Մե լողնալմ էր՝ էդ էլ գլխներիցս կկտրեն

«Մե լողնալմ էր՝ էդ էլ գլխներիցս կկտրեն,  իրանց խելացի մարդ օր պետք չէ, ըդիկ պարզ դառավ, բայց մունդառ մարդն ի՞նչ բըդի էնե»,- «Մկրտիչ» բաղնիքի վրա փակվելու մասին, փակցված գրությունը հայտնաբերելով՝ ասում են տարեց գյումրեցիները: Մի ժամանակ գյումրեցիների  ամենանախընտրած վայրերից մեկը բաղնիքն էր, սակայն երկրաշարժից հետո, ի թիվս շատ բաների, մոռացվեց նաեւ բաղնիք գնալը:



«Մենք մեր տաշտի մեջը  կռուշկեմ ջուր չէինք կռնա վրեքս լցնեինք, բաղնիք բդի էրտայի՞նք»,- ասում էին  գյումրեցիները: Հետո կամաց-կամաց սկսեց այդ ավանդույթը վերականգնվել, այն էլ երկար չտեւեց. հարկայինը հիմա էլ բաղնիքների բկին է չոքել:



Գյումրու բաղնիքները հարկային դաշտից դուրս չեն, պարզապես «հարկն են հազարապատկել՝ էլ տարածքի հարկ, էլ հողի հարկ, էլ գույքի հարկ: Է, մենք ըդքան եկամուտ ստանո՞ւմ ենք, որ ըդքան հարկ տանք»,- ասում են բաղնիքների սեփականատերերը: «Մկրտիչ» բաղնիքի սեփականատեր Արթուր Սարգսյանն ու ընկերը 1998-ին  բաղնիք են բացել, որը գործել է մինչեւ 2001թվականը: «Փակեցինք, որովհետեւ մեկ ամսվա համար մեզնից 1մլն դրամ փող կուզեին, երբ որ մեր 2 տարվա եկամուտը հազիվ ըդքան էղներ: 2003-ի հունվարի 10-ին բացեցինք էս մեկը, էդ ժամանակ հլը գազը չէին թանկացրել:



Սկզբից 18 ցնցուղ ունեինք, հետո հաճախորդները քչցան՝ դարձրինք 10 ու փորձեցինք դուշերի քանակով հարկայինին  հաշվետվություն ներկայացնել: Հարկայինին էլ բան է պետք՝ եկան ու 190 հազար դրամ տուգանեցին: Մենք էլ դրեցինք ու փակեցինք: Ճիշտ է, հմի սաղ քաղաքը գազ ունի, բայց ձմեռը  տները ցուրտ կեղնի, բաղնիք կուգային: 5 հոգի կաշխատեին, լավ էր, էլի հացի փող կեղներ»,- վրդովմունքը չզսպելով՝ ասում է բաղնիքի սեփականատերը: Քաղաքում մի քանի բաղնիքներ եւս արժանացել են այս ճակատագրին:



Pres.am