Ողբամ զքեզ, հա՛յ աշակերտ
Արձագանք «Նոր աղետ դպրոցի գլխին» հոդվածին
«Հրապարակ» թերթում սրտի ցավով կարդացի հարգարժան գործընկերոջս` ճանաչված վաստակավոր մանկավարժ Բ. Ստեփանյանի «Նոր աղետ դպրոցի գլխին» հոդվածն ու հասկացա, զգացի, ապրեցի դպրոցին մոտ կանգնած, նրա ապագայով անհանգստացող մանկավարժի տագնապը եւ հոգու խռովքը: Կարդացի, ու սիրտս ցավեց, ալեկոծվեց հոգիս… Ի՞նչ է դպրոցը՝ փորձաքա՞ր է, իսկ աշակերտը` թիրա՞խ, դասագիրք գրողներն էլ` դիպուկ նշանառունե՞ր, եւ ով փորձառու նշանառու է, նրա հեղինակած դասագիրքն էլ «հաղթում է» մրցույթում:
Երկար տարիներ դպրոցում դասավանդում եմ 5-11-րդ դասարաններում, ծանոթ եմ գրեթե բոլոր դասագրքերին. եղել են եւ հաջողված, եւ անհաջող ձեռնարկներ: Մանկավարժական տարբեր մեթոդներով եւ մոտեցումներով եմ վարել դասերս՝ հարթել, դյուրամարս դարձրել մատուցվող նյութի բարդությունները:
Երկուստեք (ուսուցիչ-աշակերտ) սիրով աշխատեցինք անվանի լեզվաբան Դ. Գյուրջինյանի «Մայրենի 5» եւ «Մայրենի 6» դասագրքերով: Ես այդ գրքերի մասին ժամանակին հոդվածով հանդես եմ եկել եւ իմ դրվատանքի խոսքն ուղղել հեղինակին: Համակցված ուսուցման համար նախատեսված այդ ձեռնարկները բավարարում են դասագրքին ներկայացվող բոլոր պահանջները` բովանդակային, գիտական, հոգեբանական, տարիքային եւ բազում այլ նկատառումներով: Այդպիսին պիտի լինի դասագիրքը. այն պիտի խոսի աշակերտի սրտի հետ, դառնա նրա զրուցակիցն ու լավագույն ուղեցույց-բարեկամը, խորհրդատուն: Դասագիրքը պիտի նոր որակներ դաստիարակի եւ բարեկրթի մատաղ սերնդին:
Ու երբ ուստարվա ավարտին պահանջես աշակերտից կարծիք գրել դասագրքերի վերաբերյալ, նրանք մեծ ոգեւորությամբ գտնեն, որ իրենց ոչ միայն այս կամ այն թեման է դուր եկել, այլեւ ողջ դասագիրքը: Սրտի դողով կարդալով դպրոցին սպասվող նոր աղետի մասին` որոշեցի «ktak.am»-ում զետեղված էջերով ծանոթանալ տիկին Մեյթիխանյանի՝ մրցութային հանձնաժողովում «հաղթած» ու անցած, դպրոց մտնելու իրավունք նվաճած (ահով եմ գրում այս տողերը) դասագրքի բովանդակությանը…
Ծանոթացա ու խորապես համոզվեցի, որ այն իսկապես վերադարձ է դեպի հինը եւ չի կարող բավարարել նորօրյա պահանջները, քանի որ լավ դասագիրքը կենսունակ է միայն այն դեպքում, երբ նա իր բովանդակությամբ եւ ոգով ուղղված է ապագային: «Հաղթած» դասագրքերը չունեն կառուցվածքային եւ բովանդակային այն ճշգրտությունը, որ աշակերտը չունենա օգնականի կամ խրթին մտքերը վերծանողի կարիք:
Դասագրքով երեխան պիտի աշխատի սիրով, չձանձրանալով, մինչդեռ նման խճճված մտածողությամբ, հոգնատանջ հարցումներով ու ավելորդ առաջադրանքներով (որն ի դեպ՝ հատուկ է տիկին Մեյթիխանյանին), բազմաթիվ վրիպակներով հագեցած այդ ձեռնարկներն իրոք կարող են աղետաբեր լինել ուսուցչի, աշակերտի գլխին: Մի լավ ասացվածք կա՝ տեղին է հիմա հիշելը, հատկապես Մեյթիխանյանին դուր կգա. «Ջանդ յուղի՛ր, ա՛յ ուսուցիչ», որ կարողանաս դժվարամարս մտքերը դյուրին ու հասկանալի հասցնել աշակերտին: Այսպիսի գրքի փոխարեն ավելի լավ է մնային հին դասագրքերը. չէ՞ որ «փորձած թանն ավելի լավ է անփորձ մածունից»:
Ասում են` գրքերն էլ ունեն իրենց ճակատագրերը: Համոզված եմ` այս դասագրքերը դպրոց մտնելով անգամ կարժանանան տխրահռչակ ճակատագրի:
Իսկ մինչ այդ գուցե ուշ չէ՞, գուցե դեռ կարո՞ղ ենք փրկել դպրոցն աղետից, փրկել ուսուցչին էլ, աշակերտին էլ:
ՀԳ - Գյուրջինյանի հոդվածները, ինչպես նաեւ Բ. Ստեփանյանի հոդվածը սույն հոդվածի հետ քննարկվել եւ հավանության են արժանացել դպրոցի հայոց լեզվի եւ գրականության առարկայական հանձնաժողովի անդամների կողմից` Ժ. Գրիգորյան, Մ. Ավետիքյան, Է. Սարգսյան եւ այլք:
