Պատահարներն օր օրի շատանում են

Վերջին մեկ-երկու տարիներին Հայաստանում կտրուկ ավելացել է ճանապարհատրանսպորտային պատահարների թիվը: Չկա օր, որ Երեւանում եւ դրա սահմաններից դուրս խոշոր ավտովթարներ չգրանցվեն: Դրանց հետեւանքով, դժբախտաբար, բազմաթիվ զոհեր եւ վիրավորներ են լինում: Քիչ չեն նաեւ վրաերթերի դեպքերը, որոնք նույնպես հաճախ մահվան ելք են ունենում: Չնայած վերջին օրերին մայրաքաղաքում ճանապարհային ոստիկաններն ակտիվ հսկում են, որպեսզի հետիոտները չխախտեն ճանապարհատրանսպորտային կանոնները եւ անցումներով անցնեն կամ ուղեւորների համար նախատեսված վայրով հատեն փողոցները, սակայն առայժմ իրավիճակը չի բարելավվում:



Վերջին շաբաթների ընթացքում «hraparak.am» կայքում մեր ընթերցողների շրջանում հարցում էինք իրականացնում՝ փորձելով տեսնել, թե նրանց կարծիքով ինչու են պատահարներն այդքան շատացել: Հարցը հետեւյալն էր. «Ո՞րն է վերջին շրջանում ճանապարհատրանսպորտային պատահարների կտրուկ ավելացման պատճառը»:



Ընթերցողներին առաջարկվել էր պատասխանների մի քանի տարբերակ՝ Ճանապարհային ոստիկանության վատ աշխատանքը, վարորդների եւ հետիոտների կողմից երթեւեկության կանոնները չպահպանելը, վարորդական իրավունքի տրամադրման կարգի փոփոխումը՝ հեշտացումը, Հայաստանում մեքենաների քանակի շատանալը:



Հարցմանը մասնակցել է 1.503 մարդ: Նրանց մեծ մասի կարծիքով՝ ճանապարհատրանսպորտային պատահարների ավելացման պատճառը վարորդների եւ հետիոտների կողմից երթեւեկության կանոնները չպահպանելն է: Այսպես է կարծում հարցվածների 48 տոկոսը (725 ձայն): Հարցվածների 24 տոկոսը՝ 356 ձայն, կարծում է, որ պատճառը Ճանապարհային ոստիկանության վատ աշխատանքն է: Երրորդ տեղում է Հայաստանում մեքենաների քանակի շատանալու տարբերակը՝ 20 տոկոս (305 ձայն): Եվ միայն հարցվածների 8 տոկոսն է (117 ձայն) կարծում, որ ճանապարհատրանսպորտային պատահարների ավելացումը վարորդական իրավունքի տրամադրման կարգի փոփոխման՝ հեշտացան հետեւանք է:



Երբ հարցումը նոր էր հայտնվել կայքում, զանգահարեց մեր ընթերցողներից մեկը եւ ասաց, որ ճանապարհատրանսպորտային պատահարների պատճառներից մեկն էլ այն է, որ Հայաստանում ճանապարհները սխալ են կառուցված եւ բազմաթիվ ավտովթարների պատճառ են դառնում: «Միայն ես չէ, որ այդպես եմ կարծում: Ինձանից բացի, բազմաթիվ այլ վարորդներ էլ են նույնը պնդում»,- ասում էր նա:



Պատճառներն իհարկե տարբեր են: Ցավալին, սակայն, այն է, որ ճանապարհատրանսպորտային պատահարները բազմաթիվ մարդկանց մահվան պատճառ են դառնում:



Նատաշա Հարությունյան