Հայի հետին խելքը

Ապագա եւ ներկա մայրիկները երեկ կառավարության մոտ բողոքի ակցիա էին անում ընդդեմ  «ժամանակավոր անաշխատունակության նպաստների մասին» ՀՀ օրենքի փոփոխության, որով կրճատվում են հղիներին վճարվող գումարները: Չնայած այն դեկտեմբերի 1-ին նախագահը ստորագրել է, ու մտել է ուժի մեջ, սակայն նրանք շարունակում են պահանջել` օրենքը բերել նախկին տեսքի: Մինչ հղիները բողոքում էին, Տիգրան Սարգսյանը կառավարության ամբիոնից անդրադարձավ խնդրին. «Մտահոգությունները, որոնք հնչում են, մեր նախարարությունը եւ ԱԺ հանձնաժողովը կիսում են: Այսօր պատրաստվել է մի նոր օրենքի նախագիծ, որն անհրաժեշտ է քննարկել բոլոր շահագրգիռ կողմերի հետ, եւ անհրաժեշտության դեպքում օրենքում կկատարենք շտկումներ՝ նպատակ ունենալով ստեղծել այնպիսի միջավայր, որը խթանում է ծնելիությունը Հայաստանի Հանրապետությունում»:







Նիստի ավարտից հետո աշխատանքի եւ սոցիալական հարցերի նախարար Արթուր Գրիգորյանը դուրս եկավ կառավարության շենքից եւ ընկավ ներկա ու ապագա մայրիկների օղակի մեջ: Կանայք նկատեցին, թե այդ օրենքով դեմոգրաֆիական խնդիր է առաջանալու, նախարարը պատասխանեց. «Դեմոգրաֆիական խնդիրը պայմանավորված չէ ժամանակավոր անաշխատունակության նպաստով, դուք հաշվեք՝ մենք ինչքան արտոնություններ ենք տալիս հղի կնոջը»:



«Ի՞նչ արտոնություններ»,- զարմացան հղիները: «Անվճար ծնունդօգնությունը»,-անվրդով պատասխանեց նախարարը: Մենք հետաքրքրվեցինք, թե հղիների  ակցիանե՞րն են ստիպել, որ օրենքը վերանայվելու է, Գրիգորյանը պատասխանեց. «Բողոքը կապ չուներ, փոփոխությունները նախապատրաստված էր»: Այսինքն՝ մերոնք օրենքներ մշակելիս «նավսյակի» ժողովրդի համար համեմատաբար բարենպաստ տարբերակը պահում են վերջում, եթե չհաջողվի սղացնել իրենց ուզածը, ծայրահեղ դեպքում «հոգապահուստը» ջրի երես կհանեն: