Ծեծել են ոստիկանի

Երեկ երեկոյան կրակոցներ են հնչել Շիրակի մարզի Արթիկ քաղաքում: Ուշ երեկոյան մեզ հաջողվեց մանրամասներ պարզել միջադեպի կապակցությամբ: Ինչպես փոխանցեցին մեզ, կրակոցներին նախորդել է դաժան ծեծկռտուքը, ընդ որում մասնակիցների մեջ եղել է նաեւ ոստիկան: Մեր աղբյուրի փոխանցմամբ՝ ժամը 6-7-ի սահմաններում մի խումբ անձինք մոտեցել են ծառայություն իրականացնող ոստիկանին, կարճ զրույց ունեցել, ապա ոստիկանին նստեցրել են իրենց մեքենան ու անհետացել: Ինչից հետո պարզվել է, որ նույն խումբը «ռազբորկան» շարունակել է Արթիկի օբյեկտներից մեկում, որտեղ քիչ անց ծեծկռտուք է սկսվել: Խումբը դաժան ծեծի է ենթարկել ոստիկանին, վերջինս էլ իրեն ամրակցված զենքից կրակել է հակառակորդների ուղղությամբ:



Ըստ մեր աղբյուրի՝ ոտքից վիրավորվել է խմբի «պարագլուխը»՝ ոմն Անուշավան, որն, ըստ արթիկցիների, ԲՀԿ-ական պատգամավոր Մարտունիկ Գրիգորյանի մերձավորներից է: Տարիներ առաջ նույնիսկ եղել է Մարտունիկի  հանգուցյալ հորեղբոր` քրեական հեղինակություն համարվող Սերոբի թիկնապահը: Վիրավորված ոտքով սույն Անուշավանն ընկերների հետ միասին հետապնդել է ոստիկանին, որը փախչելով՝ շարունակել է դրսում օդ կրակել:



Թե ինչից է առաջացել վեճը, մեզ չհաջողվեց մանրամասներ ճշտել Արթիկի ոստիկանությունից: Սակայն տեղեկացանք, որ սկսվել է այն բանից հետո, երբ խումբը փորձել է հաշվեհարդար տեսնել ոստիկանի հետ՝ վերջինիս եղբոր հետ կապված ինչ-որ հարցի վերաբերյալ: Մեր աղբյուրի պատմելով՝ երեկ մինչեւ ուշ գիշեր դեպքի առնչությամբ ձերբակալություններ են եղել Շիրակի մարզում: Որոշ խոսակցություններ կան, որ ոստիկանին ծեծի ենթարկելը չեն մարսելու: