Նիկողոսյանը ցանկանում է գնել «Դե ֆակտո» ամսագի՞րը

Նախօրեին մենք գրել էինք, որ Հայաստանի միջազգային երիտասարդական կենտրոնի տնօրեն Անդրանիկ Նիկողոսյանը 11 ինտերնետ կայք է գնել, որոնց մասին շուտով հրապարակային հայտարարություն կարվի: Երեկ «maxinfo.am» կայքը տեղեկացրեց, որ Նիկողոսյանը գնելու է նաեւ Մենուա Հարությունյանի ռուսալեզու «Դե ֆակտո» ամսագիրը: «slaq.am»-ի հիմնադիր Մենուա Հարությունյանը մեզ հետ զրույցում ասաց. «Բանակցություններ վարել ենք, քննարկել ենք տարբերակներ, բայց վերջնական եզրակացության չենք եկել: Հավանաբար գործարքը կկայանա»:



Պարզվեց՝ Մենուան «Դե ֆակտո»-ի միակ բաժնետերն է: Մեր հարցին, թե գործարքի մասին ի՞նչ կարծիքի է Ռուսաստանի հայերի միության նախագահ Արա Աբրահամյանը, որը հովանավորում էր ամսագրի ռուսաստանյան տպագրությունը, Մ. Հարությունյանն ասաց, որ պրն Աբրահամյանը կապ չունի ամսագրի հետ, պարզապես երբեմն աջակցել է:



Այլ աղբյուրից տեղեկացանք, որ ժամանակ առաջ Արա Աբրահամյանը ցանկացել է գնել ամսագիրը, սակայն գործարքն ինչ-ինչ պատճառներով չի կայացել: