Ով է նստելու Մարգարի աթոռին

Հայաստանի ճանապարհային ոստիկանության ճանապարհապարեկային ծառայության բաժնի պետ, գնդապետ Նորիկ Սարգսյանը երեկ լրագրողների հետ հանդիպման ժամանակ ոչ հերքել, ոչ էլ հաստատել է իր՝ ՃՈ պետ նշանակվելու մասին շրջանառվող լուրերը: «Մենք զինվորական ծառայողներ ենք եւ հրամաններ ենք կատարում։ Թե ով որտեղ է ծառայելու, որոշում է ոստիկանության ղեկավարությունը: Եթե որոշվի, որ ես պետք է ծառայեմ Ամասիայում՝ կծառայեմ այնտեղ»,- ասել է Նորիկ Սարգսյանը:



Նա նաեւ հավաստիացրել է, որ ՃՈ արդեն նախկին պետ Մարգար Օհանյանի (ոստիկանապետ Ալիկ Սարգսյանի հրամանով Մարգար Օհանյանը երեկ ազատվել է զբաղեցրած պաշտոնից եւ անցել կադրերի ռեզերվ) դեմ հարուցված քրեական գործի շրջանակներում իրեն չեն հարցաքննել:



Չնայած բոլոր հավաստիացումներին, այնուամենայնիվ ՃՈ նոր պետի ամենահավանական թեկնածուն, ըստ շրջանառվող լուրերի, շարունակում է մնալ Նորիկ Սարգսյանը: Թեեւ եւս երկու անուն է շրջանառվում, այդ թվում՝ ՃՈ նախկին պետ Իշխան Իշխանյանի անունը: