Արամը Լեւոնին սիրում է, Լեւոնը Արամին՝ ոչ

Ուրբաթ օրը լրագրողները ԵՊՀ ռեկտոր Արամ Սիմոնյանից հետաքրքրվեցին, թե ինչպիսին են բուհի ռեկտորի հարաբերությունները Սերժ Սարգսյանի եղբոր՝ Լեւոն Սարգսյանի հետ, ով ԵՊՀ աստվածաբանության ֆակուլտետի հայ եկեղեցու պատմության եւ եկեղեցաբանության ամբիոնի վարիչն է, Լեւոն Սարգսյա՞նն է ղեկավարում Արամ Սիմոնյանին, թե՞ Արամ Սիմոնյանը՝ Լեւոն Սարգսյանին: Արամ Սիմոնյանը պատասխանեց.



«Ես ղեկավարում եմ համալսարանը, պարոն Սարգսյանն ամբիոնի վարիչ է, եւ, որպես ամբիոնի վարիչ, բնականաբար, նա այն կարգուկանոնին է ենթարկվում, որին ենթարկվում են բոլոր համալսարանականները: Ես ընդհանրապես ավելորդ եմ համարում նման հարցադրումը, որովհետեւ նախ՝ Լեւոն Սարգսյանը բավականին հայտնի մասնագետ է, եւ դրանում կարող եք համոզվել, եթե ծանոթանաք նրա աշխատանքներին: Երկրորդ՝ Լեւոն Սարգսյանը համալսարանում, որպես անձնավորություն, իրեն պահում է շատ համեստ, շատ գործնական, եւ մեր հանդիպումները, որ սովորաբար լինում են աստվածաբանության ֆակուլտետում, միայն գործնական բնույթի են եւ վերաբերում են միայն աստվածաբանության ֆակուլտետի խնդիրներին: Որեւէ այլ տիպի հարաբերություններ` ղեկավարվելու, կառավարվելու եւ այլն, հավատացնում եմ, որ գոյություն չունի եւ չի կարող ունենալ»:



Սակայն ինքը՝ Լեւոն Սարգսյանն այսպիսի որակումներ չի տալիս Արամ Սիմոնյանին. մեր տեղեկություններով՝ անգամ չի թաքցնում, որ նրան համարում է անհաջող ռեկտոր: