Մեկ ամիս առաջ Խարբերդում, հիմա՝ Մասիսում

Արդեն 5-6 օր է, ինչ Մասիս քաղաքի շրջակա գյուղերում՝ Նորաբաց, Դաշտավան, Դարակերտ եւ այլն, ծորակներից ժանգախառն ջուր է գալիս: Եվ սա առաջին ու միակ դեպքը չէ այդ շրջանում: Փորձեցինք «Հայջրմուղկոյուղուց» ճշտել՝ արդյո՞ք տեղյակ են եւ ինչ-որ միջոց ձեռնարկո՞ւմ են: Տեղեկատվության եւ հասարակայնության հետ կապերի վարչության պետ Հասմիկ Հարությունյանը պատասխանեց. «Վայրեր կան, որտեղ մենք գրաֆիկով ենք ջուրը տալիս, եւ շատ հնարավոր է, որ ժանգոտում լինի: Շատ դեպքերում էլ ժանգոտ ջուրը ներքին ցանցի մաշված ու փչացած լինելու հետեւանք է, որը մեր սահմանային գոտուց դուրս է: Մենք մայր ջրատարի մեջ միշտ մաքուր ջուր ենք տալիս: Իսկ այդ գյուղերի բնակիչները, որ բողոքում են, լավ կլինի մեզ էլ զանգեն-տեղեկացնեն, որպեսզի խնդիրը լուծենք»:  



Արդյոք ՀՀ առողջապահության նախարարության պետական հիգիենիկ եւ հակահամաճարակային տեսչությունում տեղյա՞կ են այդ մասին: Տեսչության պետի տեղակալ Ղազարոս Հակոբյանը պատասխանեց, որ այդ գյուղերի մասին կոնկրետ ինքը տեղյակ չէ, իսկ մոտ մեկ ամիս առաջ Խարբերդ գյուղում խմելու ջրից վարակվելու դեպք է գրանցվել` խոստացավ մյուս օրն ավելի մանրամասն տեղեկացնել: Հաջորդ օրն արդեն Արարատի մարզում էին, եւ Հակոբյանը հեռախոսը փոխանցեց Սարգսյանին, ով ավելի իրազեկ էր:



«Այս պահին մեր բժիշկն աշխատում է Դարակերտում: Մենք սովորաբար պլանային ջուր ենք վերցնում, ստուգել ենք, եւ վերջին ամսվա ընթացքում ընդամենը մեկ ինֆեկցիոն հիվանդ է եղել Դարակերտից՝ գյուղապետի 5 տարեկան թոռը: Իսկ մեկ ամիս առաջ Խարբերդում ջրի հետեւանքով աղիքային ինֆեկցիա ենք ունեցել, ընտանիքով Մասիսի հիվանդանոցում են պառկել, մի հոգի տեղափոխվել է «Էրեբունի» բժշկական կենտրոն, որտեղ էլ մահացել է երիկամային անբավարարությունից»,-  ասաց Սարգսյանը, ով չցանկացավ ներկայանալ:



Խոսքը 16-ամյա Լիլիթ Մուրադյանի մասին է, ով հունիսի 4-ին ծննդաբերել էր «Գրիգոր Նարեկացի» ծննդատանը եւ հուլիսի 3-ին մահացել «Էրեբունի» բժշկական կենտրոնում: «Ծննդաբերելուց հետո նորմալ վիճակում դուրս է գրվել: Մեկ օր հետո ընդունվել է մեզ մոտ աղիքային լուծի գանգատով, ինչի կապակցությամբ հետազոտվել է, բուժում է նշանակվել:Չորս օր հետո՝ ամսի 13-ին, քանի որ լուծը չէր դադարում, որոշվեց տեղափոխել Նորքի ինֆեկցիոն հիվանդանոց, ինչից հարազատները հրաժարվեցին՝ պատճառաբանելով, որ ամուսինը նույն ախտանիշներով պառկած է Մասիսի հիվանդանոցում, եւ տեղափոխվեց այնտեղ: Աղիքային նման երեւույթներ կային նաեւ ընտանիքի մյուս անդամների մոտ: Հետագայում պարզվեց, որ բնակավայրից, որտեղ իրենք ապրում են, նման երեւույթներով էլի հիվանդներ կան հիվանդանոցում պառկած, հավանաբար ջրի կամ սննդի հետ էր կապված: Մեկ օր հետո վիճակը կտրուկ վատացել է, եւ հունիսի 14-ին տեղափոխել են «Էրեբունի» բժշկական կենտրոն»,- տեղեկացնում է «Գրիգոր Նարեկացի» ծննդատան ծնարանի վարիչ Գագիկ Գեւորգյանը:



Իսկ Մասիսի հիվանդանոցի հակահամաճարակային բաժանմունքից համառորեն ժխտեցին՝ ջրից վարակված որեւէ մեկն իրենց մոտ չի պառկել, եւ նման դեպքեր չեն ունեցել, ապատեղեկատվություն է: «Մեզ մոտ տեղափոխվել է ծանր վիճակում՝ «աղիքային ինֆեկցիա» ախտորոշմամբ, անհայտ ծագմամբ հարուցիչով: Մենք արդեն գործ ենք ունեցել դրա բարդությունների, հետեւանքների հետ: Ես չգիտեմ՝ ջրից է, թե ջրից չէ, միգուցե ուտելիքից է»,- ասում է «Էրեբունի» բժշկական կենտրոնի վերակենդանացման բաժանմունքի վարիչ Հարություն Մանգոյանը:



Անկախ այս դեպքից, ոչ միայն Մասիսի շրջանում, այլեւ Հայաստանի մի շարք բնակավայրերում հաճախ է ժանգոտ կամ պղտոր ջուր հոսում: Ջուրը ժամանակացույցով բաշխելու հետեւանքո՞վ է, թե՞ մաշված ու փտած խողովակների, բայց փաստ է, որ այն տարբեր հիվանդությունների ու վարակների պատճառ է դառնում: Այսօր մաքուր ու անվնաս ջուր ունենալն անգամ լուրջ խնդիր է որոշ բնակավայրերում: Իսկ մենք 21-րդ դարում ենք ապրում:



Ֆելիքս Եղիազարյան