«Նախանձելի» շուկաներն ու արգելված բացօթյա առեւտուրը

Փողոցային առեւտրի դեմ պայքարի դուրս եկած Երեւանի  քաղաքապետ Կարեն Կարապետյանին, փաստորեն, հաջողվեց ոստիկանների միջոցով մաքրել Երեւանի մայթերը տարատեսակ ապրանքներ (թերթերից սկսած, գյուղապրանքներով վերջացրած) վաճառող մարդկանցից:



Շուրջ տասնհինգ օր է, ապրում ենք «մաքուր» Երեւանում: Բայց այնպես չէ, որ քաղաքապետին չի «մտահոգում» այդ մարդկանց ճակատագիրը: Չնայած երկու օր առաջ բացօթյա առեւտրի արգելման իր որոշմանն անդրադառնալիս էլ Կարեն Կարապետյանը հայտարարել էր, թե պետք է անօրինական ոչ մի բան չլինի քաղաքում, անկախ նրանից՝ դա մեզ դուր է գալիս, թե ոչ, այդուհանդերձ քաղաքապետն աչքալուսանք էր տվել եկամտից զրկած մարդկանց ու հայտարարել, որ այս պահին մեր գործող օրինական շուկաներում երեք հազարից  ավելի տեղ կա (ի դեպ, քաղաքապետարանի տվյալներով, փողոցային առեւտրով զբաղվում է հենց 3 հազար մարդ, մինչդեռ փողոցային առեւտրով զբաղվողները նշում էին, որ այդ թիվը գերազանցում է 10 հազարը):



Ինչեւէ, քաղաքապետն ասել էր նաեւ, որ տնտեսվարողների հետ համաձայնություն են ձեռք բերել սկզբնական շրջանում տեղերը տրամադրել անվճար: Հետաքրքիր է՝ քաղաքային իշխանությունների եւ շուկայի տերերի միջեւ արդյո՞ք  պայմանավորվածություն ձեռք չի բերվել՝ առաջին ամիսներին այդ մարդկանց շուկայի տեղերի ցածր գների «կտով» շուկա բերել եւ հետո իրական գներ դնել:



Փաստորեն, հակառակ փողոցային առեւտրով զբաղվողների դժգոհություններին, Երեւանի շուկաներում առեւտրականները փոքր գումարներ են վճարում եւ նախանձելի պայմաններով աշխատում շուկաների տնօրինությունների հետ: Օրինակ, Գումի շուկայի փոխտնօրեն Յուրա Ումրումյանը մեզ փորձում էր հավատացնել, որ առեւտրականը մեկ օրվա համար տնօրինությանը վճարում է 300-500 դրամ:



Ավելին՝ փօխտնօրենն ասաց, որ լինում են օրեր, երբ իրենք առեւտուր չարած մարդկանցից գումար չեն վերցնում: Գումի շուկայում ազատ տեղեր շատ կան, սակայն, Ումրումյանի տեղեկացմամբ՝ նախկինում փողոցային առեւտրով զբաղվող երկու մարդ է եկել իրենց մոտ: «Դրանք բանջարեղենի առեւտրով զբաղվողներ են, որոնց հետ պայմանավորվածություն ենք ձեռք բերել՝ առաջին մեկ ամսում գումար չվերցնել»,-ասաց շուկայի փոխտնօրենն ու հավելեց, որ այդկերպ են վարվելու շուկա եկած բոլոր մարդկանց հետ:



Վստահեցրեց նաեւ, որ հետագայում էլ նրանցից գանձվելու է 300-500 դրամ՝ ոչ ավելի: Ի դեպ, երբ փորձեցինք շուկայի հենց վաճառողներից իմանալ, թե իրենք ինչքան գումար են օրական վճարում, նրանք վախեցած նայում էին շուկայում շրջող հսկիչներին եւ նրանց մատնացույց անում՝ «իրենցից հարցրեք»:



Ի տարբերություն Գումի,  «Պրոսպեկտի շուկայում» վաճառողները խոսեցին, եւ նրանցից իմացանք, որ մեկ սեղան զբաղեցնող առեւտրականը վճարում է 1000-1200 դրամ, իսկ եթե սեղանը բաժանված է մի քանի հոգու միջեւ, գումարը կիսվում է հավասարաչափ: «Պրոսպեկտի շուկայի» փոխտնօրեն Մհեր Մովսիսյանի տեղեկացմամբ էլ՝ իրենց մոտ բազմաթիվ ազատ տեղեր կան, սակայն շուկան դեռ մեկ առեւտրականով է համալրվել:



Նրան, ի դեպ, անվճար տեղ չի տրամադրվել: «Դե նա մի օր վճարում ա, մի օր` չէ, 1500 դրամանոց տեղի համար 300 դրամ ենք վերցնում»,-ասաց Մովսիսյանը: Նրա խոսքով՝ շուկայում լավ պայմաններ են, սակայն փողոցային առեւտրով զբաղվողները «չեն գա շուկա, որովհետեւ անհամեմատելի են շուկայի եւ փողոցի առեւտրի չափերն ու եկամուտը»: «Մարդը մի լիմոնի համար հաստատ չի մտնի շուկա, իսկ փողոցում հանդիպելիս հաստատ կառնի»,-ասաց նա:



Լուսինե ՇԱՀՎԵՐԴՅԱՆ