Դիմորդների թիվը կրճատվել է

Անցած տարվա 210 դիմորդի փոխարեն այս տարի Երեւանի գեղարվեստի պետական ակադեմիան մոտ 100 դիմորդ է ունեցել, ինչը, ռեկտոր Արամ Իսաբեկյանի խոսքով, մյուս բուհերի համեմատ բարվոք ցուցանիշ է: Հիշեցնենք, որ այս տարի 12-ամյա ուսուցման անցնելու կապակցությամբ դպրոցները շրջանավարտներ ընդհանրապես չունեին:



Գեղարվեստի ակադեմիայում ընդունելություն բոլոր մասնագիտությունների գծով էլ եղել է, բայց դիմորդների մակարդակն ու պատրաստվածությունը նախորդ տարիների համեմատ թույլ է եղել, ու մրցույթն էլ այդքան մեծ չի եղել:



«Վերջիվերջո ստիպված էինք համարյա բոլորին ընդունել: Այդ առումով վիճակը մի քիչ վատ է եղել Գյումրիի մեր մասնաճյուղում, բայց Դիլիջանի մասնաճյուղում ավելի շատ մարդ է դիմել, քան թե անցած տարիներին»,- նշեց Իսաբեկյանն ու ավելացրեց, որ կիսով չափ կրճատված դիմորդների քանակն այս տարի կոմպենսացվել է մագիստրատուրայի դիմումներով: