Ձեռներեցն այն մարդն է, որ գնում է աշխատանքի եւ աշխատավարձ ստանում

ՀԱԿ հրապարակած 76 «ոչ լեգիտիմ» պատգամավորների ցանկում ընդգրկված ՀՀԿ-ական Վարդան Այվազյանը («Գործիքաշինական» ԲԲԸ-ով եւ քարի ու մետաղների արդյունահանմամբ) մեզ հետ զրույցում կարծիք հայտնեց, որ ՀԱԿ-ում լավ չեն պատկերացնում խնդիրը, այլապես կպատասխանեին այս պատգամավորների հերքումներին: Այվազյանից նույնպես հետաքրքրվեցինք՝ կուսակցությունում քննարկե՞լ են իր հարցը, նրան դուրս չե՞ն թողնելու համամասնական ցուցակից:



- Բայց ինչի՞: ...Գիտես, էս ամեն ինչն ինձ հայտնի անեկդոտն ա հիշեցնում: Էն, որ դեկաբրիստի թոռնիկը կոմունիստին հարց ա տալիս, ասում ա՝ ինչի՞ համար են հեղափոխություն անում, ասում ա՝ որ հարուստներ չլինեն, ասում ա՝ իսկ մեր պապերը կռվում են, որ սաղ հարուստ ըլնեն: Տարբերությունը սրա մեջ ա: Բաժնետեր ըլնելը հանցագործությո՞ւն ա, ձեռնարկատիրությամբ զբաղվել ա՞ կոչվում. էդ ո՞ր օրվանից: Իսկ մեր կուսակցությունում այդ հարցը իմ ներկայությամբ չի քննարկվել, կարող ա առանձին քննարկվել ա՝ չգիտեմ:



- Պարոն Այվազյան, ձեն-ձենի տված՝ բոլորդ նույն բանն եք կրկնում, գոնե Դուք խոստովանեք, որ կառավարում եք, միջամտում եք Ձեր բիզնեսին:



- Ո՞նց եմ ես միջամտում: Ճիշտ եք ասում, կակռազ իմ՝ քաղաքական որոշում ընդունման ժամանակ միջամտում եմ բիզնեսին, ուզում ենք ստեղծել պայմաններ, որպեսզի նորմալ լինի բիզնեսը, ինչքան ա հաջողվում, թե չի հաջողվում, դա ընտրությունների ժամանակ ա երեւում: Բայց ասենք բաժնետեր լինելը՝ մի տեղ 40 տոկոս կամ մի տեղ, ասենք, 50 տոկոս, 20 տոկոս, դա կոչվում ա զբաղվել ձեռներեցությամբ, հա՞: Ձեռներեցն այն մարդն է, որ, ասենք, գնում է ինքը աշխատանքի եւ աշխատավարձ ա ստանում դրա համար եւ անմիջական բան ա... Ես ո՞նց եմ միջամտում բիզնեսին: Հիմա գործիքաշինական արտադրությունն անմիջապես սպառվում է դրսում:



- Ես չէ, որ պետք է ասեմ ոնց, փոքր երկիր, է եւ բոլորի մասին էլ ամեն ինչ հայտնի է:



- Իրանք գրել են բանը, չէ՞, գործիքաշինական գործարան... Պատկերացում ունե՞ն ինչ բան ա գործիքաշինական գործարանը, մոտավորապես պատկերացում ունե՞ն ինչի մասին ա խոսակցությունը: Ասենք կամ գրում են քարերի մշակման գործում... եթե կան հանքավայրեր, եթե մի հատ քարի հանքավայր ունեմ, տալիս եմ իրան, եթե 25 տոկոս ինձ մասնաբաժին ունեմ ենթադրենք ինչ-որ մի բանում՝ գործիքաշինականում, ուրեմն դա լուրջ միջամտությո՞ւն ա բիզնեսին: Գիտեք ինչ կա՝ վայ էն տնտեսությանը, վայ էն երկրին, որ չունենա հարկատուներ, որովհետեւ հարկատուն ամենամեծ պատվի արժանի մարդն է, որը ստեղծում ա բարիք եւ բարիքների մի մասը պարտադիր կերպով պետք է փոխանցի պետությանը:



- Բայց դա չի նշանակում, որ նման «հարկատուները» պետք է զբաղվեն օրենսդիր աշխատանքներով, ինչն օրենսդրորեն արգելված է:



- Վայ էն երկրին, որ հարկատուն չմտնի օրենսդիր մարմին, ես ասում եմ՝ հարկատուն, ես բառերն ասում եմ, Դուք բառերից  զգույշ եղեք: Օրինակ, իմ աշխատավարձից որոշակի տոկոսը փոխանցվում է պետական բյուջե, նույն էն աշխատավարձից, որը պետությունն է տալիս:



- Լավ, ուզում եք ասել, որ ՀԱԿ-ի հրապարակած ցուցակը հիմնավոր չէ, եւ այդ բոլոր 76 պատգամավորները սեփականատե՞ր են, եւ դա գործարարություն չէ՞:



- Բոլորի մասին չեմ կարող հստակ ասել, որտեւ կարող ա լինեն չհրապարակածի մեջ էլ: Նախ, հրապարակման խնդիրը նրա մեջ է կայանում, որ հերթական անգամ ժամանակն ա, Ազգային ժողովի ընտրությունները մոտենում են, ուզում են սեւ բիծ քցել ԱԺ-ի վրա ու այդպես էլ գրին՝ բոբոներ... Որեւէ գործարարի փայաբաժին ունենալը Սահմանադրությանը չի հակասում, որովհետեւ ինքը չի մասնակցում տվյալ բիզնեսին, կառավարումն իրականացնում է մենեջերը, եւ ինքը չի կարողանում ասել՝ գիտեք ինչ կա, խնդրեմ ինձի տուր աշխատավարձ կամ որեւէ բան: Եթե ինքն աշխատավարձ չի ստանում, ինքը չի նշանակում, որ ինքն ամբողջությամբ զբաղվում է գործարարությամբ: Էդ ինչ որ իրենք գրում են, հստակ կարող եմ ասել՝ գրում են, էլի, սիրողական կարգով են գրում:



- Ինչո՞ւ եք բոլորի անունից նման հայտարարություն անում, գուցե մնացածները համաձայն են, որ լավ էլ ճի՞շտ են գրել:



- Գուցե, որովհետեւ եթե բերեն-ասեն, որ, ենթադրենք, Պողոսյան Պողոսն այստեղ իրա աշխատավարձի դիմաց ինքը ստացել է էսքան, եւ կոնկրետ գրավոր խնդրում ենք, ասենք, որեւէ մի տեղ կամ իրավասու մարմիններին՝ նայել, որովհետեւ Սահմանադրությունն ասում է, որ ԱԺ պատգամավորը չի կարող զբաղվել այլ աշխատանքով, բացի ստեղծագործական-գիտական: ՀԱԿ-ի գործը գնահատելն է, իմը՝ աշխատելը: Եթե իրանց գնահատումներով բիզնեսմեն պատգամավորներ կան ըտեղ, թող հլը միանգամից դիմեին համապատասխան մարմիններին, ենթադրենք ապօրինի գործողության համար կամ, ասենք, հակասահմանադրական, քրեական գործ հարուցեին, ինչի՞ եք հերթով տպագրում: Հիմա մենք ասում ենք՝ մասնաբաժին, փայաբաժին ունենալը չի նշանակում զբաղվել ձեռնարկատիրական գործունեությամբ, իրենց չի՞ բավարարում, թող պատասխանը տան: Կոնկրետ Այվազյան Վարդանի համար եմ ասում, դա չի՞ բավարարում ձեզ: ...Ես չէ, որ իմ անմեղությունը պետք է ապացուցեմ, կարծեմ Սահմանադրության մեջ էլ է դա գրված, իրանք պետք է իմ մեղավորությունն ապացուցեն: