Եթե ամեն նախագահ գա-ասի՝ ես էս ծրագրով եմ գնում, ժողովուրդը կպայթի

Ըստ քաղաքական կուլիսային խոսակցությունների, գալիք ընտրություններին օրենսդիր մարմնի կազմը բավականին լուրջ  փոփոխությունների է ենթարկվելու: Գործարար աշխարհի ներկայացուցիչներին եւ ավագ սերնդին փոխարինելու է նոր սերունդը: ՀՀԿ-ական պատգամավոր  Աշոտ Աղաբաբյանի հետ (Բուռնաշ), որը եւ գործարար է, եւ ավագ սերնդի ներկայացուցիչ, շարունակեցինք մեր զրույցը այս թեմայի շուրջ: Մեր հարցին, թե առաջադրվելո՞ւ է գալիք խորհրդարանական ընտրություններին, առանց հապաղելու ասաց՝ իհարկե:



 - Բայց, խոսակցությունների համաձայն, ՀՀԿ ցուցակները բավականին թարմացվելու են: Ավագ սերնդի ներկայացուցիչներին, գործարար թեկնածուներին փոխարինելու են երիտասարդները: Դուք եւ ավագ սերնդից եք, եւ գործարար, առաջարկվե՞լ է զիջել տեղը նոր սերնդին:



- Մեր կուսակցությունը նման առաջարկ չի արել, ցուցակները կարող  է նորացվեն, բայց չեմ կարծում, որ նման բան կա, դա հնարովի է: Ես չեմ կարծում… Եթե նման բան լիներ, ես կլսեի: Կուսակցությունը նման խնդիր չունի, թե ով լինի պատգամավոր, ով չլինի: Կուսակցությունը խնդիր ունի իր պատգամավորական կորպուսը լրացնի, ու էդ մարդիկ կան: Բնականաբար հերթափոխ լինում է, օրինակ էս անգամ ես դնում եմ, բայց հաջորդ անգամ հնարավոր է ես ցանկություն չունենամ, ոչ թե ասեն` մի դիր: Բայց ես հիմի գիտեմ, որ ես պետք եմ:



- Ո՞ւմ:



- Հայրենիքիս, ո՞նց կարող եմ ինչ-որ մեկին պետք գալ՝ մենակ հայրենիքիս: Գիտեք ինչ, երբ որ ստեղ դու չես գնում, կարող է  վատը գնա: Ես չեմ ասում, որ ես շատ լավն եմ, բայց յուրաքանչյուրը պետք է պայքարի իր տեղի համար: Ինչ վերաբերվում է գործարարներին, երբեք էդպիսի բան չի եղել: Ես չեմ կարծում, որ նման թեմա լինի մեր կուսակցությունում: Ուղղակի պայմանավորված է նրանով, թե որ պատգամավորը ոնց է աշխատել իր ժողովրդի հետ:



- Պարոն Աղաբաբյան, Դուք ԱԺ-ում ակտիվ չեք, ելույթներով հանդես չեք գալիս: Ինչպե՞ս եք Ձեր պատգամավորական գործունեությունը ծառայեցնում այն շրջանի ժողովրդին, որի կողմից պատգամավոր եք ընտրվել:



- Բայց ես ինչի՞ պիտի ամբիոնի մոտից ելույթ ունենամ, երբ որ մենք ունենք ֆրակցիա, եւ այդ ֆրակցիայում որոշումներ կայացվում են, որոնք ներկայացնում են մեր երիտասարդ պատգամավորները. պարտադի՞ր է ես ներկայացնեմ, իմ տարիքը չի, որ ասեմ, թող երիտասարդներն ասեն, թող ճանաչվեն: Ինչ վերաբերվում է ծառայեցնելուն, ասեմ իմանաք՝ ժողովրդի հետ աշխատելը շատ բարդ բան է: Ես իմ ընտրատարածքում ունեմ բավականին լուրջ աշխատանքային շտաբ, որն իմ ընտրվելուց մինչեւ էսօր աշխատանքի մեջ է: Ու իմ շտաբը շատ լավ է աշխատում, ու ես հատ-հատ գիտեմ, թե իմ ընտրատարածքի գյուղերում ինչ է տեղի ունենում, որտեղ թաղում եղավ, որտեղ երեխա ծնվեց,  որտեղ ինչ դեպք է տեղի ունեցել: Եթե ես հանեմ մենակ իմ ծախսային մասը, թե ինչքան օգնություն եմ տվել ու ժողովրդի կողքը կանգնել, բացառիկ երեւույթ է, ես ամեն օր եմ աշխատել: Ճիշտ է, կարող է քիչ եմ հանդիպում, բայց իմ աշխատողներն ամեն ինչից տեղյակ են: Ձյունը ճանապարհները փակեց, մենք գումար տրամադրեցինք-բացեցինք, գյուղից գյուղ դպրոց գնացող երեխեքին ավտոբուսը տրամադրել ենք: Էդ ո՞ւմ հաշվին են անում: Որ դպրոցը խնդիր ունի՝ լուծել ենք, առաջին դասարանցիներին բոլորին գրենական պիտույքներով, ամեն ինչով ապահովել ենք, ինչ տրակտոր էր պետք, որ ծրագրով կա, գյուղը չի կարողացել կանխավճար տա, ես եմ տվել:



- Այնուամենայնիվ, Դուք ԱԺ նիստերից շատ բացակայող պատգամավորներից եք, Ձեր աշխատավարձից  բացակայության համար պահումներ եղա՞ն: Հովիկ Աբրահամյանը հայտարարել էր՝ անհարկի բացակայողների աշխատավարձից պահումներ է անելու` որպես տուգանք:



- Ես շատ քիչ եմ բացակայել: Հիմնականում նախանցյալ ու այս տարի, ահագին բուժումների մեջ եմ եղել, մի քանի վիրահատություններ եմ տարել: Ես հիմնավորել եմ իմ բացակայությունը համապատասխան բժշկական փաստաթղթերով: Իրոք էդպես է եղել:



- Ըստ մամուլում հայտնված հրապարակումների ու կուլիսային խոսակցությունների՝ ՀՀԿ-ԲՀԿ տարաձայնությունները գնալով ավելի են սրվում:  Դուք ինչպե՞ս եք վերաբերվում կոալիցիոն կուսակցությունների հարաբերություններին:



- Դուք չեք նայում կուսակցության ստրուկտուրային, կուսակցությունն ունի խորհուրդ, որտեղ քննարկվում է յուրաքանչյուր հարց: Խորհրդում որոշում է կայացվում հարցին ոնց մոտենալ, ես չեմ համարում, որ առանձին կուսակցականներ կամ պատգամավորներ, խորհրդի անդամներ, առանց որոշումը ձեռքին, ինչ-որ եզրակացություններ անեն, դա անձնավորվում է: Եթե որեւէ պատգամավոր իր կողմից եզրակացություն է անում՝ հարցը չքննարկված, դա իր խնդիրն է: Բայց հիմնականում ես հետեւում եմ խորհրդի որոշումներին… Լիդերները, որոնք հարց են ներկայացնում քննարկման, իրենք կարող են դա պատասխանել, ես ընդամենը կարող եմ եզրակացնել՝ փորձից ելնելով: Հիմի ԲՀԿ-ՀՀԿ փոխհարաբերությունների մասին էս ասեկոսեները չեմ համարում, որ ռեալ են, որովհետեւ մենք շատ լավ փոխհարաբերությունների մեջ ենք: Ես, որպես անձ, եւ Ծառուկյան Գագիկի, եւ ԲՀԿ պատգամավորական թեւի հետ էլ շատ հետաքրքիր կապեր ունենք: Էն իմաստով, որ խնդիր կա քննարկելու, կարող ենք քննարկել: ԲՀԿ-ն իր կողմից առաջարկություն անի, ես՝ իմ կողմից: Էնպես չի, որ մենք՝ որպես տղամարդիկ, իրար նկատմամբ լավ չենք, հարցեր առաջացնենք: Մարդը մարդու հետ կարա լավ ու վատ լինի, կուսակցականը կուսակցականի հետ ի՞նչ ունի՝ լավ ու վատ լինելու: Հարցեր են, որոնք քննարկվում են, դրանից մարդկային փոխհարաբերությունները չեն փոխվում:



- Բայց խոսքը քաղաքական փոխհարաբերությունների մասին է, ինչը նոր զարգացումներ է բերելու: Այդ կուսակցական  տարաձայնությունները պայմանավորվում են նաեւ Քոչարյան-Սարգսյան հարաբերությունների սրմամբ:  Օրինակ, Դուք վերլուծո՞ւմ եք ստեղծված իրավիճակը, ի՞նչ կարծիքի եք:



- Ես վերլուծություններ անում եմ, Քոչարյան-Սարգսյան փոխհարաբերությունների մեջ համոզված եմ, որ լարվածություն չկա, դա՝ առաջին: Երկրորդը. համոզված եմ, որ Քոչարյանի իշխանությունից հետո Սերժ Սարգսյանի իշխանությունը ոնց որ շարունակական է, այսինքն՝ բան չի փոխվել: Համարում եմ, որ մեր Հանրապետական կուսակցության հաջողություններից մեկն էլ դա է, որ մի նախագան ջահը հանձնում է մյուս նախագահին արտաքին քաղաքականության մեջ, որն ամենակարեւորն է: Չեմ գտնում, որ Սերժ Սարգսյանն ու Քոչարյանը շեղվել են ծրագրից, այսինքն՝ երկիրը մի ծրագիր պիտի ունենա, ու նախագան փոխվելուց էդ ծրագիրը պիտի շարունակվի: Եթե ամեն նախագահ գա-ասի՝ ես էս ծրագրով եմ գնում, էս ժողովուրդը կպայթի: Այսինքն հինը քանդեն, նորից սկսեն. չի լինում էդպես:



 - Իսկ Ձեր կանխատեսմամբ այս աշունն ինչպիսի՞ն է լինելու, ասում են՝ ընդդիմության պահանջները մասամբ կատարվելու են:



- Ոչ մի թեժ բան էլ չի լինելու: