Արգամիչը վերջապես փակեց պարտքը

«Հրապարակը» բազմիցս անդրադարձել է «Ա-3 ճարտարապետներ» կազմակերպության ու ԱԺ այլեւս նախկին նախագահ Հովիկ Աբրահամյանի միջեւ  ֆինանսական պարտք ու պահանջին: Հիշեցնենք, որ ԱԺ նոր դահլիճի նախագծման դիմաց այս կազմակերպությանը տրելիք 15 միլիոն դրամը չէր վճարվել: Հովիկ Աբրահամյանը բանավոր պայմանավորվածությամբ տղամարդու խոսք էր տվել, թե կվերադարձնի, սակայն անընդհատ փորձել էր սակարկել գումարի չափը: Կազմակերպությունն ամռանը հայտարարեց, թե չի նահանջի եւ իրավական ճանապարհով կպահանջի իր գումարը: Այս հայտարարությունից հետո Արգամիչը վերսկսեց բանակցությունները:



Երեկ տեղեկացանք, որ իր  հրաժարականից հետո, երբ վերստին արծարծել էինք պարտքերի թեման, նա հանդիպել է կազմակերպության ղեկավար Անահիտ Թարխանյանին եւ, համաձայնության գալով որոշակի գումարի շուրջ, կոնֆլիկտը հարթել: Սա մեզ հետ զրույցում հաստատեց նաեւ Անահիտ Թարխանյանի ամուսինը՝ Անդրիաս Ղուկասյանը: Բայց կոնկրետ գումարի մասին ոչինչ չասաց:  Սակայն կարծում ենք, որ մոտ երկու տարի նախահաշվով հատկացվելիք գումարը սակարկող ԱԺ խոսնակը դժվար թե առատաձեռնություն ցուցաբերի:



Նշենք, որ  ճարտարապետներին չվճարելու համար հատկապես պայքարում էր ԱԺ աշխատակազմի ղեկավար Գեղամ Ղարիբջանյանը, որը  նաեւ նախագծի պատվիրատուն էր եւ ղեկավարում էր  դահլիճի նորոգման աշխատանքները:  Դեռեւս ամռանը, մեր առաջին հրապարակումից հետո, Ղարիբջանյանն աղմուկ էր բարձրացրել, թե կազմակերպությունը ստում է, ավելին՝ ոչ միայն վճարել են, այլեւ պարգեւատրել (պարգեւատրելու մասին հայտարարությունը համապատասխանում է իրականությանը):



Մեզ նույնիսկ  գրություն ուղարկեց, որտեղ «փաստել» էր իրենց վճարած գումարը եւ այդպիսով թեման փակված համարել: Մեր տեղեկություններով, Ղարիբջանյանի՝ չվճարելու շահագրգռությունը պայմանավորված է վիրավորվածությամբ: Բանն այն է, որ դահլիճի նորոգման գործում դերակատարում ունեցած մարդիկ պարգեւատրվել են, իսկ Ղարիբջանյանը՝ անտեսվել:  Այդ պատճառով մի քիչ շատ է համարել ճարտարապետների «երկու երնեկը»: