Իմ զենքն իմ գիրքն է

Սոցիալական ցանցերի քննարկման թեման վերջին օրերին ԲՀԿ առաջնորդ Գագիկ Ծառուկյանի` 2010 թվականին լույս տեսած «Հայաստանը եւ ՅՈւՆԵՍԿՕ-ն» գիրքն էր: Գագիկ Ծառուկյանի գրքի թեման, կարելի է ասել, «բացել էր» ֆեյսբուքահայությանը: Շաբաթ-կիրակի օրերին դա ամենաշատ մեկնաբանվող տեղեկությունն էր. կային մի քանի հարյուր մեկնաբանություններ: Ընդ որում՝ գիրքն անգլերեն լեզվով է: Այդ մասին տեղեկացրել է  Ինֆորմատիզացիայի միջազգային ակադեմիայի (International Informatization Academy) կայք-էջը (iia.ca):



ԲՀԿ պատասխանը չուշացավ: Հարցին խառնվեց ԱԺ եվրաինտեգրման հանձնաժողովի նախագահ Նաիրա Զոհրաբյանը՝ բացահայտելով, որ Ծառուկյանին պարզապես նախանձում են:



«Եվ ուղղակի անհարմար, եւ մեր երկրի համար խիստ անպատվաբեր է, որ Գագիկ Ծառուկյանի կողմից նախաձեռնված եւ ֆինանսավորված այդ լրջագույն աշխատության շուրջ նման էժանագին աղմուկ բարձրացնելով՝ որոշ մարդիկ ուղղակի ջուր են լցնում մեր թշնամիների ջրաղացին, որոնք հրաշալի գիտակցում են, որ այս գիրքը ոչնչացնում է հայկական մշակութային ժառանգության հարցում թուրք-ադրբեջանական դաշինքի քարոզչական հետեւողական ստահոդ հրապարակումները»,- «7օր» կայքին ասել է Նաիրա Զոհրաբյանը՝ շարունակելով. «Վերջերս անգլիացի գիտնականները պարզել են, որ նախանձը կրճատում է մարդու կյանքի տեւողությունը։ Որոշ մարդկանց ուղղակի խորհուրդ եմ տալիս մտածել անգլիացի գիտնականների այս եզրահանգման մասին»։



Քանի որ թեման լայն մասսաների քննարկման առարկա է դարձել, մի քանի հարց ուղղեցինք Գագիկ Ծառուկյանի մամուլի խոսնակ Խաչիկ Գալստյանին:



- ՅՈւՆԵՍԿՕ-ի հատկապես ո՞ր գործունեությանն ու առաքելությանն է անդրադարձ եղել պարոն Ծառուկյանի գրքում, եւ ի՞նչ նպատակ ունի այդ գիրքը:



-  Այդ գրքի նախաձեռնությունը պատկանում է պարոն Ծառուկյանին, ոչ թե ինքն այդ գիրքը գրել, նոր բաներ է էդտեղ շարադրել, այլ որպես նախաձեռնություն, որպես գաղափար, իդեայի ներկայացնող, պարոն Ծառուկյանը՝ Ինֆորմատիզացիայի միջազգային ակադեմիայի հետ դեռեւս 2008 թ. համագործակցության արդյունքում այդպիսի գաղափար է առաջադրել, որ մենք ունենանք անգլալեզու այնպիսի աշխատություն, որտեղ ներկայացված լինի հայ ժողովրդի պատմամշակութային ողջ ժառանգությունը, որն այսօր գտնվում է Հայաստանի սահմաններից դուրս: Այդ գիրքը դրա մասին է պատմում:



Գիրքն ուղղված է արտաքին լսարանին եւ մեկ տարվա ընթացքում՝ 2010-ին լույս տեսնելուց հետո բաժանվել է տարբեր միջազգային կառույցների ու կազմակերպությունների: Հատկապես, թե ժամանակակից Թուրքայի տարածքում հայ ժողովուրդն ինչպիսի պատմական մշակութային ժառանգություն է թողել:



-  Պատմական ակնարկները, ուսումնասիրություններն արել է պարոն Ծառուկյա՞նը:



