Ո՞վ է ուզում տիրանալ «Հին Էրիվանին»

«Յունիբանկի» եւ «Հին Էրիվանի» միջեւ սկսված կոնֆլիկտը շարունակվում է, եւ դեռ այս խմորը շատ ջուր կվերցնի: «Հին Էրիվանի» տնօրինությունը հայտարարել է, որ «Յունիբանկի» կառավարիչ Վարդան Աթայանն աչք ունի շենքի վրա եւ ամեն ինչ անում է այն խլելու համար: Նույնիսկ համագործակցում է ոստիկանության 6-րդ վարչության հետ: Վ. Աթայանը մեզ հետ հեռախոսազրույցում ասաց, որ ինքը նման նպատակ չունի:



«Եթե ուզեմ՝ ես ինքս նմանատիպ ռեստորաններ կսարքեմ: Պարզապես բանկին փող են պարտք՝ պիտի տան»,- ասաց Աթայանը: Իսկ ոստիկանությունից տեղեկացրին, որ 6-րդ վարչությունը «Հին Էրիվանում» ստուգումները սկսել է բանկի պաշտոնական գրության հիման վրա: Երեկ մենք զրուցեցինք «Հին Էրիվանի» սեփականատեր Մանվել Տեր-Առաքելյանի հետ:



- Ամեն ինչ սկսվեց նրանից, որ ֆինանսական ճգնաժամի պատճառով մեզ տրվեց արտոնյալ ժամանակաշրջան՝ ֆինանսական ճգնաժամի հետ կապված: Մուծումները, ըստ ժամանակացույցի, արել ենք ու դիմեցինք  այլ բանկերի՝ վերաֆինանսավորման առաջարկով: Պարզվեց, որ իբր մենք տոկոսագումարները չենք վճարել «Յունիբանկին» եւ հարկային տեսչությանը պարտք ենք: Երբ դիմեցինք պարոն Աթայանին՝ տեղեկանք տալու, նա ծանր տարավ այդ փաստը, միանգամից գրոհեց մեզ վրա եւ ասաց, որ կդիմի 6-րդ վարչություն, եւ ինձ կքերթեն:



- Եվ քերթեցի՞ն Ձեզ 6-րդ վարչությունում:



- Մեր հանրապետությունում չեն կարող քերթել բոլորին: Ինձ կանչեցին 6-րդ վարչություն եւ ստիպում էին ստորագրել, որ ես պարտք եմ բանկին: 4 էջանոց բացատրությունը գրվեց  8 ժամում: Ամեն նախադասությունն անձամբ Վարդան Աթայանի հետ էր ճշտվում:



- Ինչի՞ց եք ենթադրում, որ անձամբ Աթայանի հետ էր:



- Հարցադրումներից. ինչ ժամանակին հարցրել էր Վարդանը, նույն հարցերն էին տալիս, նույնիսկ նույն վարդանյան տոնով ու լեքսիկոնով: Եվ հետո՝ Աթայանը հրաժարվել էր իր ստորագրությունից, ասելով, որ մենք ենք կեղծել արտոնյալ ժամանակահատվածի պայմանագիրը: Փառք Աստծո, փորձաքննությունն ապացուցեց, որ ինքն է ստորագրել:



- Իսկ երբեւէ եղե՞լ է շենքը գնելու առաջարկ:



- Որպես այդպիսին՝ չի եղել: Մի անգամ Արթուր Աբրահամն էր հյուր, հարցուփորձ արեց՝ ինչքանո՞վ կծախեմ «Հին Էրիվանը»: Ասացի՝ վաճառքի ենթակա չէ:



- «Յունիբանկը» Արթուր Աբրահամի հովանավորն է: Կարելի՞ է ենթադրել, որ այդ առաջարկը կապ ունի կոնֆլիկտի հետ:



- Ի՞նչ: Առաջին անգամ եմ լսում, գուցե, բայց Արթուրը զուտ բարեգործական էր այցելել:



- Հայաստանի նախագահ Սերժ Սարգսյանը հաճախ էր գալիս այստեղ: Մեր տեղեկություններով՝ վերջերս չի այցելում: Ինչո՞ւ:



- Նուրբ հարց է: Նախագահը հաճախ է եկել, բայց ոչ միայն նայելու վերեւից, այլ իր բարձրաստիճան հյուրերի հետ: Ֆրանսիայի, Խորվաթիայի, Բուլղարիայի, ՌԴ ներկա եւ նախկին նախագահները, որպես հայկական հին էթնիկ ռեստորան, այստեղ են եկել: Գուցե հիմա այդպիսի հյուրեր չկան, որ նախագահը բերի: Նաեւ մտածում եմ, որ Երեւանը մեծ քաղաք է,  մրցակցություն կա, եւ նախագահը մյուս հաստատություններ պիտի գնա: Դա նեղվածություն չի կարող լինել: Նախագահը հաստատ չի նեղացել «Հին Էրիվանից»:



- Կուսակցակա՞ն եք:



- ՀՀԿ եմ, ոչ մի դեպքում բիզնեսը չի քաղաքականացվել: Բիզնեսը դուրս է քաղաքականությունից: Ես ձգտում եմ այդպես անել: Չի նշանակում լինել հանրապետական ու ծավալել բիզնես, ես 1988-ից եմ այս գործում, իսկ հանրապետական եմ 2007-ից:



- Ասում են՝  ֆինանսական դժվարություններ ունեք, ծախել եք ամեն ինչ եւ անգամ վարձով եք ապրում:



- Աստվածապաշտ մարդ եմ, բիզնեսը չի բացառում ոչ մի բան: Վերելք, անկում, ես դա տրագեդիա չեմ համարում: Սկսել եմ 2 քմ-ից, կրպակից: Ֆինանսական դժվարություններ կունենա, բայց մարդը եթե նեղության մեջ չի լինում, ուղեղը չի աշխատում: Պարույր Սեւակն էր ասում՝ ո՞վ էր ասում մեզ այդքան նեղեիք, որ ադամանդ դառնայինք: Այո, ես դժվարություն ունենայի՝ կասեի, բայց ինքներդ եք տեսնում, որ շենքն իմն է, ես այստեղ աշխատում եմ ու, ասեմ՝ Էջմիածնում էլ շուտով ռեստորան եմ բացելու:



- Ձեր թշնամինե՞րն են տարածում նման խոսակցություններ, թե՞ չունեք թշնամիներ:



- Թշնամի չունենալը խոսում է մարդու տկարության մասին: Ես չգիտեմ, չեմ ճանաչում իմ թշնամիներին: Շատ դեմոկրատ եմ, երեւանյան հիվանդության պես մի բան է նախանձը, որ հատուկ է հայերին: Ես ինքս էլ զերծ չեմ դրանից, բայց դե, Վարդանին թշնամի չեմ համարում: Եկեք խոսենք մեծ գաղափարներից: Վ. Աթայանը մի մարդ է, որ այս պետության մեջ քարը քարի վրա չի դրել, ծառ չի տնկել, թշնամի չի ինձ, եւ ես ժամանակը չեմ վատնի նրան անդրադառնալու վրա:



Չի կարելի բանկային ռեսուրսներն օգտագործել անձնական նպատակների համար: Վարդան Աթայանն այդ բանկում նշանակված անձ է. կարող է վաղը նույն հաջողությամբ լինել  դրսում: Շատ գումար ունենալը հեղինակություն չէ, դա չի  նշանակում, որ ինքն ունի լիցենզիա՝ այս քաղաքում զբոսնելու համար: Միայն շատ գումար ունենալը չի նշանակում, որ, երեխաների ձեռքից բռնած, պարզճակատ ման գաս, ազատ քայլես: Էդքան հաճախորդներին ցավացնելը թեթեւ չի լինելու: Մարդիկ չեն խոսում այդ մասին, քանի որ ղեկավար է: Ցուլը, որ ընկնում է, դանակավորները շատանում են: Ինքը շատ անարդարություն է անում, թուքումուր է ուտելու: «Յունիբանկը» ոչ պատվաբեր բան է անում, չի կարելի այսօր գաղտնիք հանդիսացող նյութերը տրամադրել 6-րդ վարչությանը, որ վախեցնելու լեզվով խոսեն: Բանկի ռեսուրսներն օգտագործել, դարձնել հրապարակային…  Նա պետք է հրաժարական տա եւ պատասխանատվության ենթարկվի: Գոնե բարոյական քայլ պիտի անի եւ հրաժարական տա: Ես այսօրվանից եմ սկսել պայքարել բոլոր վարկառուների անունից ու նաեւ հանուն ապագա վարկառուների:



- Ի վերջո ո՞վ է կանգնած այս ամենի ետեւում:



- Անունը չեմ տա, մի քանի օրից գուցե: Մենք պատրաստվում ենք մամուլի հաղորդագրությամբ հանդես գալ, եւ եթե բանկի քաղաքականությունը չի փոխվի, ապա մենք կհրապարակենք այդ ճանաչված մարդու անունը: