Բացառություն արեցինք ուղղակի

Երեկ չնայած Ազատության հրապարակը պաշարված էր ոստիկաններով, երեկոյան ընդդիմության ներկայացուցիչների հետ բանակցություններից հետո ոստիկանական օղակը ճեղքվեց, ժողովուրդը ներխուժեց հրապարակ, իսկ ոստիկանները, առանց որեւէ մեկին հրելու ու ծեծելու, հեռացան հրապարակից:



Հստակ էր, որ ցուցարարներին չքաշքշելու ցուցմունք էր տրվել վերեւից: Հիշեցնենք, որ այս օրերին Հայաստանում են գտնվում ԵԽԽՎ Մոնիտորինգի հանձնաժողովի Հայաստանի հարցով համազեկուցողներ Ջոն Պրեսկոտն ու Ակսել Ֆիշերը: Իսկ այսօր տարածաշրջանային այցի շրջանակում Հայաստան է ժամանում նաեւ ԵԱՀԿ գործող նախագահ Ադրոնիուս Աժուբալիսը: Ընդդիմության կողմից Ազատության հրապարակի երեկվա նվաճումից հետո Հյուսիսային պողոտայում հանդիպեցինք Երեւանի ոստիկանապետ Ներսիկ Նազարյանին ու զրուցեցինք նրա հետ:



- Պարոն Նազարյան, Դուք հրահա՞նգ ստացաք՝ լքելու հրապարակը:



- Չէ, մենք մեր ծառայությունը տանում ենք, ինչի՞ լքելու:



- Ուղղակի տեսնում եմ, որ հեռանում եք հրապարակից:



- Չէ, ուղղակի քայլում ենք, էնտեղ հեռախոս չի բռնում, գալիս ենք էս կողմ, որ հեռախոսով խոսանք: Էնտեղ հեռախոսով խոսալ չի լինում: Բանակցեցինք, խոսեցինք իրար հետ, որ էնտեղ խաղահրապարակ կա, չեն վնասի, պայմանավորվեցինք, որ նորմալ, հանգիստ անցկացվի: Ճիշտ է՝ իրանք խախտեցին իրենց գրաֆիկը: Քաղաքապետարան դիմումի համաձայն՝ պետք է երթով գնային Ամիրյան փողոց, հրապարակ, Նալբանդյան եւ գային էստեղ՝ Հյուսիսային պողոտա, բայց իրենք խախտեցին: Ուղղակի մենք չուզեցանք, որ լարվածություն լինի, եւ որոշում կայացվեց, որ եթե ուզում են, թող անցկացնեն էնտեղ: Բայց իմ անհանգստությունն է, որ երեխաների խաղահրապարակին վնաս չլինի:



- Բայց սա կարող է եւ շարունակություն ունենալ ու նստացույց լինի:



- Ես չեմ կարող բացառել: Մենք ամեն ինչին պատրաստ ենք, որ անկարգություններ չլինեն:



- Այսինքն եթե նստացույց լինի, թույլ կտա՞ք:



- Ոչ:



- Ինչո՞ւ:



- Չի կարելի: Օպերայի շենքի մոտ ինչ-որ մարդիկ միջոցառումներ են անում ամեն օր, ներկայացումներ կան: Չի կարելի: Իրենց ժամանակը մինչեւ ժամը 11-ն է՝ ըստ հայտի: Կարող են մինչեւ 11-ը հանրահավաք անեն եւ նորմալ դուրս գան-գնան: Պարտադիր չի խախտել որեւէ բան:



- Իսկ այսoրվա բացառությունը կապ ունե՞ր այն հանգամանքի հետ, որ Հայաստանում են գտնվում Հայաստանի հարցով ԵԽԽՎ համազեկուցողները, ԵԱՀԿ գործող նախագահը: Ասել է թե՝ այս հանդուրժողականությունը դրսի մարդկանց ինչ-որ բան ցույց տալու համար էր:



- Բացարձակ: Մենք ոչ արգելել ենք, ոչ բան: Նրանք էլ լավ հասկանում են՝ որտեղ թույլատրվում ա, էնտեղ պետք ա անել: Իսկ իրենց մոտ տենց չի՞: Որտեղ թույլ են տալիս, էնտեղ է արվում:



- Պարոն Նազարյան, սա նշանակո՞ւմ է, որ իշխանությունը, ի դեմս ոստիկանության, հանձնեց Ազատության հրապարակը:



- Ո՞ւմ հանձնեց:



- Ընդդիմությանը:



- Սա համընդհանուր հրապարակ ա: Ի՞նչ ա նշանակում՝ հանձնեց: Համընդհանուր հրապարակ է, եւ երբեք չի եղել, որ իրենք դիմեն, իշխանությունները թույլ չտան հանրահավաք անել: Բայց տեղ կա անելու, ժամ կա: Եվ պայմանավորվածությունը եղավ, խախտեցին իրենք: Կարող է մի անգամ բացառություն արեցինք ուղղակի:



- Ասել է թե՝ հաջորդ անգամ նման բացառություն չի՞ լինի:



- Ասում են՝ երբեք մի ասեք՝ երբեք, բայց եթե նորմալ պահեն իրենց, անկարգություններ չլինի, եթե քաղաքում չորոշեն ինչ-որ անկարգություններ անեն, հնարավոր է բանակցենք: Երբ որ ամեն ինչը նորմալ ա լինում, մենք ինքներս տրամադրված ենք լինում, որ...: Պետք չի էդ ամեն ինչը կապել ղեկավարության հետ: Հասարակական կարգի պատասխանատուն մենք ենք, ես եմ: Պետք չի կապել՝ իրանք որոշեցին, թողեցին, չթողեցին: Դա մեր որոշումն էր, իմ եւ պարոն Աֆյանի:



- Նախորդ հանրահավաքների ժամանակ ոստիկանությունն անգամ թույլ չի տվել մոտենալ Ազատության հրապարակին: Նաեւ այսօր ցերեկը բռնություն է կիրառվել հրապարակ մտնել փորձող «Ժառանգության» փոխնախագահ Ռուբեն Հակոբյանի նկատմամբ, ում թույլ չէին տալիս մտնել հրապարակ:



- Տենց բան չկա: Ամբողջ օրը ով ուզեցել ա, մտել ա, ինչքան ուզեցել ա, մտել ա՝ եւ ՀԱԿ-ի անդամները, եւ սովորական ժողովուրդը: Նման բան բացառվում ա:



- Իսկ «Ազատություն» ռադիոկայանի վիդեոկադրե՞րը:



- Ի՞նչ կադրեր: Ես տեղյակ չեմ:



- Պարոն Նազարյան, փաստորեն, այսօր կրկին փակ էին ճանապարհները, մարդիկ չէին կարողանում գալ քաղաք:



- Ո՞ր ճանապարհները: Նման բան չկա, մի հատ օրինակ բերեք:



- Մեր խմբագրությունն այսօր առավոտվանից ահազանգեր է ստանում մարզերի քաղաքացիներից, որ չեն կարողանում Երեւան գալ: Տաքսիստների վարորդական վկայականներն են հավաքել, սպառնացել են տուգանել:



- Մեր ոստիկանապետը լավ բան ասեց. մարդ կա՝ չի ուզում գա, ասում ա՝ ճամփեն փակ ա:



- Պարոն Նազարյան, եթե բարձրաստիճան եվրոպացիները Երեւանում չլինեն, ի՞նչ է սպասվելու ընդդիմությանը, որը հավանաբար հաջորդ անգամ եւս կփորձի մտնել հրապարակ:



- Իսկ ինչի՞ անպայման պիտի փորձեն մտնել էնտեղ:



- Այսօր արդեն մարդիկ իրար շնորհավորում էին: Հնարավոր է նաեւ շուրջօրյա հանրահավաքներ սկսվեն:



- Թույլ չենք տա նման բան: Մնալ, փակել՝ թույլ չի տրվելու: Ես Ձեզ ասեմ:



- Հիմիկվանից սպառնո՞ւմ եք ընդդիմությանը:



- Չէ, ինչի՞ եմ սպառնում: Իրենց ժամկետի մեջ՝ խնդրեմ, թող անեն: Թույլ չենք տա մտնեն, ինչ-որ պալատկաներ խփեն, թույլ չենք տա նման բան:



- Իսկ ի՞նչ կանեք այդ դեպքում:



- Հասարակական կարգը կպահպանենք: