Զոհված զինվորի գործով երկու հոգի է ձերբակալվել

Օգոստոսի 26-ին ԼՂՀ Պաշտպանության բանակում մահացած 18-ամյա զինծառայող Աղասի Աբրահամյանի գործով ձերբակալվել են երկու հոգի՝ մեկ սպա եւ մեկ զինվոր, լրատվամիջոցներին է փոխանցել ՀՀ պաշտպանության նախարարի մամլո քարտուղար Դավիթ Կարապետյանը, ով, սակայն, ելնելով գործի շահերից, հրաժարվել է որեւէ անուն նշել։



Դավիթ Կարապետյանը նաեւ հաղորդել է, որ հաջորդ օրը դեպքի վայր՝ «Եղնիկներ» կոչվող զորամաս են մեկնել ՀՀ զինդատախազ Գեւորգ Կոստանյանը եւ պաշտպանության նախարարության քննչական ծառայության ղեկավար Արմեն Հարությունյանը` 18-ամյա զինծառայողի մահվան գործի նախաքննությունը անձամբ իրենց վերահսկողության ներքո պահելու համար: