Գյումրու քաղաքապետարանի հավաստիացմամբ՝ «Չերքեզի ձորի» որոշ հատվածներ վարձակալությամբ տրված են` հանգստյան գոտիներ ստեղծելու նպատակով

Գյումրու «Չերքեզի ձոր» կոչվող, երբեմնի ծառապատ ու գեղատեսիլ տարածքի, գյումրեցիների միակ հանգստյան գոտուն սպասվող ճակատագրի, ինչպես նաեւ ձորում տասնյակ անօթևան ընտանիքների կողմից տեղադրված տնակների եւ ձորի հարակից տարածքում կառուցված քարաշեն ու կիսաքարաշեն բնակելիների օրինականացման խնդրի վերաբերյալ «Շիրակ կենտրոնը» անցած ամիս հանդես էր եկել հայտարարությամբ, ինչպես նաեւ տեղեկատվության հարցում էր հղել Գյումրու քաղաքապետ Վարդան Ղուկասյանին: Ի զարմանս մեզ եւ ի տարբերություն նախորդ մեր հարցումների, քաղաքապետարանը այս անգամ բավականին արագ արձագանքեց, թեև ոչ բոլոր հարցերին է տվել սպառիչ պատասխան:

«Շիրակ կենտրոնի»  հունիսի 28-ին հրապարակած հայտարարությունում մասնավորապես ասվում էր (http://shirakcentre.org/hy/-/1010-shirak-centre-ngo).



«Վերջերս «Չերքեզի ձոր» են այցելել ինչ-որ անձինք եւ իբր թե սեփականաշնորհման համար բնակելիների ու զբաղեցրած տարածքների չափագրումներ են իրականացրել, դրա համար յուրաքանչյուր ընտանիքից գանձել են 20.000 - 30.000 դրամի չափով գումարներ: Բնակիչների պնդմամբ՝ գումարների գանձման վերաբերյալ որեւէ փաստաթուղթ իրենց չեն տվել, թաղամասում էլ ինքնակամ կառույցների օրինականացման գործընթաց մինչև օրս չի սկսվել:



- Արդյո՞ք Գյումրու քաղաքապետարանը տեղյակ է «Չերքեզի ձոր» թաղամասի բնակչությունից չափագրման և քարտեզագրման պատճառաբանությամբ գումարներ գանձելու դեպքի մասին,



- եթե կատարվել է անօրինական գործողություն,  արդյո՞ք այդ մասին տեղյակ  է պահվել իրավապահ մարմիններին,





- Գյումրիում ինքնակամ կառույցների օրինականացման նպատակով ո՞ր կազմակերպություններն են իրականացնում չափագրման եւ քարտեզագրման աշխատանքները,



- Գյումրու քաղաքապետարանն ի՞նչ ծրագրեր ունի այդ թաղամասի բնակելիների օրինականացման եւ առհասարակ «Չերքեզի ձորի» վերականգնման ու զարգացման համար,



- արդյո՞ք «Չերքեզի ձորի» տարածքից որոշ հատվածներ տրված են երկարաժամկետ վարձակալության որեւէ անհատի կամ կազմակերպության: Եթե այո, ապա ու՞մ, ի՞նչ հիմքով եւ քանի՞ տարի ժամանակով,



- եթե կանաչ տարածքը վերականգնելու նպատակով այնուամենայնիվ   բնակելիները ենթակա են քանդման, ապա ինչպե՞ս են լուծվելու այդ թաղամասում բնակվող ընտանիքների բնակարանային խնդիրները: Ինչպե՞ս է լուծվելու նաեւ այդ տարածքում գործող, Գյումրու ռուսական ռազմակայանին պատկանող հսկայական լվացքատունը տեղափոխելու հարցը, որի ծառայությունից օգտվող օրական տասնյակ բեռնատար մեքենաներ են մուտք գործում «Չերքեզի ձորի» կանաչ տարածք»:



Գյումրու  քաղաքապետարանի մամուլի քարտուղարությունը մոտ մեկ շաբաթ անց` հուլիսի 7-ին, «Շիրակ կենտրոնի» էլեկտրոնային հասցեով եւ մեր կայքում հրապարակման խնդրանքով, ի պատասխան Գյումրու «Չերքեզի ձոր» տարածքում ինքնակամ կառույցների օրինականացման խնդրի վերաբերյալ մեր տեղեկատվության հարցմանն ի պատասխան ուղարկել է պարզաբանում, որը ստորեւ ներկայացնում ենք ամբողջությամբ:



«Գյումրիի քաղաքապետարանը պարզաբանում է, որ Չերքեզի ձորի տարածքի բնակչությունից չափագրման եւ քարտեզագրման պատճառաբանությամբ գումարներ գանձելու կապակցությամբ, քաղաքապետարանն ահազանգ չի ստացել, հետեւաբար չէր կարող այդ հարցի մասին տեղեկացնել իրավապահ մարմիններին:



Գյումրու ինքնակամ կառույցների օրինականացման նպատակով չափագրման եւ քարտեզագրման աշխատանքներն իրականացվում են հանրապետությունում արտոնագրով գործող մի քանի կազմակերպությունների կողմից: Ուստի նշված տարածքի բնակիչների կողմից առաջ քաշած հարցերը սեփական նախաձեռնությամբ չափագրումների նպատակահարմարության վերաբերյալ, պետք է ուղղվեն նշյալ կազմակերպություններին:



Գյումրու  քաղաքապետարանը Չերքեզի ձորի հետագա վերականգնումը եւ զարգացումը իրականացրել եւ իրականացնելու է՝ հավատարիմ մնալով քաղաքի գլխավոր հատակագծին` որպես հանգստի գոտի:



Տեղեկացնենք, որ Գյումրու քաղաքապետարանի որդեգրած սկզբունքի համաձայն, ժամանակավոր կառույցները միանշանակ չեն օրինականացվելու, դրանք ենթակա են տեղահանման, իսկ ձորի մեջ գտնվող տները, միանշանակ, չեն  օրինականացվի:



Եվս մեկ անգամ շեշտենք, որ ձորի միայն վերևի հատվածում 50-60-ականներին կառուցված տների օրինականացման հարցը քաղաքապետարանը միշտ էլ պատրաստակամ է լուծելու:



Հարկ ենք համարում նշել, որ միայն հանգստի գոտիներ ստեղծելու նպատակով, թաղամասի որոշ հատվածներ քաղաքապետարանի կողմից տրված են վարձակալության: Ինչ մնում է թաղամասում բնակվողների բնակարանային խնդիրներին, ապա դրանք կլուծվեն համաձայն գործող օրենքի: Ի դեպ, ինչպես նշված է «Շիրակ կենտրոն» ՀԿ տեղեկատվություն ստանալու վերաբերյալ հարցման մեջ, թաղամասի բնակիչների գերակշիռ մասը պետության կողմից բնակարանային փոխհատուցման ենթակա չէ:



Հարցման մեջ նշված տարածքում գործող ռուսական ռազմակայանին պատկանող լվացքատան շենքի  խնդիրը կկարգավորվի ըստ տարածքի  կառուցապատման եւ կազմակերպման նախագծի»:



«Շիրակ կենտրոն» ՀԿ նախագահ Վահան Թումասյան