Ես չեմ եղել

Երեկ մեր տպագրած «Առաջարկեք ձեր քույրերին» վերնագրով նամակի հետքերով խմբագրություն էր այցելել ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Հրայր Կարապետյանի վարորդը՝ Կոստյան: Նա հետաքրքրվում էր, թե ով է նշված նամակի հեղինակը, եւ պնդում էր, որ ինքը չի եղել այն «ամրակազմ երիտասարդը», ով աղջկան անպարկեշտ առաջարկություն է արել կեսգիշերին:



Նա թեեւ ամեն օր անցնում է Լենինգրադյան փողոցով, սակայն վերջին օրերին զբաղված է եղել եւ չէր կարող այդ ժամին այդ վայրում լինել, առավել եւս՝ նման առաջարկություն անել անծանոթ աղջկա: Նրա պատմելով, նշված նամակը մեծ աղմուկ է առաջացրել, եւ դրա պատճառով կարող են իրեն ազատել աշխատանքից:



Այն կարդացել է նաեւ ԱԺ նախագահը եւ վրդովվել: Կոստյան ասում էր, որ իրար նման համարանիշներով մի քանի «Տոյոտա Քեմրի» մեքենաներ կան, որոնք նամակագիրը կարող էր շփոթել իր ավտոմեքենայի հետ: