Իմ երազանքը քննիչ լինելն էր

Վերջին օրերին սկիզբ առած կադրային փոփոխությունների մեջ ուշագրավ էին ոստիկանության այլեւս նախկին պետ Ալիկ Սարգսյանի հրաժարականն ու պաշտպանության փոխնախարար Վլադիմիր Գասպարյանի նշանակվելն այդ պաշտոնում: Գասպարյանի՝ ոստիկանապետի հավակնությունների մասին խոսվում էր տարիներ շարունակ,  դեռեւս Սարգսյանի նշանակվելուց առաջ, սակայն իրականացավ օրերս: Իսկ այս օրերին ՀՀԿ-ի կողմից կադրային սենսացիոն փոփոխությունները մեկնաբանվում են միայն նախընտրական տրամաբանությամբ: Իր նշանակման ու առաջիկա անելիքների մասին զրուցեցինք Վլադիմիր Գասպարյանի հետ:



- Պարոն Գասպարյան, ինչո՞վ էր պայմանավորված Ձեր ընտրությունը: Ձեր նշանակմանը արձագանքում են որպես ընտրություններին նախապատրաստություն, որ ոստիկանության համակարգին անհրաժեշտ էր «ուժեղ ղեկավար»:



- Ես քաղաքական էդպիսի բան չեմ տեսնում: Ալիկ Սարգսյանն իմ աշխատանքային ընկերն է, մենք երկար տարիներ ենք աշխատել: Ինչ-որ ժամանակ մարդը կատարում է ինչ-որ խնդիրներ, դրանից հետո գալիս է ուրիշ խնդիր, որը մեկ ուրիշը կլուծի: Ես չեմ ուզում, որ տեսնեն քաղաքական հենք, որովհետեւ առաջինը՝ քաղաքականությունից դուրս ենք, երկրորդը՝  ես չեմ կարծում, որ այդպիսի իրավիճակ է:



- Խոսակցություններ կան, որ ընտրություններից հետո Ձեզ էլ կփոխեն:



- Ընտրությունը համապետական միջոցառում է, ուղղակի ոստիկանությունն իր խնդիրներն ունի: Անկախ նրանից, թե ով է ոստիկանապետը, այդ խնդիրները պետք է լուծենք: Կարծում եմ՝ ուղղակի խնդիրը կայանում է նրանում, որ մի ղեկավար ինչ-որ մի բան արեց, դրանից հետո գալիս է այլ ղեկավար ու շարունակականությունն ապահովում: Ձվի մեջ մազ պետք չէ ման գալ:



 - Իսկ Դուք ի՞նչ խնդիրներ եք Ձեր առջեւ դնելու, ի՞նչն եք կարեւորելու:



- Ես շարունակելու եմ մեկնարկած բարեփոխումները, որ սկսվել են, ուղղակի ես կարծում եմ, որ պետք է նոր զարկ տալ եւ ավելի ինտենսիվ պետք է զբաղվել, եւ միայն դրա արդյունքում կունենանք հասարակության մեջ ներքին փոփոխությունները, ինչն ուզում է ժողովուրդը: Կլինի օրենքի գերիշխանություն, եւ բոլորը կլինեն հավասար օրենքի առաջ:



- Ալիկ Սարգսյանն աշխատում էր հասարակության մեջ ոստիկանի հեղինակության բարձրացման ուղղությամբ: Դուք այդ ուղղությամբ քայլեր կձեռնարկե՞ք:



- Ես ոստիկանի հեղինակությունը բարձրացած տեսնում եմ այն բանի մեջ, որ լավ կատարեն իրենց գործառույթները եւ ակտիվ պրոֆիլակտիկ աշխատանքներ տանեն ու կատարված հանցագործություններն էլ բացահայտեն: Ես կարծում եմ, որ ոստիկանի հեղինակությունը բարձրացնում են կոնկրետ աշխատանքով, եւ բարեփոխումներ էլ պետք է սկսել մեզնից: Ինքներս պետք է բարեփոխվենք: Բարեփոխում չի կարող լինել, եթե մարդիկ բարեփոխված չեն իրենց մտածելակերպով ու աշխարհայացքով:



- Ոստիկանների հետ միջադեպեր հատկապես լինում են բողոքի ակցիաների ժամանակ: Այս ուղղությամբ քայլեր կձեռնարկե՞ք:



- Ես կարծում եմ, որ ոստիկանությունն իր վրա ունի դրված պարտականություններ եւ իրավունքներ: Ես կարծում եմ, որ ոստիկանությունը սրբորեն պետք է կատարի իր պարտականությունները եւ լիարժեք ռեալիզացնի իր իրավունքները: Այս ժամանակ, այսպես ասած՝ մանր-մունր պրոբլեմներ չեն առաջանա ցուցարարների հետ: Ինչ վերաբերում է ցուցարարներին, բողոքի ձեւեր կան, պետք չի անձնական վիրավորանքներով անել դա՝ խախտելով օրենքի պահանջները:



- Կադրային փոփոխություններ լինելո՞ւ են համակարգում:



- Եթե ես ի սկզբանե ասացի,  որ ես շարունակականության կողմնակիցն եմ եւ կարծում եմ, որ ոստիկանությունը  կայացած կառույց է՝ իր ընթացքի մեջ գտնվող, ինչո՞ւմն է բանը, ի՞նչ կադրային փոփոխության մասին է խոսքը: Ասեմ՝ կադրային ջարդի մոտեցումը չի բերում արդյունքի, դրանք ավելորդ սթրեսներ են, ուղղակի մենք կփորձենք աշխատաոճը, մի քիչ էլ մոտեցումները փոխել: Ես կարծում եմ՝ ինքնըստինքյան կընկնի իր տեղը, առողջ օրգանիզմը գովելի է, որովհետեւ առողջ օրգանիզմում հիվանդ օրգան չի կարող մնալ:



- Պարոն Գասպարյան, մեր նախորդ հարցազրույցի ժամանակ Դուք խոսում էիք բանակի խնդիրներից ու պնդում, որ անձամբ եք լծվել բարեփոխումների գործին, փաստորեն, թողեցիք բանակում սկսածը՝ նոր պաշտոնի անցնելու պատճառով:



- Ես չեմ կարող բանակը թողնել ոչ մի պարագայում, ինչու՝ որովհետեւ երկար տարիներ ես բանակում եմ եղել, էնտեղ են իմ մարտական ընկերները: Ես կարծում եմ, որ բանակին ավելի օգտակար կլինեմ՝ որպես դրսի հայացք: Ես օրենքի գերիշխանության կողմնակից եմ, ժողովրդավարության կողմնակից եմ:



 - Պարբերաբար գրվում էր, թե ոստիկանության պետի պաշտոնը Ձեր երազանքն էր,  այսինքն՝ Ձեր երազանքն իրականացա՞վ:



- Եթե անկեղծ ասեմ՝ իմ երազանքը եղել է քննիչ լինել: 6-7 տարեկանից երազել եմ քննիչ լինել, իսկ ոստիկանության պետը վեր է եղել իմ մանկական երազանքներից, այնպես որ եթե թերթերը գրում են երազանք, դա չի նշանակում, որ Վովա Գասպարյանը երազանքների մեջ է, ես ունայնությունը չեմ ընդունում:



- Սերժ Սարգսյանը Ձեզ աշխատակազմին ներկայացնելիս ասաց, թե ոստիկանությունը կարիք ունի Ձեր տիպի ղեկավարի: Ձեր մեկնաբանմամբ՝ ի՞նչ տիպի մասին է խոսքը:



- Ես կարծում եմ՝ ոստիկանության ոլորտում երկար աշխատած, փորձ ունեցած մարդու:



 



Գայանե



ՍԱՐԻԲԵԿՅԱՆ