Ջ.Հայրապետյան, թիվ 129 դպրոց
«Հրապարակ» թերթում սրտի ցավով կարդացի հարգարժան գործընկերոջս` ճանաչված վաստակավոր մանկավարժ Բ. Ստեփանյանի «Նոր աղետ դպրոցի գլխին» հոդվածն ու հասկացա, զգացի, ապրեցի դպրոցին մոտ կանգնած, նրա ապագայով անհանգստացող մանկավարժի տագնապը եւ հոգու խռովքը: Կարդացի, ու սիրտս ցավեց, ալեկոծվեց հոգիս… Ի՞նչ է դպրոցը՝ փորձաքա՞ր է, իսկ աշակերտը` թիրա՞խ, դասագիրք գրողներն էլ` դիպուկ նշանառունե՞ր, եւ ով փորձառու նշանառու է, նրա հեղինակած դասագիրքն էլ «հաղթում է» մրցույթում:
Երկար տարիներ դպրոցում դասավանդում եմ 5-11-րդ դասարաններում, ծանոթ եմ գրեթե բոլոր դասագրքերին. եղել են եւ հաջողված, եւ անհաջող ձեռնարկներ: Մանկավարժական տարբեր մեթոդներով եւ մոտեցումներով եմ վարել դասերս՝ հարթել, դյուրամարս դարձրել մատուցվող նյութի բարդությունները:
Երկուստեք (ուսուցիչ-աշակերտ) սիրով աշխատեցինք անվանի լեզվաբան Դ. Գյուրջինյանի «Մայրենի 5» եւ «Մայրենի 6» դասագրքերով: Ես այդ գրքերի մասին ժամանակին հոդվածով հանդես եմ եկել եւ իմ դրվատանքի խոսքն ուղղել հեղինակին: Համակցված ուսուցման համար նախատեսված այդ ձեռնարկները բավարարում են դասագրքին ներկայացվող բոլոր պահանջները` բովանդակային, գիտական, հոգեբանական, տարիքային եւ բազում այլ նկատառումներով: Այդպիսին պիտի լինի դասագիրքը. այն պիտի խոսի աշակերտի սրտի հետ, դառնա նրա զրուցակիցն ու լավագույն ուղեցույց-բարեկամը, խորհրդատուն: Դասագիրքը պիտի նոր որակներ դաստիարակի եւ բարեկրթի մատաղ սերնդին:
Ու երբ ուստարվա ավարտին պահանջես աշակերտից կարծիք գրել դասագրքերի վերաբերյալ, նրանք մեծ ոգեւորությամբ գտնեն, որ իրենց ոչ միայն այս կամ այն թեման է դուր եկել, այլեւ ողջ դասագիրքը: Սրտի դողով կարդալով դպրոցին սպասվող նոր աղետի մասին` որոշեցի «ktak.am»-ում զետեղված էջերով ծանոթանալ տիկին Մեյթիխանյանի՝ մրցութային հանձնաժողովում «հաղթած» ու անցած, դպրոց մտնելու իրավունք նվաճած (ահով եմ գրում այս տողերը) դասագրքի բովանդակությանը…
Ծանոթացա ու խորապես համոզվեցի, որ այն իսկապես վերադարձ է դեպի հինը եւ չի կարող բավարարել նորօրյա պահանջները, քանի որ լավ դասագիրքը կենսունակ է միայն այն դեպքում, երբ նա իր բովանդակությամբ եւ ոգով ուղղված է ապագային: «Հաղթած» դասագրքերը չունեն կառուցվածքային եւ բովանդակային այն ճշգրտությունը, որ աշակերտը չունենա օգնականի կամ խրթին մտքերը վերծանողի կարիք:
Դասագրքով երեխան պիտի աշխատի սիրով, չձանձրանալով, մինչդեռ նման խճճված մտածողությամբ, հոգնատանջ հարցումներով ու ավելորդ առաջադրանքներով (որն ի դեպ՝ հատուկ է տիկին Մեյթիխանյանին), բազմաթիվ վրիպակներով հագեցած այդ ձեռնարկներն իրոք կարող են աղետաբեր լինել ուսուցչի, աշակերտի գլխին: Մի լավ ասացվածք կա՝ տեղին է հիմա հիշելը, հատկապես Մեյթիխանյանին դուր կգա. «Ջանդ յուղի՛ր, ա՛յ ուսուցիչ», որ կարողանաս դժվարամարս մտքերը դյուրին ու հասկանալի հասցնել աշակերտին: Այսպիսի գրքի փոխարեն ավելի լավ է մնային հին դասագրքերը. չէ՞ որ «փորձած թանն ավելի լավ է անփորձ մածունից»:
Ասում են` գրքերն էլ ունեն իրենց ճակատագրերը: Համոզված եմ` այս դասագրքերը դպրոց մտնելով անգամ կարժանանան տխրահռչակ ճակատագրի:
Իսկ մինչ այդ գուցե ուշ չէ՞, գուցե դեռ կարո՞ղ ենք փրկել դպրոցն աղետից, փրկել ուսուցչին էլ, աշակերտին էլ:
ՀԳ - Գյուրջինյանի հոդվածները, ինչպես նաեւ Բ. Ստեփանյանի հոդվածը սույն հոդվածի հետ քննարկվել եւ հավանության են արժանացել դպրոցի հայոց լեզվի եւ գրականության առարկայական հանձնաժողովի անդամների կողմից` Ժ. Գրիգորյան, Մ. Ավետիքյան, Է. Սարգսյան եւ այլք:
Ջ.Հայրապետյան, թիվ 129 դպրոց
Կարծիքներ