- Պարոն Ծառուկյանը նախաձեռնողն է եղել ընդամենը գաղափարի: Ոչ մեկը չի ասել, որ պարոն Ծառուկյանն էդ գիրքը գրել է:



- Բայց չէ՞ որ ներկայացվում է, որ հեղինակը ինքն է:



- Եթե պաշտոնական կայքը բացեք, կտեսնեք, որ դա պարոն Ծառուկյանի նախաձեռնությունն է ուղղակի: Էնտեղ գրված է՝ intitiated by Gagik Tcarukyan (ըստ որոշ լրատվամիջոցների՝ հրապարակայնացումից հետո վերոնշյալ կայքում տեղի է ունեցել տեքստի փոփոխություն, ըստ որի` Ծառուկյանը ոչ թե գրքի հեղինակն է, այլ դրա նախաձեռնողն ու ոգեշնչողը՝ Մ.Խ):



- Իսկ մենք այդպիսի գրականություն չունեի՞նք, որ պարոն Ծառուկյանը նման բան է նախաձեռնել:



- Եթե ունենք, ցույց տվեք: Էնտեղ աշխատել է գիտական խումբ: Հրատարակվել է Վանկուվերում՝ Կանադայում: Շատ են խոսում ինֆորմացիոն պատերազմների մասին եւ այլն: Սա կոնկրետ գործ է, կոնկրետ արդյունք է, որ թուրքական ու ադրբեջանական ստահոդ քարոզչական ագրեսիային որեւիցե պատասխան լինի: Իսկ որոշ ճղճիմներ վերցրել, ներքին ինչ-որ վայնասունի առարկա են դարձրել: Դա ուղղակի ծիծաղելի է:



- Ասել է թե սա պարոն Ծառուկյանի կողմից կոնկրետ «զե՞նք է»՝ արտաքին քաղաքական մարտահրավերներին ուղղված:



- Պարոն Ծառուկյանը հենց էդ իդեան է հովանավորել, հենց այդ գաղափարն է նախաձեռնել, որ, այո, մեր ժողովրդի հարուստ պատմությունը մատչելի լեզվով կարողանանք օտարներին ներկայացնել:



-  Սա նշանակո՞ւմ է, որ պարոն Ծառուկյանը նաեւ արտաքին քաղաքականությամբ է զբաղվում այսօր:



- Պարոն Ծառուկյանը կուսակցության ղեկավար է, իսկ մեր կուսակցությունն ունի եւ իր արտաքին քաղաքական ուղենիշները, էնպես որ, ի՞նչ է նշանակում՝ զբաղվում է  արտաքին քաղաքականությամբ: Բոլոր այն հիմնահարցերը, որոնք առնչվում են մեր ազգը, մեր պետությունը, մեր ժողովրդին միջազգային կառույցներում հավուր պատշաճի ներկայացնելուն, դրանք բոլորն էլ պարոն Ծառուկյանի հետաքրքրության շրջանակներում են:



- Այ, Դուք ասում եք՝ գիտական խորհուրդ է աշխատել գրքի վրա: Հետաքրքիր է, ինքը՝ պարոն Ծառուկյանը, կարդացե՞լ է այդ գիրքը:



- Իհարկե, էդ գիտնականներն առանձին դետալներ տարիների ընթացքում քննարկել են: Նորից եմ ասում՝ այդ համագործակցությունը սկսվել է 2006-ին:



- Դուք ասացիք նաեւ՝ անգլերեն է գիրքը՝ պարոն Ծառուկյանը...



- Այո, անգլերենով է թարգմանվել, որ դա մատչելի լինի դրսին: Նորից եմ ասում՝ դա արտաքին լսարանին է ուղղված: Բա ի՞նչ՝ հայերենո՞վ թարգմանվեր հարյուր հազարավոր էն գրքերի պես, որը ոչ մեկը չի կարդում:



- Իսկ ի՞նչ արձագանքներ կան դրսից՝ հատկապես Ադրբեջանից, Թուրքիայից:



- Ադրբեջանից, Թուրքիայից արձագանքներին ես այս պահին ծանոթ չեմ: Կարող եք դիմել ակադեմիային: