Զրկել են եւ պատվավոր քաղաքացուց, եւ կուսակցությունից

Արարատ քաղաքի ավագանին անցած տարվա սեպտեմբերի 22-ին որոշում է կայացրել Արարատի նախկին քաղաքապետ Հակոբ Թովմասյանին Արարատ քաղաքի պատվավոր քաղաքացու կոչումից զրկելու մասին: Պատճառն այն է, որ «Արարատ ԲԿՏ» ԲԲԸ-ի ղեկավար Հ. Թովմասյանը  դատի է տվել 1500 քաղաքացու՝ պահանջելով վճարել կոմունալ տնտեսության մատուցած պարտքերի դիմաց: «Համայնքի ավագանին, լինելով ընտրողների հավաքական կամքի արտահայտողը, չէր կարող անարձագանք թողնել իր ընտրողների կողմից բարձրացված հարցերը»,- նշված է որոշման մեջ: Ավագանու 14 անդամներից 10-ը մասնակցել են նիստին, 1-ը ձեռնպահ է եղել, իսկ 9 անդամ կողմ է քվեարկել՝ գտնելով, որ «նախկին քաղաքապետն արարատցիներին վատություն է արել»:



Ի դեպ, Հակոբ Թովմասյանին պատվավոր քաղաքացու կոչում տրվել է 1999-ին՝ «ընդառաջելով բնակարանային կոմունալ տնտեսության կոլեկտիվի խնդրանքին, Հ. Թովմասյանի աշխատանքն ըստ արժանվույն գնահատելու, այն քաղաքի երիտասարդությանը որպես օրինակ ծառայեցնելու նպատակով եւ ծննդյան 30-ամյակի առթիվ»:



«30-ամյակիս տվել են, իսկ 40-ամյակիս՝ զրկել»,- կես կատակ, կես լուրջ ասում է Հ. Թովմասյանը: Նա ավագանու որոշումը բողոքարկել էր վարչական դատարան: Վեդու նստավայրում կայացած դատաքննությանը դատավոր Արթուր Պողոսյանն ամբողջությամբ անվավեր է ճանաչել ավագանու  որոշումը: Սակայն ավագանին բողոքարկել է վճիռը, եւ վերաքննիչ վարչական դատարանը (նախագահող դատավոր Աշոտ Սարգսյան) մասնակի բավարարել է հայցը:



Մասնավորապես այդ որոշման «1-ին կետն անվավեր ճանաչելու մասով բեկանել ՀՀ վարչական դատարանի 2011 թվականի մարտի 9-ի վճիռը եւ այդ մասով այն փոփոխել»։ Ըստ էության Թովմասյանը զրկվել է իր կոչումից: «Դիմել եմ վճռաբեկ, ես գտնում եմ, որ այդ վճիռն ապօրինի է: Ես համայնքի համար շատ բան եմ արել»,- ասաց Հ. Թովմասյանը:



Վերջինիս հեռացրել են նաեւ ՀՀԿ-ից: Տարածքային կառույցի այդ որոշումը եւս բողոքարկել է ՀՀԿ գործադիր վարչություն: