Դատապարտյալները սպասում են նախարարի քայլերին

ՀՀ արդարադատության նախարարի պաշտոնում իր առաջին ասուլիսում Հրայր Թովմասյանը հայտարարել էր, որ ոլորտում առկա խնդիրները պարզելու համար նախարարության աշխատակիցները, որպես շարքային քաղաքացիներ, առանց նախազգուշացնելու կայցելեն համակարգի տարբեր կառույցներ: Եվ, ինչպես տեղեկացանք, երկուշաբթի օրը ՀՀ արդարադատության նախարար Հրայր Թովմասյանը որոշել էր մի քանի աշխատակիցների ուղեկցությամբ անձամբ այցելել նոտարական գրասենյակներ:



Նշենք, որ նախարարն այցելել էր 10-15 գրասենյակ, սակայն, ինչպես նախարարության մամլո հաղորդագրության մեջ է նշվում, «հակառակ սահմանված կարգի՝ առավոտյան ժամը 9-ին որեւէ նոտարական գրասենյակ բաց չի եղել»: Հետո իմացանք, որ աշխատանքի գալուց հետո նոտարական գրասենյակների ղեկավարները նախարարից ստացել են խիստ հանձնարարականներ: Նշենք, որ «Նոտարիատի մասին» օրենքի համաձայն՝ նոտարական գրասենյակներն ընդամենը պետության կողմից լիցենզիա ստացած կառույցներ են, կարճ ասած՝ իրենք են որոշում իրենց աշխատանքային գրաֆիկը: Իսկ երեկ նախարար Թովմասյանն այցելել է երեք քրեակատարողական հիմնարկներ՝ «Վարդաշեն», «Էրեբունի» եւ «Նուբարաշեն»՝ «ծանոթանալու պայմաններին եւ առկա խնդիրներին»: Մեզ այդպես էլ չհաջողվեց նախարարությունից պարզել, թե ում հետ է հանդիպել նախարարը, արդյո՞ք զրուցել է որեւէ քաղբանտարկյալի եւ առհասարակ` դատապարտյալների հետ, ինչ խնդիրներ են բարձրացվել:



Միայն տեղեկացանք, որ հանդիպել է «Վարդաշեն» ՔԿՀ-ում գտնվող Սարգիս Հացպանյանի հետ, ով այդ հանդիպումից հետո զանգահարել է բոլոր խմբագրություններ, այդ թվում՝ մեր, եւ պատմել նախարարի այցելության մասին: Նա ասաց, որ նախարարի հետ հանդիպման ժամանակ իր եւ բոլոր դատապարտյալների բարձրացրած հիմնական խնդիրը եղել է դատապարտյալների իրավունքների ոտնահարումը:



««Վարդաշեն» ՔԿՀ-ում այժմ գտնվում է 117 դատապարտյալ, որոնցից 80-ը, վաղաժամկետ պայմանական ազատման իրավունքից օգտվելով, վաղուց պետք է լինեին իրենց տներում, 19 հոգի պետք է գտնվեին «բաց ռեժիմային» կարգավիճակում, մինչդեռ նրանք այստեղ են, 6 հոգի, որոնք  «բաց ռեժիմում» էին, առանց օրենքի խախտում թույլ տված լինելու ետ են վերադարձվել այստեղ՝ առանց որեւէ բացատրության՝ ինչո՞ւ, ո՞նց: Նաեւ՝ մեզ համար շատ կարեւոր է կարճաժամկետ արձակուրդների հարցը, վերջապես մարդիկ ծնող կամ հարազատ են կորցնում, որոնց ուղեկցող պահակախմբով ընդամենը կես ժամ կամ մեկ ժամ են տանում հոգեհանգստին: Շշմեցուցիչ է: Երբ օրենքը նախատեսում է նման դեպքերում մարդուն 5-7 օր ազատ արձակել»,-ասաց Հացպանյանը՝ հավելելով, որ նախարարը խոստացել է, երաշխավորել, որ ցանկացած դատապարտյալ, կալանավոր կօգտվի իր իրավունքներից:



Նախարարը խոստացել է նաեւ մոտ օրերս աշխատակիցներ ուղարկել ՔԿՀ՝ կալանավորների հետ առավել մանրամասն խնդիրները քննարկելու նպատակով: ««Վարդաշենի» դատապարտյալները սպասելու են նախարարի քայլերին»,-մեզ ասաց Սարգիս Հացպանյանը: Ի դեպ, նրա փոխանցմամբ՝ նախարարի հետ կալանավայրեր են գնացել նաեւ իր տեղակալները եւ ՔԿՀ վարչության պետ Հայկ Հարությունյանը:



Լուսինե ՇԱՀՎԵՐԴՅԱՆ