Դատավորին կդատե՞ն

Երկուշաբթի` օգոստոսի 29-ին, Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Մխիթար Պապոյանը կորոշի՝ իր գործընկեր, Արարատի եւ Վայոց Ձորի մարզի ընդհանուր իրավասության դատարանի դատավոր Լեւիկ Պողոսյանի նկատմամբ հարուցված քրեական գործն օրինակա՞ն է, թե՞ ոչ:



Այս մասին մեզ հայտնեց դատավորի փաստաբան Հայկ Ալումյանը: Հիշեցնենք, որ Հատուկ քննչական ծառայությունը քրեական օրենսգրքի 308 հոդվածի 1-ին եւ 314 հոդվածի հատկանիշներով հարուցել է քրեական գործ դատավորի կողմից պաշտոնեական լիազորությունները չարաշահելու եւ պաշտոնեական կեղծիք կատարելու առթիվ:



Քրգործի հիմքում պայմանական դատապարտված անձին երկրից դուրս գալու իրավունք տալն է, ինչը դուր չի եկել ոստիկանությանն ու դատախազությանը: Լեւիկ Պողոսյանն այս օրերին արձակուրդում է եւ հանգստանում է:



Ի դեպ, հոկտեմբերի 15-ին լրանում է նրա 65 տարին, եւ նա պետք է գնա կենսաթոշակի: Այսինքն, նա դեռ երկու ամիս կաշխատի՝ եթե, իհարկե, չդատեն ու չզրկեն դատավորի կենսաթոշակից: