Տարոն Մարգարյանն ու Կամո Արեյանը մղվեցին հետին պլան

Քաղաքապետարանում ընթացող կառուցվածքային ու կադրային փոփոխությունների շրջանակում բավականին լուրջ վիճակում են հայտնվել Գագիկ Բեգլարյանի աջ ու ձախ ձեռքերը` քաղաքապետի առաջին տեղակալ Տարոն  Մարգարյանն ու  զախարյանական շրջանից մինչ այսօր տեղակալ Կամո Արեյանը: Թեեւ Կարեն Կարապետյանը նրանց չի հեռացրել, սակայն վերաբաշխել է նրանց ենթակա ոլորտներն ու լիազորությունները: Մեր տեղեկություններով՝ առանցքային  ոլորտներն առանձնացրել է իր նոր տեղակալի՝  Վահագն Առաքելյանի համար, որին ավագանին պաշտոնապես պետք է ուրբաթ օրը նշանակի:



Վահագն Առաքելյանի տրամադրության տակ են լինելու բոլոր փողաբեր ոլորտները՝  շինարարությունը, ճարտարապետությունը, անշարժ գույքն ու  ֆինանսները:   Երբեմնի քաղաքապետի թեկնածու համարվող Տարոն Մարգարյանին բաժին են հասել վարչական շրջանների ղեկավարների աշխատակազմերի աշխատանքների  կազմակերպման, առեւտրի սպասարկման եւ տրանսպորտի վարչությունները: Կամո Արեյանից վերցվել է կրթության եւ առողջապահության ոլորտը, նա այլեւս լինելու է կոմունալ սպասարկման  ու համատիրությունների գծով կուրատոր:



Իսկ Վանո Վարդանյանը կհամակարգի կրթության, առողջապահության ու մշակույթի ոլորտները: Ասում են՝ այս փոփոխությունները հատկապես ծանր  է տարել Տարոն Մարգարյանը, որը ոչ հեռավոր անցյալում քաղաքապետի հավակնություններ ուներ: Բավական չէ դա տեղի չունեցավ, դեռ մի բան էլ ձեռքից խլեցին առանցքային ոլորտները: Մինչ քաղաքապետարանի նոր կառուցվածքային ծրագիրը  ուրբաթ օրը կքննարկվի ավագանու նիստում, խոսակցություններ կան, թե սրանք միայն «ծաղիկներն են»՝ կադրային լուրջ փոփոխություններն առջեւում են:



Հոգեխանգարմունքի մեջ են նաեւ վարչությունների պետերը, յուրաքանչյուրն իր հնարավորությունների սահմաններում բանակցությունների մեջ է Կարեն Կարապետյանի հետ, փորձում է նրա մոտ «պադխոդ» գտնել: Նշենք, որ այս ընթացքում նոր թափով են ընթանում շինարարական աշխատանքները Բուզանդ 1/3 հասցեում, որտեղ նորընտիրը մտադրվել է տեղակայել Վանո Վարդանյանին՝ իր ենթակա վարչություններով:



ՔԱՂԱՔԱՊԵՏԸ՝ ՓՈՂՈՑԱՅԻՆ ԱՌԵՎՏՐԻ ԹՇՆԱՄԻ



Կարեն Կարապետյանը շարունակում է իրականացնել Բեգլարյանի կիսատ թողած գործը՝ փողոցային առեւտրի արգելման որոշումը: Երեկ մայրաքաղաքի տարբեր մասերում առեւտուր անողները բողոքի ակցիա էին կազմակերպել քաղաքապետարանի մոտ: Նրանք պահանջել են  քաղաքապետին դուրս գալ եւ պարզաբանումներ տալ, թե ինչու է իրենց զրկում գոյատեւելու միջոցներից: Սակայն Երեւանի արտաքին տեսքով մտահոգված քաղաքապետն այդպես էլ իր ծմակից դուրս չի եկել: Առեւտրականները իրենց բողոքն արտահայտել են՝ վանկարկելով «հրաժարական», «աշխատանք»:



Սակայն անգամ առեւտրի ու սպասարկման վարչության պետին թույլ չեն տվել հանդիպել քաղաքացիներին: Միայն այդ բաժնի աշխատակից Հովհաննես Ղալեչյանին է հանձնարարվել հանդիպել լրագրողներին՝ բացատրելու ծրագիրը: Վերջինս էլ ասել է, որ առեւտրականներին ապամոնտաժելու գործը նպատակահարմար են համարել իրականացնել հենց այս սեզոնին, քանի որ փողոցային առեւտրի համար այնքան էլ աշխույժ շրջան չէ: Բացի այդ նշել է, թե իրենք այլընտրանքային տարբերակներ են առաջարկում՝  տեղափոխվել շուկաներ, որոնց տերերի հետ արդեն ձեռք են բերել համաձայնություն, իսկ եթե պահանջվի, նույնիսկ նոր շուկաներ կստեղծեն: Հարց է ծագում՝ իսկ ո՞ւմն է լինելու նոր շուկան: Գուցե նոր քաղաքապետի՞նը, որը Բեգլարյանի օրինակից վարակվել է եւ ուզում է սեփական  բազարային բիզնես-ծրագիրը ծավալել: