Իսկ այլ հիվանդանոցներում ի՞նչ է տեղի ունենում
hraparak
20 Մայիս 2011 | 10:50
0
Մայիսի 3-ին «Սուրբ Աստվածամայր» հիվանդանոցում տեղի ունեցած խայտառակ դեպքից հետո, երբ վիրահատվող երեխային՝ 4-ամյա Գեւորգ Մովսիսյանին շփոթել էին մեկ այլ երեխայի՝ Նարեկ Դանիելյանի հետ եւ միայն ծնողների բարձրացրած աղմուկից հետո իջեցրել վիրահատական սեղանից, թեեւ մի շարք աշխատակիցներ աշխատանքից ազատվեցին, սակայն տնօրեն Նիկոլայ Դալլաքյանի պաշտոնանկության հարցը մնաց օդում կախված: Քաղաքապետարանի մեր աղբյուրների փոխանցմամբ՝ առողջապահության նախարարությունից հրահանգ է եղել աշխատանքից հեռացնել նաեւ հիվանդանոցի տնօրեն Դալլաքյանին, սակայն «Գրիգոր Լուսավորիչ» հիվանդանոցի տնօրեն, Երեւանի ավագանու ՀՀԿ անդամ Արա Մինասյանի միջնորդությամբ, ով Դալլաքյանի մտերիմն է, Երեւանի քաղաքապետ Կարեն Կարապետյանը բավարարվել է խիստ նկատողություն հայտարարելով եւ քննարկելով հետագա պաշտոնավարման նպատակահարմարությունը:
Նշենք, որ նախօրեին առողջապահության նախարար Հարություն Քուշկյանն այցելել է «Սուրբ Աստվածամայր» հիվանդանոց, շրջայց կատարել ու իր դժգոհությունը հայտնել տիրող վիճակի վերաբերյալ: Չգիտես ինչու՝ այս դեպքը հայտնվել է նախարարի ուշադրության կենտրոնում, նրա խորհրդական Վահան Պողոսյանն է ամեն Աստծո օր այցելում հիվանդանոց՝ ստուգումներ իրականացնելու:
Այնպիսի տպավորություն է, կարծես միայն «Սուրբ Աստվածածին» բժշկական կենտրոնում են ոչ պրոֆեսիոնալիզմի ու տգիտության հետեւանքով դեպքեր գրանցվում:
Մինչդեռ այլ հիվանդանոցներում մասնագիտական թերացումների հետեւանքով մահվան ելքերով դեպքերը կոծկվում են ու հավիտյան մոռացության մատնվում: Իսկ այս հիվանդանոցում նաեւ բարեգործություն են անում եւ որոշ մասնագետներ շատ դրական են արտահայտվում գլխավոր բժշկի հասցեին:
Կարծիքներ