Իմ ընտանիքի բյուջեի հաշվին ծաղկացրել եմ ամբողջ համայնքը

ԲՀԿ-ական պատգամավոր Ռուբեն Գեւորգյանը` Ծաղիկ Ռուբոն, ով եւս ներառված է ՀԱԿ-ի նշած ոչ լեգիտիմ 76 պատգամավորների ցանկում՝ իր ավտոտեխսպասարկման կետերով, մեզ հետ զրույցում ասաց, որ ինքն «անօրինական բաներ» շատ է արել, բայց օրինական պատգամավոր է: Ապա հատ-հատ թվարկեց իր «ապօրինի» գործունեությունը:



- Ես մի անգամ էլ եմ ասել՝ անօրինական բաներ արել եմ, որոնք Սահմանադրությամբ գրված չեն, օրինակ, օրենքին ոչ համապատասխան նետվել եմ ազգային գոյամաքառման, կազմել եւ հրամանատարն եմ եղել «Սասնա ծռեր» հզոր ու թուրքերի սարսափը տածող կամավորական ջոկատի: Օրինական  կարգով ընտրվել եմ Դավիթաշենի թաղապետ` դավիթաշենցիների ձայների բացարձակ քվեն շահելով, բայց անօրենք բավականին գործունեություն եմ ծավալել: Իմ ընտանիքի բյուջեի հաշվին ես ծաղկացրել եմ ամբողջ համայնքը, զրո կոպեկ բյուջե ունեցող այդ կիսակառույց թաղամասը: Անօրինական կարգով յոթ տարի իմ հաշվին հետպատերազմյան տարիներին  կերակրել եմ 600-700 անօգնական ծերերի ու երեխաների: Դրա համար Դավիթաշենում էդ տարիներին մուրացիկություն քիչ կար: Անօրինական «Սրբոց նահատակաց» եկեղեցին եմ կառուցել իմ սեփական հողատարածքի վրա՝ զոհված եղբայրներիս հիշատակին, հետագայում նվիրատվություն եմ արել Արարատյան թեմին:



- Ինչո՞ւ անօրինական:



- Չէ, ես անօրինական եմ արել, հետո օրինականացրել եմ իշխանությունների կողմից: Էն ժամանակ երկիրը խառը վիճակի մեջ էր... 1995-97թթ. երկու տարի շարունակ Դավիթաշենից քաղաքի կենտրոն աշխատացրել եմ 2 անվճար ավտոբուսներ՝ սոցիալապես վատ վիճակում հայտնված ուսանողների համար: Այսպիսի «անօրինականություններ» եմ թույլ տվել պատերազմից մինչ օրս:



- Որ էդքան բան արել եք, ուրեմն պիտի ա՞չք փակեն Ձեր՝ բիզնեսով զբաղվելու հանգամանքի վրա, որը ՀՀ Սահմանադրությամբ է արգելված:



- Չէ, ես դա չեմ ուզում ասեմ, Դուք ասում եք՝ անօրինական եք, ես էլ ասում եմ՝ անօրինական բաներ արել եմ, իսկ եթե Դուք շեշտում եք Ազգային ժողովի պահը, ես ասում եմ՝ բիզնես չունեմ, ես անգամ սեփականություն չունեմ, կարող ա ՀԱԿ-ն իր ամբողջ ուժերը մոբիլիզացնի՝ եկամուտների նախարարությունում իմ հայտարարագրերը նայի: Ես ընդամենը ունեմ «Մերսեդես» մակնիշի մեքենա, որով աշխատանքի եմ գնում-գալիս: Իմ ամբողջ ունեցվածքը, իմ բնակարանները՝ դրանք ես բաժանել եմ իմ երեխաների մեջ՝ վաղո՜ւց, շա՜տ վաղուց, իրենք են տնօրինում, ու հետո էդ ամեն ինչը ձեռք եմ բերել ոչ դեպուտատ ժամանակ, այլ քրտնաջան աշխատանքով:



- Այնուամենայնիվ, Դուք եւս «սեւ ցուցակում» եք, հնարավո՞ր է հաջորդ ընտրություններին Ձեզ դուրս թողնեն ԲՀԿ համամասնական ցուցակից:



- ՀԱԿ-ի էդ ցուցակն ամբողջ Հայաստանին է հայտնի, բայց այն շատ ծիծաղելի է, քանի որ սեփականություն ունենալը դեռ չի նշանակում բիզնեսով զբաղվել:



- Ուզում եք ասել, որ ոչ Դուք, ոչ էլ օրինակ Ձեր կուսակցության ղեկավարը բիզնեսով չե՞ք զբաղվում:



- Իհարկե ոչ: Անօրինականություններից են խոսում: Իսկ ՀԱԿ-ն օրինակ ուսումնասիրե՞լ է, որ, օրինակ, Գագիկ Ծառուկյանն էս տարիների ընթացքում ինչքան ներդրումներ ու բարեգործություններ է կատարել ազգային եւ սոցիալական ոլորտներում: Ինչո՞ւ դա չեն հետազոտում եւ մատնանշում:  Իսկ չէ՞ որ դա պետության մեջ առաջացնում է սոցիալական լարվածության թեթեւացում, արդյոք դա ազգային մեծ գործ չէ՞:



- ՀՀ Սահմանադրությունն արգելում է պատգամավորին բիզնես գործունեություն ծավալել, եւ բարեգործություններն արդարացում չեն կարող լինել:



- Սահմանադրությամբ շատ բան է արգելվում, արգելվում է մեկին օգնել, այսինքն ընդհանրապես ամրագրված չի՝ այսինչ ունեւորը պարտավոր է այսինչ չքավորին օգնել էսօրվա դրությամբ, բայց օգնում ենք, ինչը դուրս է գալիս  Սահմանադրության խախտո՞ւմ: Հա, շատ լավ օրենք է, որ պատգամավորը ձեռնարկատիրությամբ չպետք է զբաղվի, բայց էսօրվա դրությամբ՝ Աստծուն փառք, մեր գործարարներն էնքան ճկուն են, որ իրանք ունեն գործադիր տնօրեններ, որոնք էլ տնօրինում են իրենց բիզնեսին: Իսկ եթե էդ շարքում իրոք կան մարդիկ, որ բիզնեսով են զբաղվում, ես կողմ եմ:



- Իսկ Ձեր կարծիքով նման մարդիկ կա՞ն այդ ցուցակում:



- Ես ՀԱԿ-ի տվյալ ցուցակին բոլորովին համաձայն չեմ, եթե ՀԱԿ ցուցակում ենթադրենք շեշտել է Գեւորգյան Ռուբեն: Եթե ես տեսնում եմ իմ անունն էդ ցուցակում, որը ճշտությանը չի համապատասխանում, էդ ցուցակը ես անհեթեթ եմ համարում ամբողջապես:



- Այսինքն ոչ միայն Ձեր անունն է սխալ, այլեւ մնացած 75-ի՞:



- Իսկ ինչո՞ւ մենակ իմ անունը: Էնտեղ բազում անուններ կան, որ սխալ են: Ինչ է, որ մի երկուսն ասում են՝ ունի, ուրեմն ունի՞: Ինչ է, մենք դատավոր ենք, քննիչներ ենք: Ամեն մարդ իր բիզնես գաղտնիքն ունի, կարող ա մի ճապոնացի է զբաղվում մեկի բիզնեսով:



- Իսկ ինչ եք կարծում՝ Ձեզ կընդգրկե՞ն ԱԺ հաջորդ ընտրությունների համամասնական ցուցակում:



- Գիտեք, ԱԺ-ն ազգային արժեքներ կրողների դաշտ է: Ես հիմնականում լրացնում եմ էն դաշտը... այ օրինակ մի պահ պատկերացնենք՝ երբ ես ԱԺ-ում չհայտնվեի, ես նկատի ունեմ, որ իմ բացակայության պայմանում հայրենասիրական դաշտը դառել էր մի հնոտի Ազգային ժողով, եւ չգիտեին ուր նետեն, պարզապես կեսով չափ կարող եմ դրա մասին ասել, բայց էսօր ես լիարժեք լրացնում եմ հայրենասիրական դաշտը: Եթե կա մի մարդ, որ կլրացնի էդ դաշտը, ուրեմն կլինի Ռուբեն Գեւորգյան գումարած էդ մարդը, իսկ եթե մի քիչ ավել կհամարվի, խնդրեմ՝ ես իմ մանդատը վայր կդնեմ: Որովհետեւ Ազգային ժողովից է սկիզբ առնում ամեն ինչը. եթե մենք ունենանք հզոր օրենսդիր, շատ բան կփոխվի մեր կյանքում:



- Բոլոր պատգամավորները Ձեր ասելով ազգային արժեքներ կրողնե՞ր են:



- Բոլորովին ես դա չեմ ուզում ասել, բայց կան մի շարք պատգամավորներ էլ, որ արժեքներ չեն կրում, բայց, որպես պրոֆեսիոնալներ, հարկավոր են ԱԺ-ում: Չեմ էլ բացառում, որ կան շատ-շատ ուսյալ այլ գործիչներ, որոնք ոչ միայն ԱԺ-ն իրենց տեղը չէ, այլ իրենց սեփական ժողովրդի նկատմամբ թույն ու մաղձ են շնչում: Այնուամենայնիվ չեմ խուսափում ասել, որ ազգային արժեքներ կրողների դեֆիցիտ ունենք ԱԺ-ում: