերույթ հրամցնել ժողովրդին»: Այս առաջարկը մի լավ զվարճացրեց ներկաներին, սակայն Բեգլարյանը հավանեց՝ խնդրելով գրավոր ներկայացնել:



Մի ՀՀԿ-ական թեմայից այնքան էր ոգեւորվել, որ առաջարկեց իջնել ներքեւ ու տարին փակել կոլեկտիվ լուսանկարով: «Ով չի եկել, մեղքն իրա վիզը, ժողովուրդ, իջնում ենք նկարվելու: Կա՞ մարդ, որ չի ուզում նկարվի»,-հարցրեց Բեգլարյանն ու պատասխանի չսպասելով՝ սրամտեց. «Կանայք խնդիր ունեն, ասում են՝ շուտ ասեիք, բանտիկներով գայինք»: Վերջում Գագիկ  Բեգլարյանին մի քանի հարց ուղղեցինք:



- Պարոն Բեգլարյան, ինչո՞վ է պայմանավորված քաղաքապետարանի ամանորյա տրամադրությունը, ինչո՞ւ եք շուտ սկսում:



- Գիտեք, վաղուց սովորություն ա դարձել, մեր ժողովուրդը համարում  ա, որ ինքը Երեւան քաղաքում չպիտի մասնակցի Ամանորին: Գնում են տարբեր մուսուլմանական երկրներում մի հատ մեծ հիպերմարկետում մի հատ գեղեցիկ տոնածառի կողքը նկարվում են, որովհետեւ մուսուլմանական երկրներում տոնակատարություն էլ չկա մեր Ամանորի նման: Դուրս ա գալիս, որ էս մարդիկ գնում են տոնածառի կողքը նկարվելու, էն էլ՝ հիպերմարկետի մեջ:



- Բայց հարուստներն ու պաշտոնյաներն են գնում մուսուլմանական երկրներ՝ Նոր տարի անելու: Ձեր նպատակը նրանց Երեւանում պահե՞լն է:



- Պաշտոնյաների մասին չի խոսքը, ունեւոր խավի, ունեւոր խավը թող մնա՝ Երեւանում անցկացնի չունեւորի հետ միասին, հավասարության մոտեցում ա: Բացի դրանից, ավելի լուրջ՝ ինչի՞ մեր քաղաքը նախաշեմին չլինի շատ ուրախ, չլինի շատ գունեղ, տրամադրող միջոցառումներով մի ամբողջություն: Ես ուզում եմ, որ վերադարձնենք նա, որ մարդիկ էդ օրը էնքան լավ տրամադրված կլինեն, որ հարեւանի հետ կբարիշեն, ըտենց էր, չէ՞. Նոր տարուն սպասում էին, ասում էին՝ Նոր տարին կգա, կգնանք հարեւանի Նոր տարին կշնորհավորենք կբարիշենք, ընկերները, որոնք իրարից նեղացել են... Երեւանն ունեցել ա էս կարգի սովորություններ: Օրինակ, ես ուզում եմ, որ Էրեբունի-Երեւանի տոնակատարությանը բոլորը սպասեն առաջվա մայիսի 1-ի պես, որ նոր շորեր էին գնում, պատրաստվում դրան, իսկ Նոր տարվա օրը սպասեն նրա համար, որ եթե իրենք զղջում են իրենց սխալները ընկերների, բարեկամների, հարեւանների նկատմամբ, մնան Երեւանում, էդ առիթը բաց չթողեն՝ էդ հարաբերությունները շտկելու համար:



- Կարճ ասած, մերձեցման մեխանիզմ եք մշակել:



- Չէ, մերձեցում չէ, դա եղել ա նախկինում: Դուք երիտասարդ եք, չեք հիշում, իրականում էդ որ տուն-տուն գնում էին, իրար շնորհավորում էին, դա նաեւ առիթ էր, որ տարվա ընթացքում հարեւանները, բարեկամները իրարից նեղվածությունը էդ օրով սահմանափակեին եւ Նոր տարին իրար հետ լավ հարաբերություններով սկսեին:



- Կարծում եք հասարակության տրամադրության անկումը արտաքին ձեւավորման պակասո՞վ է պայմանավորված:



- Օրինակ տեսեք, Էրեբունի-Երեւանը, երբ որ ամբողջ քաղաքը ուրախանում էր, մեկը մյուսին շնորհավորում էր, ոչ մեկս չէինք պատկերացնում, որ դա այդպես կլինի, բայց եղավ, եւ հավատացեք՝ ինչ-որ տեղ մեր իշխանությունների աշխատանքի պակասն ա, պտի կարողանանք էդ տրամադրությունը մարդկանց մեջ մտցնենք, յուրաքանչյուրն էլ ունի սոցիալական խնդիր, յուրաքանչյուրն էլ ունի անձնական խնդիր, բայց մենք պիտի կարողանանք մթնոլորտ ստեղծենք, որ գոնե մի քանի օր, մի օր էդ մարդիկ կարողանան էդ անձնական խնդիրներից, էդ սոցիալական վիճակից իրենք էլ իրանց լավ զգան ու տրամադրվեն: Հույսով, ապագայով անեն ամեն ինչ, որ ամեն ինչ լավ լինի:



- Չե՞ք կարծում, որ այդ ճոխ զարդարանքը մեր երկրի համար ավելորդ ծախս է: Մինչդեռ այդ գումարը թեկուզ Նոր տարվա շրջանակում կարելի էր սոցիալապես խոցելի խավին հատկացնել:



- Փողի հետ կապված միշտ հարց են տալիս: Հաջորդ ավագանու նիստում մենք բյուջեն ենք հաստատելու, կտեսնեք որտեղ ա գումարներ ծախսվելու՝ Էրեբունի-Երեւանի կամ Նոր տարվա՝ Ամանորի աշխատանքների ժամանակ: Էս գումարները ես հավաքագրում եմ էն սեփականատերերից, էն ինվեստորներից, ովքեր չեն տա էդ գումարն ու ասեն՝ բաժանի սոցիալապես անապահով խավերին, իրանք կբաժանեն: Մի հատ խնդրում եմ վերջնականապես էդ հարցը ձեր մեջ ֆիքսեք, երբ որ քաղաքապետն ասում ա «Վիվասելին»՝ հնարավորություն ունեք՝ տվեք գումարներ, մենք անենք Ամանորի տոնակատարություն, նա տալիս ա, չէ՞: Ես կարող եմ ասել՝ «Վիվասել», դուք պտի գումարներ տաք, մենք բաժանենք սոցիալապես անապահով ժողովրդին, ինքն էլ կասի՝ եթե ըտենց բան կա, ե՛ս որպես բիզնեսմեն կանեմ:



- Այսինքն, Երեւանի արտաքին ձեւավորման համար բյուջեից չե՞ք ծախսում:



- Արվում է ոչ բյուջեից, տարբեր ինվեստորներին այս նույն բացատրությունը տալով՝ ասում եմ` քանի որ դու Երեւան քաղաքում գումարներ ես աշխատում, պիտի էս հարցերում էլ լինես մեր կողքին, որպեսզի մեր ժողովրդի տրամադրվածությունն էլ, ուրախությունն էլ ի օգուտ քո բիզնեսին լինի, ժողովուրդս եթե իրան լավ զգաց, քո  բիզնեսն էլ լավ կզգա: Երկու տարի անընդհատ ասում են՝ չի՞ լինի էդ գումարները ուրիշ տեղ ուղղեն, պատկերացնում եք, սեփականատիրոջը ես ասում եմ՝ Էրեբունի-Երեւան տոնակատարություն ա, պտի նշենք Երեւանի 2792 ամյակը, հոգու խորքում ասում եմ, որ դու պարտավոր էլ ես մայրաքաղաքդ էնքան սիրես, որ ըտեղ անես հովանավորություն, որ մայրաքաղաքացիները իրանց լավ զգան: Էդ մարդուն ես չեմ կարող ասել` դու պարտավոր ես փող տաս, ես ասֆալտ անեմ, նա կասի՝ ոչ, պարոն քաղաքապետ, ասֆալտի փողերը պարտավոր ես դու հավաքագրել՝ ավագանում էս մարդկանց ապացուցելով, բոլորի հետ շփվելով, որ էս գումարներն ու տուրքեը էսձեւ պիտի գանձվի՝ առանց մի լումա կորցնելու, եւ ծախսվի ուղիղ քաղաքի վրա:



- Ճի՞շտ է, որ Դուք Երեւանը բարեկարգելիս ստիպում եք  բիզնեսմեններին, օլիգարխներին ծաղկապատել իրենց վարչական շրջանները, սրճարանների սեփականատերերին՝  հարող տարածքները:



- Օլիգարխներին՝ ոչ, այսինքն պարտադրելու ոչինչ չկա, ավագանու որոշումով մենք հաստատել ենք այլ բան: Եկեք իրար ճիշտ հասկանանք՝ քաղաքապետը ոչ մի տեղ ոչ մեկին չի պարտադրում, խնդրում եմ սա ֆիքսեք:



- Հորդորո՞ւմ է:



- Չի հորդորում: Ներկայացնում ա ճիշտ, պատասխան ա ստանում ճիշտ:



- Կմանրամասնե՞ք:



- Այսինքն ներկայացնում ենք, որ պետք է հարակից տարածքները անպայման վերանորոգվի, երբ որ դու քո սեփականությունը վերանորոգում ես, խնդրում ենք պարտավոր ես հարակից տարածքը, որը նաեւ բոլորինս ա, էն էլ վերանորոգես, որովհետեւ ըտենց դուրս ա գալիս՝ քո պատերից ներս պտի լինի շատ լավ, իսկ դուրսը, որ քո հարակից տարածքով, որ քո հաճախորդներն են գալիս քո մոտ, դա պիտի անպայման վերականգնի քաղաքապե՞տը: Երբ որ էս կարգի զրույց ես ունենում, մարդիկ հասկանում են: Պարտադրելու ոչինչ չկա:



- Պարոն Բեգլարյան, ավագանու նիստերի ժամանակ ՀՀԿ-ԲՀԿ ներկայացուցիչներն անընդհատ վիճաբանության մեջ են, քաղաքական հակասություննե՞րն են պատճառը:



- Չէ, ոչ մի քաղաքական բան  չկա, ուղղակի մոտեցման խնդիրն ա: Այսինքն ամեն մարդ մի ձեւ ա, էլի, մոտենում հարցին: Օրինակ, էսօր ի՞նչ կար  քաղաքական, ոչ մի բան: Քաղաքական, որ լինում ա, ես հայտարարում եմ, ասում եմ՝ մի քաղաքականացրեք: