Հայաստանի Ռամկավար ազատական կուսակցությունը նոր ղեկավար ունի՝ Էդվարդ Անտինյանը

Հայաստանի Ռամկավար ազատական կուսակցությունը նոր ատենապետ ունի, դա Էդվարդ Անտինյանն է: Նման որոշում է կայացվել ՀՌԱԿ-ի 19-րդ համագումարում: Անտինյանի թեկնածությունն առաջադրել է արդեն նախկին ատենապետ Հարություն Առաքելյանը: Նա նաեւ խնդրել է իր հրաժարականի տակ ենթատեքստեր չտեսնել: «Ուղղակի ժամանակն էր, որ կուսակցությանը նոր ղեկավար է պետք՝ թարմ գաղափարներով»,- հայտարարել է Առաքելյանը՝ ընդգծելով, որ հրաժարական է տալիս հանգիստ սրտով:



Իր հերթին Անտինյանը խոստացել է հնարավոր ամեն ինչ անել կուսակցության զարգացման եւ բարգավաճման համար: Նա նաեւ խոստացել է 1,5 ամսվա ընթացքում պատրաստել ՀՌԱԿ նախընտրական ծրագիրը: Նա նշել է, որ ՀՌԱԿ-ի նպատակն է իշխանության հասնելն ու իրացնելը: Այդուհանդերձ, ՀՌԱԿ-ը մտադիր չէ միայնակ մասնակցել 2012թ. խորհրդարանական ընտրություններին: Ընտրությունների շեմին կուսակցությունն արտահերթ համագումար կանցկացնի եւ կորոշի, թե որ ուժին է հարում:



Բացի ներքաղաքական հարցերից քննարկվել է նաեւ Հայոց ցեղասպանության հարցը: Նրանք անհրաժեշտ են համարել դիմել ՄԱԿ-ի Միջազգային տրիբունալին: Ըստ Հարություն Առաքելյանի, ներկայումս այդ հարցում չկա միացյալ մոտեցում Հայաստանում եւ Սփյուռքում: Նա նաեւ անհրաժեշտ է համարել Հայոց ցեղասպանության հարցի լուծումը մինչեւ Թուրքիայի հետ սահմանի բացումը:



News.am